ಜಾಟ್ ಪ್ರತಿಭಟನೆ ವೇಳೆ ಗ್ಯಾಂಗ್‌ರೇಪ್?

ಕನಿಷ್ಠ 10 ಮಹಿಳೆಯರ ಮೇಲೆ ಸಾಮೂಹಿಕ ಅತ್ಯಾಚಾರ/ ರಾಕ್ಷಸರಂತೆ ವರ್ತಿಸಿದರೇ ಪ್ರತಿಭಟನಾಕಾರರು/ ತನಿಖೆಗೆ ಆಯೋಗ ರಚಿಸಿದ ಸರಕಾರ
ಚಂಡೀಗಢ: ಒಬಿಸಿ ಮೀಸಲಿಗೆ ಆಗ್ರಹಿಸಿ ಜಾಟ್ ಸಮುದಾಯದವರು ಇತ್ತೀಚೆಗೆ ಹರಿಯಾಣದಲ್ಲಿ ನಡೆಸಿದ ಹಿಂಸಾತ್ಮಕ ಪ್ರತಿಭಟನೆ ವೇಳೆ ಹತ್ತಾರು ಮಹಿಳೆಯರ ಮೇಲೆ ಸಾಮೂಹಿಕ ಅತ್ಯಾಚಾರ ನಡೆದಿದೆ ಎಂದು ಆರೋಪ ಕೇಳಿಬಂದಿದೆ. ಈ ಕುರಿತ ತನಿಖೆಗೆ ಹರಿಯಾಣ ಸರಕಾರವು ಮೂವರು ಮಹಿಳಾ ಸದಸ್ಯರ ತನಿಖಾ ಆಯೋಗ ರಚಿಸಿದೆ.

ಸೋನಿಪತ್‌ನ ಮರ್ಥಾಲ್‌ನಲ್ಲಿ ದಿಲ್ಲಿ-ಅಂಬಾಲಾ ಹೆದ್ದಾರಿಯಲ್ಲಿ ಫೆ.22ರಂದು ನುಸುಕಿನ ವೇಳೆ ಗ್ಯಾಂಗ್‌ರೇಪ್ ನಡೆದಿದೆ ಎನ್ನಲಾಗಿದೆ. ಪ್ರತಿಭಟನೆ ಮಧ್ಯೆ ಸಿಲುಕಿಕೊಂಡಿದ್ದ ಕಾರುಗಳಲ್ಲಿದ್ದ ಕನಿಷ್ಠ 10 ಮಹಿಳೆಯರನ್ನು ಸುಮಾರು 40 ಮಂದಿ ದುಷ್ಕರ್ಮಿಗಳ ತಂಡ ಸಮೀಪದ ಹೊಲಗಳಿಗೆ ಎಳೆದೊಯ್ದು ಗ್ಯಾಂಗ್‌ರೇಪ್ ನಡೆಸಿದೆ ಎಂದು ಹೇಳಲಾಗುತ್ತಿದೆ.

ಘಟನೆ ನಡೆಯಿತು ಎನ್ನಲಾದ ಸ್ಥಳಗಳಲ್ಲಿ ಮಹಿಳೆಯರ ವಸ್ತ್ರಗಳು ಮತ್ತು ಒಳ ಉಡುಪುಗಳು ಚೆಲ್ಲಾಪಿಲ್ಲಿಯಾಗಿ ಬಿದ್ದಿರುವುದು ಗ್ಯಾಂಗ್‌ರೇಪ್ ಆರೋಪಕ್ಕೆ ಪುಷ್ಠಿ ನೀಡುವಂತಿವೆ.

ಈ ಕುರಿತ ತನಿಖೆಗೆ ಪೊಲೀಸ್ ಉಪ ಪ್ರಧಾನ ನಿರ್ದೇಶಕಿ ರಾಜಶ್ರೀ ಸಿಂಗ್ ನೇತೃತ್ವದಲ್ಲಿ ಮೂವರು ಮಹಿಳಾ ಸದಸ್ಯರ ತನಿಖಾ ತಂಡ ರಚಿಸಲಾಗಿದೆ. ಡಿಎಸ್‌ಪಿಗಳಾದ ಭಾರ್ತಿ ದಬಾಸ್ ಮತ್ತು ಸುರೀಂದರ್ ಕೌರ್ ತಂಡದಲ್ಲಿದ್ದಾರೆ.

ಮಾಹಿತಿ ನೀಡಲು ಕೋರಿಕೆ

ಗ್ಯಾಂಗ್‌ರೇಪ್ ಬಗ್ಗೆ ನಿಖರ ಮಾಹಿತಿ ಇದ್ದವರು ಮತ್ತು ಸಂತ್ರಸ್ತರು ತನಿಖಾ ತಂಡಕ್ಕೆ ಮಾಹಿತಿ ಒದಗಿಸುವಂತೆ ಆಡಳಿತ ಮನವಿ ಮಾಡಿಕೊಂಡಿದೆ. ಮಾಹಿತಿದಾರರ ರಹಸ್ಯ ಕಾಪಾಡಿಕೊಳ್ಳುವುದರ ಜತೆಗೆ ಅಗತ್ಯಬಿದ್ದರೆ ಅವರಿಗೆ ಸೂಕ್ತ ರಕ್ಷಣೆ ಒದಗಿಸುವುದಾಗಿ ಹರಿಯಾಣ ಹೆಚ್ಚುವರಿ ಮುಖ್ಯ ಕಾರ‌್ಯದರ್ಶಿ ಪಿ.ಕೆ.ದಾಸ್ ತಿಳಿಸಿದ್ದಾರೆ.