ನೇತಾಜಿ 'ಗುಮ್ನಾಮಿ ಬಾಬಾ' ಗುಮಾನಿ ಸದ್ಯವೇ ದೂರ

ಹೊಸದಿಲ್ಲಿ: ನೇತಾಜಿ ಸುಭಾಶ್ ಚಂದ್ರ ಬೋಸ್ ಅವರೇ ಗುಮ್ನಾಮಿ ಬಾಬಾ ರೂಪದಲ್ಲಿ ಜೀವಿಸಿದರೇ ಎಂಬ ಪ್ರಶ್ನೆಗೆ ಸದ್ಯದಲ್ಲೇ ಉತ್ತರ ದೊರಕಲಿದೆ.

ಬಾಬಾ ಅವರ ಪೆಟ್ಟಿಗೆಯಲ್ಲಿದ್ದ ವಸ್ತುಗಳನ್ನು ದಿಲ್ಲಿಯಿಂದ ಫೈಜಾಬಾದ್‌ಗೆ ತರಲಾಗಿದ್ದು ಜಿಲ್ಲಾಧಿಕಾರಿಗಳ ಸಮ್ಮುಖದಲ್ಲಿ ಅವುಗಳನ್ನು ಪರಿಶೀಲನೆ ನಡೆಸಲಾಗುತ್ತಿದೆ.

ಮೂಲಗಳ ಪ್ರಕಾರ ಒಟ್ಟು 1046 ವಸ್ತುಗಳನ್ನು ಈಗಾಗಲೇ ಪರಿಶೀಲಿಸಲಾಗಿದ್ದು ಅದನ್ನುತ ವಿಧಿವಿಜ್ಞಾನ ತಜ್ಞರ ತಂಡಕ್ಕೆ ಇನ್ನು ಮೂರು ದಿನಗಳಲ್ಲಿ ಹಸ್ತಾಂತರ ಮಾಡಲಾಗುತ್ತಿದೆ.

2001-06ರವರೆಗೆ ಜಸ್ಟೀಸ್ ಎಂ ಕೆ ಮುಖರ್ಜಿ ಅವರ ನೇತೃತ್ವದ ಆಯೋಗವು ಈ ವಸ್ತುಗಳನ್ನು ಪರಿಶೀಲಿಸಿ ಬಾಬಾ ಹಾಗೂ ಬೋಸ್ ಅವರ ನಡುವೆ ಸಾಮ್ಯತೆ ಇರುವುದನ್ನು ಗುರುತಿಸಿತ್ತು. ಆದರೆ, ಬಾಬಾ ಅವರೇ ಬೋಸ್ ಹೌದೋ ಅಲ್ಲವೋ ಎಂಬುದನ್ನು ಖಚಿತಪಡಿಸಿರಲಿಲ್ಲ.

ಅಯೋಧ್ಯೆಯ ರಾಮ ಕಥಾ ಸಂಗ್ರಹಾಲಯದಲ್ಲಿದ್ದ ಗುಮ್ನಾಮಿ ಬಾಬಾ ಅವರ ಪೆಟ್ಟಿಗೆಯನ್ನು ತಜ್ಞ ತಂಡ ಪರಿಶೀಲಿಸಬೇಕೆಂದು ಇತ್ತೀಚೆಗಷ್ಟೇ ಅಲಹಾಬಾದ್ ನ್ಯಾಯಾಲಯವು ಆದೇಶಿಸಿತ್ತು. ಅದರಂತೆ ಸರಕಾರ ರಚಿಸಿದ್ದ ಸಮಿತಿಯು ವಸ್ತುಗಳನ್ನು ತಜ್ಞರ ತಂಡಕ್ಕೆ ಹಸ್ತಾಂತರಿಸುತ್ತಿದೆ.

ಪೆಟ್ಟಿಗೆಯಲ್ಲಿ ಏನೇನಿದೆ?

ಜರ್ಮನಿ ನಿರ್ಮಿತ ದೂರ ದರ್ಶಕ, ಮ್ಯೂಸಿಕ್ ರೆಕಾರ್ಡರ್, ಗ್ರಾಮಾ ಫೋನ್, ಇಂಗ್ಲೆಡ್ ನಿರ್ಮಿತ ಟೈಪ್‌ರೈಟರ್, ಜಪಾನ್‌ನ ಸಾರ್ಸರ್‌ಗಳು, ಸ್ವೀಡನ್‌ನ ಒಲೆ, ಇಂಗ್ಲಿಷರ ಕಾಲದ ಸಿಗರೇಟುಗಳು, ವಿದೇಶಿ ಕಾಲುಚೀಲಗಳು ಮತ್ತು ಶರ್ಟ್‌ಗಳು, ಭಾರತೀಯ ಸ್ವಾತಂತ್ರ್ಯ ಸಂಗ್ರಾಮ ಕಾಲದ 350 ಪುಸ್ತಕಗಳು, 2,5 ಮತ್ತು 10 ರೂ ನೋಟುಗಳು, ಚಿನ್ನದ ಉಂಗುರ, ಖಾಕಿ ಸಮವಸ್ತ್ರ, ಕೇಸರಿ ಬಣ್ಣದ ಶಾಲು, ಹೋಮಿಯೊಪತಿ ಹಾಗೂ ಆಯುರ್ವೇದ ಔಷಧಗಳು, ಬೋಸ್ ಕುಟುಂಬದಿಂದ ಬಂದಿದ್ದ ಕೆಲವು ಪತ್ರಗಳು.