ದಿಟ್ಟ, ಧೀಮಂತ ರಾಜಕಾರಣಿ ಪರಿಕ್ಕರ್ ಬಗೆಗಿನ 10 ಮಹತ್ವದ ಸಂಗತಿಗಳು

ಹೊಸದಿಲ್ಲಿ: ಗೋವಾ ಮುಖ್ಯಮಂತ್ರಿ ಮತ್ತು ಮಾಜಿ ರಕ್ಷಣಾ ಸಚಿವ ಮನೋಹರ ಪರಿಕ್ಕರ್ ದೀರ್ಘಕಾಲಿಕ ಅನಾರೋಗ್ಯದಿಂದಾಗಿ ಭಾನುವಾರ ನಿಧನರಾದರು.

ಪ್ಯಾಂಕ್ರಿಯಾಟಿಕ್ ಕ್ಯಾನ್ಸರ್‌‌ನಿಂದ ಬಳಲುತ್ತಿದ್ದ 63 ವರ್ಷದ ಪರಿಕ್ಕರ್ ಕಳೆದ ಒಂದು ವರ್ಷದಿಂದ ಗೋವಾ, ಮುಂಬಯಿ, ದಿಲ್ಲಿ ಮತ್ತು ಅಮೆರಿಕಾ ಸೇರಿದಂತೆ ಹಲವಾರು ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆದಿದ್ದರು. ಶನಿವಾರ ರಾತ್ರಿ ಅವರ ಆರೋಗ್ಯ ಬಿಗಡಾಯಿಸಿದ ಬಗ್ಗೆ ಸುದ್ದಿ ಬಂದಿತ್ತು ಮತ್ತು ಭಾನುವಾರ ಸಂಜೆ ಅವರು ಇಹಲೋಕ ತ್ಯಜಿಸಿದರು.

1. ಡಿಸೆಂಬರ್ 12, 1955ರಂದು ಜನಿಸಿದ್ದ ಪರಿಕ್ಕರ್ ಪೂರ್ಣ ಹೆಸರು ಮನೋಹರ ಗೋಪಾಲಕೃಷ್ಣ ಪ್ರಭು ಪರಿಕ್ಕರ್. ಐಐಟಿ ಮುಂಬಯಿಯಿಂದ ಮೆಟಾಲರ್ಜಿಕಲ್ ಇಂಜಿನಿಯರಿಂಗ್ ಪದವಿ ಪಡೆದಿದ್ದರು. 80ರ ದಶಕದ ಆರಂಭದಲ್ಲಿ ತಮ್ಮ 26ನೇ ವಯಸ್ಸಿನಲ್ಲಿಯೇ ಅವರು ಮಾಪ್ಸಾ ಘಟಕದ ಸಂಘಚಾಲಕರಾದರು.

2. ಕಾಲೇಜಿನ ಅಂತಿಮ ವರ್ಷದಲ್ಲಿರುವಾಗಲೇ ಅವರು ರಾಷ್ಟ್ರೀಯ ಸ್ವಯಂ ಸೇವರ ಸಂಘದ ಮುಖ್ಯ ಪ್ರಶಿಕ್ಷಕರಾಗಿದ್ದರು.

3. 1979ರಲ್ಲಿ ಗೋವಾಕ್ಕೆ ಹಿಂತಿರುಗಿದ ಅವರು ಖಾಸಗಿ ಉದ್ಯಮ ಸ್ಥಾಪಿಸಲು ಯೋಚಿಸಿದರು. ಅದೇ ಸಂದರ್ಭದಲ್ಲಿ ಅವರು ಮೇಧಾ ಎಂಬುವವರ ಜತೆ ಪ್ರೇಮ ವಿವಾಹವಾದರು.

