ಹರಿಯಾಣ ಗ್ರಾಮಕ್ಕೆ ಟ್ರಂಪ್‌ ಹೆಸರು

ಗುರುಗ್ರಾಮ್‌: ಹರಿಯಾಣದ ಮೇವಟ್‌ನಲ್ಲಿ ಬಯಲು ಶೌಚ ಮುಕ್ತ ಗ್ರಾಮಕ್ಕೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಹೆಸರಿಡಲು ನಿರ್ಧರಿಸಲಾಗಿದೆ.

ಸುಲಭ್ ಇಂಟರ್ ನ್ಯಾಷನಲ್‌ ಸ್ಥಾಪಕ ಹಾಗೂ ಮುಖ್ಯಸ್ಥ ಬಿಂದೇಶ್ವರ್ ಪಾಠಕ್ ಈ ವಿಷಯ ಪ್ರಕಟಿಸಿದ್ದಾರೆ.

ಟ್ರಂಪ್‌ ಹೆಸರಿಡುವ ಮೂಲಕ ದೇಶದ ಸ್ವಚ್ಛಾತಾ ಅಭಿಯಾನವನ್ನು ವಿಶ್ವದ ಗಮನ ತರಬಹುದು ಎಂಬುದು ಸುಲಭ್‌ ವಾದ. ಬಯಲು ಶೌಚ ಮುಕ್ತಗೊಳಿಸುವ ನಿಟ್ಟಿನಲ್ಲಿ ಸಂಸ್ಥೆ ಕೆಲ ಗ್ರಾಮಗಳಲ್ಲಿ ಯೋಜನೆ ಕೈಗೊಂಡಿದೆ.

'ಮೇವಟ್‌ ಪ್ರದೇಶವನ್ನು ಯೋಜನೆಗೆ ಆಯ್ಕೆ ಮಾಡಿಕೊಂಡಿದ್ದೇವೆ. ಈ ಪೈಕಿ ಒಂದು ಗ್ರಾಮಕ್ಕೆ ಟ್ರಂಪ್‌ ಹೆಸರಿಡಲಾಗುವುದು,'ಎಂದು ಅಮೆರಿಕದಲ್ಲಿರುವ ಪಾಠಕ್‌ ಹೇಳಿದ್ದಾರೆ. ದೇಶಕ್ಕೆ ವಾಪಸಾದ ನಂತರ ಮೇವಟ್‌ ಜನರನ್ನು ಅವರು ಭೇಟಿಯಾಗಲಿದ್ದಾರೆ.

'ದೇಶವನ್ನು ಬಯಲು ಶೌಚ ಮುಕ್ತಗೊಳಿಸಲು ಸರಕಾರ ಪ್ರಯತ್ನಿಸುತ್ತಿದೆ. ನಮ್ಮ ಸಂಸ್ಥೆಯೂ ಈ ನಿಟ್ಟಿನಲ್ಲಿ ಕೆಲಸ ಮಾಡುತ್ತಿದೆ. ಈ ಯೋಜನೆಗೆ ಇಡೀ ವಿಶ್ವದ ಜನ ಕೈ ಜೋಡಿಸಬೇಕು. ಅಭಿಯಾನದ ಭಾಗವಾಗಿ ಕಾರ್ಪೊರೇಟ್‌ ಸಂಸ್ಥೆಗಳು ಗ್ರಾಮಗಳನ್ನು ದತ್ತು ತೆಗೆದುಕೊಳ್ಳಬಹುದು,'ಎಂದು ವಾಷಿಂಗ್ಟನ್‌ ಡಿಸಿಯಲ್ಲಿ ಆಯೋಜಿಸಿದ್ದ ಸಮುದಾಯ ಕಾರ್ಯಕ್ರಮದಲ್ಲಿ ಪಾಠಕ್‌ ಹೇಳಿದ್ದಾರೆ.