ಆ್ಯಪ್ನಗರ

Hijab: ಹಿಜಾಬ್ ನಿಷೇಧದ ಬಳಿಕ ಎಷ್ಟು ವಿದ್ಯಾರ್ಥಿನಿಯರು ಶಿಕ್ಷಣದಿಂದ ದೂರ ಉಳಿದರು? ನಿಖರ ಲೆಕ್ಕ ಕೇಳಿದೆ ಸುಪ್ರೀಂ ಕೋರ್ಟ್

Hijab Row Inquiry In Supreme Court: ಜಸ್ಟೀಸ್ ಹೇಮಂತ್ ಗುಪ್ತಾ, ಸುಧಾಂಶು ಧುಲಿಯಾ ಅವರನ್ನೊಳಗೊಂಡ ನ್ಯಾಯ ಪೀಠವು ಹಿಜಾಬ್ ನಿಷೇಧದ ಬಳಿಕ ಶಿಕ್ಷಣದಿಂದ ದೂರ ಉಳಿದ ವಿದ್ಯಾರ್ಥಿಗಳ ಕುರಿತು ಮಾಹಿತಿ ಬಯಸಿದೆ. ದೂರುದಾರ ವಿದ್ಯಾರ್ಥಿನಿಯರ ಪರ ವಕೀಲರೊಬ್ಬರು ಈ ಕುರಿತು ಸುಪ್ರೀಂ ಕೋರ್ಟ್‌ ಗಮನ ಸೆಳೆದರು. ಹಿಜಾಬ್ ನಿಷೇಧದ ಬಳಿಕ ಎಷ್ಟೋ ವಿದ್ಯಾರ್ಥಿನಿಯರು ಶಾಲೆ, ಕಾಲೇಜುಗಳಿಂದ ದೂರ ಉಳಿದಿದ್ದಾರೆ ಎಂದು ವಾದಿಸಿದರು. ಈ ಹಿನ್ನೆಲೆಯಲ್ಲಿ ಸುಪ್ರೀಂ ಕೋರ್ಟ್ ಈ ಕುರಿತಾದ ನಿಖರ ಅಂಕಿ ಅಂಶ ಬಯಸಿದೆ.

Authored byದಿಲೀಪ್ ಡಿ. ಆರ್. | Vijaya Karnataka Web 14 Sep 2022, 8:55 pm

ಹೈಲೈಟ್ಸ್‌:

  • ವಿದ್ಯಾರ್ಥಿನಿಯರ ಪರ ವಕೀಲರಲ್ಲಿ ಒಬ್ಬರಾದ ಹಿರಿಯ ವಕೀಲ ಹಜೇಫಾ ಅಹ್ಮದಿ ಅವರಿಂದ ವಿಚಾರ ಪ್ರಸ್ತಾಪ
  • ಶಾಲೆ - ಕಾಲೇಜಿನಿಂದ ದೂರ ಉಳಿದಿರೋದಕ್ಕೆ ಸಾಕ್ಷಿಯಾಗಿ ಹಲವು ವಿದ್ಯಾರ್ಥಿಗಳು ಸಿಗುತ್ತಾರೆ ಎಂದ ವಕೀಲರು
  • ಸುಮಾರು 17 ಸಾವಿರ ವಿದ್ಯಾರ್ಥಿಗಳು ಪರೀಕ್ಷೆಗಳಿಂದ ದೂರ ಉಳಿದಿದ್ದಾರೆ ಎಂದು ಮಾಹಿತಿ ನೀಡಿದವಕೀಲರು
ಹೈಲೈಟ್ಸ್‌ ಮಾತ್ರವೇ ಓದಲು ಆ್ಯಪ್‌ ಡೌನ್‌ಲೋಡ್‌ ಮಾಡಿ
Vijaya Karnataka Web udupi hijab
ಹಿಜಾಬ್ ನಿಷೇಧದ ಬಳಿಕ ಎಷ್ಟು ವಿದ್ಯಾರ್ಥಿನಿಯರು ಶಿಕ್ಷಣದಿಂದ ದೂರ ಉಳಿದರು? ನಿಖರ ಲೆಕ್ಕ ಕೇಳಿದೆ ಸುಪ್ರೀಂ ಕೋರ್ಟ್
ಹೊಸ ದಿಲ್ಲಿ: ಕರ್ನಾಟಕ ರಾಜ್ಯ ಸರ್ಕಾರ ಹಿಜಾಬ್ ನಿಷೇಧ ಮಾಡಿದ ಬಳಿಕ ಹಾಗೂ ಕರ್ನಾಟಕ ಹೈಕೋರ್ಟ್ ಹಿಜಾಬ್ ನಿಷೇಧ ತೀರ್ಮಾನವನ್ನು ಎತ್ತಿ ಹಿಡಿದ ನಂತರ ಕರ್ನಾಟಕದಲ್ಲಿ ಎಷ್ಟು ವಿದ್ಯಾರ್ಥಿಗಳು ಶಾಲೆ - ಕಾಲೇಜುಗಳಿಂದ ದೂರ ಉಳಿದಿದ್ದಾರೆ ಎಂದು ಸುಪ್ರೀಂ ಕೋರ್ಟ್‌ ಪ್ರಶ್ನಿಸಿದೆ. ಶಾಲೆಯಿಂದ ದೂರ ಉಳಿದ ವಿದ್ಯಾರ್ಥಿಗಳ ನಿಖರ ಲೆಕ್ಕ ಸಿಗಬಹುದೇ ಎಂದೂ ಸುಪ್ರೀಂ ಕೋರ್ಟ್‌ ಕೇಳಿದೆ.
20, 30, 40 ಅಥವಾ 50? ಎಷ್ಟು ವಿದ್ಯಾರ್ಥಿಗಳು ಶಾಲೆ - ಕಾಲೇಜಿನಿಂದ ದೂರ ಉಳಿದಿದ್ದಾರೆ? ಎಂದು ಜಸ್ಟೀಸ್ ಹೇಮಂತ್ ಗುಪ್ತಾ ಹಾಗೂ ಸುಧಾಂಶು ಧುಲಿಯಾ ಅವರನ್ನು ಒಳಗೊಂಡ ಸುಪ್ರೀಂ ಕೋರ್ಟ್‌ ನ್ಯಾಯ ಪೀಠ ಪ್ರಶ್ನಿಸಿದೆ. ದೂರುದಾರ ವಿದ್ಯಾರ್ಥಿನಿಯರ ಪರ ವಕೀಲರ ಪೈಕಿ ಒಬ್ಬರು ಈ ಕುರಿತು ಸುಪ್ರೀಂ ಕೋರ್ಟ್‌ ಗಮನ ಸೆಳೆದರು. ಹಿಜಾಬ್ ನಿಷೇಧದ ಬಳಿಕ ಎಷ್ಟೋ ವಿದ್ಯಾರ್ಥಿಗಳು ಅದರಲ್ಲೂ ವಿದ್ಯಾರ್ಥಿನಿಯರು ಶಾಲೆ, ಕಾಲೇಜುಗಳಿಂದ ದೂರ ಉಳಿದಿದ್ದಾರೆ ಎಂದು ವಾದಿಸಿದರು. ಈ ಹಿನ್ನೆಲೆಯಲ್ಲಿ ಸುಪ್ರೀಂ ಕೋರ್ಟ್ ಈ ಕುರಿತಾದ ನಿಖರ ಅಂಕಿ ಅಂಶ ಬಯಸಿದೆ.

