ಹಾರ್ಲೆ ಡೇವಿಡ್‌ಸನ್‌ ಬೈಕ್‌ನಲ್ಲಿ ಟೆಸ್ಟ್‌ ರೈಡ್‌ಗಾಗಿ ಹೋದವ ಪರಾರಿ

ಗುರುಗ್ರಾಮ: ಟೆಸ್ಟ್‌ಗಾಗಿ ಬೈಕ್‌ ಪಡೆದ ವ್ಯಕ್ತಿಯೋರ್ವ ವಾಪಸ್‌ ತಿರುಗಿ ಬಂದಿಲ್ಲ.

ಅದೂ ಸಹ 50-60 ಸಾವಿರದ ಮಾಮೂಲಿ ಬೈಕ್‌ ಅಲ್ಲ. ಬರೋಬ್ಬರಿ 10 ಲಕ್ಷ ರೂ. ಬೆಲೆಯ ಹಾರ್ಲೆ ಡೇವಿಡ್ಸನ್ ಬೈಕ್‌ ಅನ್ನು ಎಗರಿಸಿದ್ದಾನೆ.

ಪಲಾಂ ವಿಹಾರ್‌ ಬಳಿಕ ಅಜಯ್‌ ಸಿಂಗ್‌ ಜೂ. 13ರಂದು ತಮ್ಮ ಹಾರ್ಲೆ ಡೇವಿಡ್ಸನ್ ಬೈಕ್‌ ಮಾರಾಟಕ್ಕಿದೆ ಎಂದು ಆನ್‌ಲೈನ್‌ನಲ್ಲಿ ಪೋಸ್ಟ್‌ ಮಾಡಿದ್ದರು. ಈ ಬಗ್ಗೆ ರಾಹುಲ್‌ ನಗರ್‌ (30) ಎಂಬವರು ಸಂಪರ್ಕಿಸಿ, 7 ಸಾವಿರ ಮುಂಗಡ ಹಣವನ್ನೂ ನೀಡಿ, ಟೆಸ್ಟ್‌ ರೈಡ್‌ಗೆಂದು ಬೈಕ್‌ ತೆಗೆದುಕೊಂಡು ಹೋಗಿ, ಯಾಮಾರಿಸಿದ್ದಾನೆ.

ಆನ್‌ಲೈನ್‌ ಮೂಲಕ ಬೈಕ್‌ ಆಯ್ದುಕೊಂಡ ಆರೋಪಿ, ಖರೀದಿಸಲು ಆಸಕ್ತಿ ತೋರಿಸಿದ. ನಂತರ 7 ಸಾವಿರ ರೂ. ಮುಂಗಡ ಹಣವನ್ನು ಮಾಲಿಕನಿಗೆ ನೀಡಿದ್ದಾನೆ. ಬಳಿಕ ಬೈಕ್‌ ಪರಿಶೀಲಿಸಲು ಟೆಸ್ಟ್‌ ರೈಡ್‌ ಹೋಗಬೇಕೆಂದಿದ್ದಾನೆ. ಇದಕ್ಕೆ ಒಪ್ಪಿದ ಮಾಲಿಕ ಬೈಕ್‌ ಕೀ ಕೊಟ್ಟು, ಓಡಿಸುವಂತೆ ಹೇಳಿದ್ದಾನೆ. ಬೈಕ್‌ ತೆಗೆದುಕೊಂಡು ಹೋದವನು, ಮತ್ತೆ ಬರಲೇ ಇಲ್ಲ.

ಆಗ್ರಾದಲ್ಲಿ ಮಾರ್ಬಲ್‌ ವ್ಯವಹಾರ ನಡೆಸುತ್ತಿರುವುದಾಗಿ ರಾಹುಲ್‌ ತನ್ನನ್ನು ಪರಿಚಯ ಮಾಡಿಸಿಕೊಂಡಿದ್ದು, ಕಲ್ಲುಗಳನ್ನು ಕೆನಡಕ್ಕೆ ಕಳುಹಿಸುತ್ತಿರುವುದಾಗಿ ಹೇಳಿದ್ದರು. ಅಲ್ಲದೆ ಆಂಗ್ಲ ಭಾಷಾ ಜ್ಞಾನವೂ ಚೆನ್ನಾಗಿತ್ತು. ಬೈಕ್‌ಗಳ ಬಗ್ಗೆ ಸಾಕಷ್ಟು ತಿಳಿದುಕೊಂಡಿದ್ದ ಅವರು, ಈ ವಿಚಾರದಲ್ಲಿ ಸಾಕಷ್ಟು ಮಾತನಾಡಿದರು. ಹೀಗಾಗಿ ಅವರನ್ನು ನಂಬಿದ್ದಾಗಿ ಅಜಯ್‌ ಸಿಂಗ್‌ ಪೊಲೀಸರ ಬಳಿ ಹೇಳಿದ್ದಾರೆ.

7 ಲಕ್ಷ ರೂ. ಗೆ ವ್ಯವಹಾರ ಅಂತಿಮ ಆಗಿತ್ತು. ಆದರೆ ಟೆಸ್ಟ್‌ ರೈಡ್‌ಗೆಂದು ಬೈಕ್‌ನಲ್ಲಿ ಹೋದವರು, ಮತ್ತೆ ಬಂದಿಲ್ಲ. ಈ ಸಂಬಂಧ ಸಿಸಿಟಿವಿ ವೀಡಿಯೋ ದಾಖಲೆಗಳನ್ನು ಸಂಗ್ರಹಿಸಲಾಗಿದ್ದು, ತನಿಖೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.