4. ರಾಮಜನ್ಮಭೂಮಿ (1985 ಮತ್ತು 1991) ಸೇರಿದಂತೆ ಆರ್‌ಎಸ್ಎಸ್‌ನ ಹಲವು ಆಂದೋಲನಗಳಲ್ಲಿ ಅವರು ಪಾಲ್ಗೊಂಡರು. 1994- 99ರ ಅವಧಿಯಲ್ಲಿ ಆರ್‌ಎಸ್ಎಸ್ ಅವರನ್ನು ಬಿಜೆಪಿಗೆ ಸೇರ್ಪಡೆ ಮಾಡಿತು.

5. 1994ರಲ್ಲಿ ಮೊದಲ ಬಾರಿಗೆ ಶಾಸಕರಾಗಿ ಆಯ್ಕೆಯಾಗುವ ಮೂಲಕ ಸಕ್ರಿಯ ರಾಜಕಾರಣಕ್ಕೆ ಇಳಿದ ಅವರು ನವೆಂಬರ್ 1999 ಜೂನ್ - ನವೆಂಬರ್‌ನಲ್ಲಿ ಮೊದಲ ಬಾರಿಗೆ ವಿರೋಧ ಪಕ್ಷದ ನಾಯಕರಾದರು.

6. 2000ರಲ್ಲಿ ಮುಖ್ಯಮಂತ್ರಿ ಆಗುವುದಕ್ಕಿಂತ ಕೆಲವು ದಿನಗಳ ಮೊದಲು ಅವರ ಪತ್ನಿ ಕ್ಯಾನ್ಸರ್‌ನಿಂದ ಸಾವನ್ನಪ್ಪಿದರು. ಅಕ್ಟೋಬರ್ 24, 2000ದಿಂದ ಫೆಬ್ರವರಿ 27 2002ರವರೆಗೆ ಗೋವಾ ಮುಖ್ಯಮಂತ್ರಿಯಾಗಿ ಕಾರ್ಯಭಾರ ಸಂಭಾಳಿಸಿದ ಅವರು ಜೂನ್ 2002ರಲ್ಲಿ ಮರು ಆಯ್ಕೆಯಾಗಿ ಮತ್ತೆ ಮುಖ್ಯಮಂತ್ರಿಯಾದರು (2005ರವರೆಗೆ).

7. ಮಾರ್ಚ್ 2012ರಲ್ಲಿ ಮತ್ತೆ ಗೋವಾ ರಾಜ್ಯಭಾರ ಕೈಗೆತ್ತಿಕೊಂಡರು. ದೇಶದ ರಕ್ಷಣಾ ಸಚಿವ ಸ್ಥಾನ ಸಂಭಾಳಿಸುವಂತೆ ಪ್ರಧಾನಿ ಮೋದಿ ಆಹ್ವಾನಿಸಿದ್ದರಿಂದ ನವೆಂಬರ್ 2014ರಲ್ಲಿ ಸಿಎಂ ಪದವಿಗೆ ರಾಜೀನಾಮೆ ಕೊಟ್ಟು ನಡೆದರು.

8. ಪರಿಕ್ಕರ್ ರಕ್ಷಣಾ ಮಂತ್ರಿಯಾಗಿದ್ದ ಅವಧಿಯಲ್ಲಿಯೇ (2016) ಮೊದಲ ಬಾರಿಗೆ ಪಾಕ್ ಆಕ್ರಮಿತ ಕಾಶ್ಮೀರದಲ್ಲಿ ಉಗ್ರರ ವಿರುದ್ಧ ಸರ್ಜಿಕಲ್ ಸ್ಟ್ರೈಕ್ ನಡೆಸಲಾಯಿತು.

9. ಮಾರ್ಚ್ 2017ರಲ್ಲಿ ಅವರು ಮತ್ತೆ ಗೋವಾ ಮುಖ್ಯಮಂತ್ರಿಯಾದರು.

10. ಅವರು ಇಬ್ಬರು ಗಂಡು ಮಕ್ಕಳಾದ ಉತ್ಪಾಲ್ ಮತ್ತು ಅಭಿಜಿತ್, ಸೊಸೆ ಮತ್ತು ಮೊಮ್ಮಗುವನ್ನು ಅಗಲಿದ್ದಾರೆ.