ಹಫೀಜ್‌ ರಿಲೀಸ್‌; ಮೋದಿ ಅಪ್ಪುಗೆ ರಾಜನೀತಿ ವಿಫಲ: ರಾಹುಲ್‌

ಹೊಸದಿಲ್ಲಿ: ಮುಂಬಯಿ ದಾಳಿ ರುವಾರಿ ಹಫೀಜ್‌ ಸಯೀದ್‌ ಬಿಡುಗಡೆ ಬಳಿಕ ಪ್ರಧಾನಿ ನರೇಂದ್ರ ಮೋದಿ ವಿರುದ್ಧ ಕಿಡಿಕಾರಿರುವ ರಾಹುಲ್‌ ಗಾಂಧಿ, ಮೋದಿಯವರ ಅಪ್ಪುಗೆ ತಂತ್ರ ವಿಫಲವಾಗಿದ್ದು ಶೀಘ್ರದಲ್ಲೇ ಮತ್ತೊಂದು ಬಾರಿ ಅಮೆರಿಕ ಅಧ್ಯಕ್ಷರನ್ನು ಅಪ್ಪಿಕೊಳ್ಳಬೇಕಿದೆ ಎಂದು ಟ್ವೀಟ್‌ ಮಾಡಿದ್ದಾರೆ.

ಭ್ರಷ್ಟಾಚಾರ ಆರೋಪದಡಿಕಳೆದ 11 ತಿಂಗಳು ಗೃಹಬಂಧನದಲ್ಲಿದ್ದ ಜಮಾತ್‌ ಉದ್‌ ದವಾ ಮುಖ್ಯಸ್ಥ ಹಫೀಜ್‌ ಇತ್ತೀಚೆಗಷ್ಟೇ ಬಿಡುಗಡೆಯಾಗಿದ್ದ. ಈ ಕುರಿತು ಮೋದಿಯನ್ನು ಲೇವಡಿ ಮಾಡಿದ ಕಾಂಗ್ರೆಸ್‌ ಉಪಾಧ್ಯಕ್ಷ, 'ನರೇಂದ್ರ ಭಾಯ್‌... ಮಾತುಕತೆ ಫಲಕೊಡಲಿಲ್ಲ. ಟೆರರ್‌ ಮಾಸ್ಟರ್‌ ಮೈಂಡ್‌ ಬಿಡುಗಡೆಯಾಗಿದ್ದಾನೆ, ಅಲ್ಲದೇ ಉಗ್ರ ಸಂಘಟನೆ ಎಲ್‌ಇಟಿಗೆ ಫಂಡ್‌ ಒದಗಿಸಿರುವುದನ್ನು ಅಮೆರಿಕ ಅಧ್ಯಕ್ಷ ಟ್ರಂಪ್‌ ಇತ್ತೀಚೆಗಷ್ಟೇ ಅಲ್ಲಗೆಳೆದಿದ್ದಾರೆ. ಮೋದಿ-ಟ್ರಂಪ್‌ ನಡುವಿನ ಅಪ್ಪುಗೆ ರಾಜನೀತಿ ವಿಫಲವಾಗಿದೆ. ಶೀಘ್ರದಲ್ಲೇ ಮತ್ತುಷ್ಟು ಅಪ್ಪುಗೆಗಳನ್ನು ಮಾಡಬೇಕಿದೆ ಎಂದು' ಲೇವಡಿ ಮಾಡಿ ಟ್ವೀಟ್‌ ಮಾಡಿದ್ದಾರೆ.



ಇದಕ್ಕೂ ಹಿಂದೆ ಡೊನಾಲ್ಡ್‌ ಟ್ರಂಪ್‌ ಟ್ವೀಟ್‌ ಮಾಡಿ, ಪಾಕಿಸ್ತಾನ ಮತ್ತು ಅಲ್ಲಿನ ರಾಜಕೀಯ ನಾಯಕರೊಂದಿಗೆ ಉತ್ತಮ ಸಂಬಂಧ ಹೊಂದಲು ನಾವು ಶ್ರಮಿಸುತ್ತಿರುವುದಾಗಿ ಹೇಳಿದ್ದರು.

ಭ್ರಷ್ಟಾಚಾರ ಆರೋಪದಡಿ ಬಂಧಿಸಲ್ಪಟ್ಟಿದ್ದ ಹಫೀಜ್ ವಿರುದ್ಧ ಸಾಕ್ಷ್ಯಾಧಾರ ಒದಗಿಸುವಲ್ಲಿ ಪಾಕ್‌ ಸರಕಾರ ವಿಫಲವಾಗಿದ್ದ ಹಿನ್ನೆಲೆಯಲ್ಲಿ ನ್ಯಾಯಾಲಯ ಆತನನ್ನು ಬಿಡುಗಡೆ ಮಾಡುವಂತೆ ಆದೇಶಿಸಿತ್ತು. ಆದರೆ ಆತನ ಬಿಡುಗಡೆಯನ್ನು ವಿಶ್ವದ ಪ್ರಮುಖರು ವಿರೋಧಿಸಿದ್ದರು.