ಪಾಕ್‌ನ ಎಫ್‌ 16 ಯುದ್ಧ ವಿಮಾನ ಹೊಡೆದುರುಳಿಸಿದ ರೇಡಾರ್‌ ಚಿತ್ರ ಬಿಡುಗಡೆ ಮಾಡಿದ ಭಾರತ

ಹೊಸದಿಲ್ಲಿ: ದೇಶದ ವಾಯುಗಡಿ ಪ್ರವೇಶಿಸಿದ್ದ ಪಾಕಿಸ್ತಾನದ ಎಫ್‌-16 ಯುದ್ಧ ವಿಮಾನವನ್ನು ಭಾರತ ಹೊಡೆದುರುಳಿಸಿದ್ದರೂ ತನ್ನ ವಿಮಾನ ದಾಳಿಗೆ ತುತ್ತಾಗಿಲ್ಲ ಎಂದೇ ಹೇಳಿಕೊಂಡು ಬಂದಿದ್ದ ಪಾಕಿಸ್ತಾನಕ್ಕೆ ಭಾರತೀಯ ವಾಯುಪಡೆ ಸೋಮವಾರ ರೇಡಾರ್‌ ಚಿತ್ರಗಳನ್ನು ಬಿಡುಗಡೆ ಮಾಡುವ ಮೂಲಕ ಶಾಕ್‌ ನೀಡಿದೆ.

ಅಲ್ಲದೇ ಪಾಕ್‌ ಬತ್ತಳಿಕೆಯಲ್ಲಿರುವ ಎಫ್‌-16 ಫೈಟರ್‌ ಜೆಟ್‌ಗಳಲ್ಲಿ ಒಂದನ್ನೂ ಅದು ಕಳೆದುಕೊಂಡಿಲ್ಲ ಎಂದು ಹೇಳಿದ್ದ ಅಮೆರಿಕಕ್ಕೂ ತಕ್ಕ ಪುರಾವೆ ಒದಗಿಸಿದೆ.

ಪುಲ್ವಾಮಾ ಉಗ್ರ ದಾಳಿಗೆ ಪ್ರತಿಯಾಗಿ ಭಾರತೀಯ ವಾಯುಪಡೆ ಕಳೆದ ಫೆ.26ರಂದು ಪಾಕಿಸ್ತಾನದ ಬಾಲಾಕೋಟ್‌ ಮೇಲೆ ವಾಯುದಾಳಿ ನಡೆಸಿ ಜೈಷೆ ಉಗ್ರರ ಸಂಹಾರ ನಡೆಸಿತ್ತು. ಇದರ ಮರುದಿನವೇ ಭಾರತದ ಮೇಲೆ ದಾಳಿ ನಡೆಸಲು ಬಂದಿದ್ದ ಪಾಕಿಸ್ತಾನದ ಎಫ್‌-16 ಯುದ್ಧ ವಿಮಾನಗಳನ್ನು ಐಎಎಫ್‌ ಮಿಗ್‌-21 ಬೈಸನ್‌ ಫೈಟರ್‌ ಜೆಟ್‌ಗಳ ಮೂಲಕ ಹೋರಾಟ ನಡೆಸಿ ಹಿಮ್ಮೆಟ್ಟಿಸಿತ್ತು.

ಈ ವೇಳೆ ಪಾಕ್‌ನ ಒಂದು ವಿಮಾನವನ್ನು ಹೊಡೆದುರುಳಿಸಿತ್ತು. ಆದರೆ ಪಾಕ್‌ ಮಾತ್ರ ಈ ಕಾದಾಟದಲ್ಲಿ ತಾನು ವಿಮಾನ ಕಳೆದುಕೊಂಡಿಲ್ಲ ಎಂದು ಹೇಳುತ್ತಲೇ ಬಂದಿತ್ತು.


ಫೆ.27ರ ದಾಳಿಗೆ ಪುರಾವೆಯಾಗಿ ಏರ್‌ ವೈಸ್‌ ಮಾರ್ಷಲ್‌ ಆರ್‌.ಜಿ.ಕೆ ಕಪೂರ್‌ ಅವರು ಸೋಮವಾರ ಸುದ್ದಿಗೋಷ್ಠಿ ನಡೆಸಿ 'ಅವಾಕ್ಸ್‌' ರೇಡಾರ್‌ ಸೆರೆಹಿಡಿದ ಚಿತ್ರಗಳನ್ನು ಬಿಡುಗಡೆ ಮಾಡಿದರು.

ವಿಂಗ್‌ ಕಮಾಂಡರ್‌ ಅಭಿನಂದನ್‌ ವರ್ಧಮಾನ್‌ ಅವರಿದ್ದ ಮಿಗ್‌-21 ಬೈಸನ್‌ ವಿಮಾನ ಎಫ್‌-16 ವಿಮಾನವೊಂದನ್ನು ನೌಶೇರಾದ ವಾಯುಗಡಿಯಲ್ಲಿ ಹೊಡೆದುರುಳಿಸಿದ್ದು ರೇಡಾರ್‌ ಸೆರೆ ಹಿಡಿದ ಚಿತ್ರದಲ್ಲಿ ಸ್ಪಷ್ಟವಾಗಿದೆ. ಆದರೆ ಭದ್ರತಾ ಸೂಕ್ಷ್ಮತೆ ಹಿನ್ನೆಲೆಯಲ್ಲಿ ಈ ಬಗ್ಗೆ ಹೆಚ್ಚಿನ ವಿವರಗಳನ್ನು ಬಹಿರಂಗಪಡಿಸುವುದಿಲ್ಲ ಎಂದು ಹೇಳಿದರು.

ಎಣಿಕೆ ನಡೆಸಿಲ್ಲ: ಕೆಲವು ದಿನಗಳ ಹಿಂದಷ್ಟೇ ಅಮೆರಿಕದ ಅಧಿಕಾರಿಗಳು ಪಾಕ್‌ ಸೇನಾ ಬತ್ತಳಿಕೆಯಲ್ಲಿರುವ ಎಫ್‌-16 ವಿಮಾನಗಳ ಎಣಿಕೆ ಮಾಡಿದ್ದು, ಅದು ಒಂದನ್ನೂ ಕಳೆದುಕೊಂಡಿಲ್ಲ ಎಂದು ಹೇಳಿರುವ ಸಂಗತಿ ಮುಂದಿಟ್ಟುಕೊಂಡು ಅಮೆರಿಕದ ನಿಯತಕಾಲಿಕವೊಂದು ವರದಿ ಮಾಡಿತ್ತು.

ಈ ಎಣಿಕೆಯ ಬಗ್ಗೆ ತನಗೆ ಗೊತ್ತಿಲ್ಲ, ಅದೊಂದು ಕಟ್ಟುಕಥೆ ಇರಬಹುದು ಎಂದು ಅಮೆರಿಕದ ರಕ್ಷಣಾ ಸಚಿವಾಲಯ ಪ್ರತಿಕ್ರಿಯಿಸಿದೆ.