ಠೇವಣಿದಾರರಿಗೆ ವಂಚನೆ: ಎಂಇಪಿ ಮುಖ್ಯಸ್ಥೆ ನೌಹೇರಾ ಶೇಖ್ ಬಂಧನ

ಹೈದರಾಬಾದ್: ಕರ್ನಾಟಕದಲ್ಲಿ ಕಳೆದ ವಿಧಾನಸಭಾ ಚುನಾವಣೆ ವೇಳೆ ಮಹಿಳಾ ಸ್ವಾವಲಂಬನೆ ಹೆಸರಿನಲ್ಲಿ ಹಲವು ಕ್ಷೇತ್ರಗಳಲ್ಲಿ ಅಭ್ಯರ್ಥಿಗಳನ್ನು ಕಣಕ್ಕೆ ಇಳಿಸಿದ್ದ ಎಂಇಪಿ ಪಕ್ಷದ ಮುಖ್ಯಸ್ಥೆ ನೌಹೇರಾ ಶೇಖ್‌ ಅವರನ್ನು ಹೈದರಾಬಾದ್ ಪೊಲೀಸರು ಬಂಧಿಸಿದ್ದಾರೆ.

ಹೀರಾ ಸಮೂಹ ಸಂಸ್ಥೆ ಹೆಸರಿನಲ್ಲಿ ಲಾಭದಾಯಕ ಚಿನ್ನದ ಯೋಜನೆಗಳನ್ನು ಪ್ರಕಟಿಸಿ ಹೆಚ್ಚಿನ ಬಡ್ಡಿ ನೀಡುವ ಆಮಿಷ ಒಡ್ಡುತ್ತಿದ್ದ ಅವರು, ಠೇವಣಿ ಪಡೆದು ಹಣ ಮರುಪಾವತಿಸುತ್ತಿರಲಿಲ್ಲ. ಈ ಕುರಿತು ಹಲವರು ದೂರು ನೀಡಿದ್ದರು. ಹೀರಾ ಸಮೂಹ ಸಂಸ್ಥೆ 15 ಬೇರೆ ಬೇರೆ ಹೆಸರಿನಲ್ಲಿ ದೇಶದ ವಿವಿಧ ರಾಜ್ಯಗಳಲ್ಲಿ ಬೇರೆ ಬೇರೆ ಶಾಖೆಗಳನ್ನು ಹೊಂದಿದೆ. ಶೇಖ್‌ ಅವರನ್ನು ಹೊಸದಿಲ್ಲಿಯಲ್ಲಿ ಬಂಧಿಸಲಾಗಿದ್ದು, ಮಂಗಳವಾರ ಹೈದರಾಬಾದ್‌ಗೆ ಕರೆತರಲಾಗಿದೆ.