Hijab Row: ಸಿಖ್ಖರ ಟರ್ಬನ್‌ಗೆ ಹಿಜಾಬ್ ಹೋಲಿಕೆ ಸರಿಯಲ್ಲ: ಸುಪ್ರೀಂಕೋರ್ಟ್
ವಿದ್ಯಾರ್ಥಿನಿಯರ ಪರ ವಕೀಲರಲ್ಲಿ ಒಬ್ಬರಾದ ಹಿರಿಯ ವಕೀಲ ಹಜೇಫಾ ಅಹ್ಮದಿ ಅವರು ಈ ವಿಚಾರ ಪ್ರಸ್ತಾಪಿಸಿದರು. ವರದಿಯೊಂದನ್ನು ಉಲ್ಲೇಖಿಸಿ ಮಾತನಾಡಿದ ಅವರು, ಶಾಲೆ - ಕಾಲೇಜಿನಿಂದ ದೂರ ಉಳಿದಿರೋದಕ್ಕೆ ಸಾಕ್ಷಿಯಾಗಿ ಹಲವು ವಿದ್ಯಾರ್ಥಿಗಳು ಸಿಗುತ್ತಾರೆ ಎಂದು ಹೇಳಿದರು.

ವಕೀಲರಾದ ನನ್ನ ಗೆಳೆಯರೊಬ್ಬರು ಈ ಕುರಿತು ನನಗೆ ಮಾಹಿತಿ ನೀಡಿದ್ದಾರೆ. ಹಿಜಾಬ್ ಕುರಿತ ಹೈಕೋರ್ಟ್‌ ತೀರ್ಪಿನ ಬಳಿಕ ಸುಮಾರು 17 ಸಾವಿರ ವಿದ್ಯಾರ್ಥಿಗಳು ಪರೀಕ್ಷೆಗಳಿಂದ ದೂರ ಉಳಿದಿದ್ದಾರೆ ಎಂದು ಹಿರಿಯ ವಕೀಲ ಹಜೇಫಾ ಅಹ್ಮದಿ ಹೇಳಿದರು. ಕರ್ನಾಟಕ ರಾಜ್ಯ ಸರ್ಕಾರ ಶಾಲೆ, ಕಾಲೇಜುಗಳಲ್ಲಿ ಹಿಜಾಬ್ ನಿಷೇಧ ಮಾಡಿದ ತೀರ್ಮಾನವನ್ನು ಕರ್ನಾಟಕ ಹೈಕೋರ್ಟ್ ಎತ್ತಿ ಹಿಡಿದ ಬಳಿಕ ಈ ಬೆಳವಣಿಗೆಗಳು ನಡೆದಿವೆ ಎಂದು ಅವರು ವಿವರಿಸಿದರು.

Hijab Row: ಭಾರತದಲ್ಲಿರುವುದು ಸಕಾರಾತ್ಮಕ ಜಾತ್ಯತೀತತೆ: ಹಿಜಾಬ್ ಪರ ವಕೀಲ ದೇವದತ್ ಕಾಮತ್ ವಾದ
ಸಾಮಾನ್ಯ ಶಾಲೆ, ಕಾಲೇಜುಗಳಲ್ಲಿ ಜಾತ್ಯತೀತ ಶಿಕ್ಷಣ ಪಡೆಯುತ್ತಿದ್ದ ವಿದ್ಯಾರ್ಥಿನಿಯರು ರಾಜ್ಯ ಸರ್ಕಾರದ ತೀರ್ಮಾನದ ಬಳಿಕ ಅನಿವಾರ್ಯವಾಗಿ ಮದರಸಾಗಳಿಗೆ ಹೋಗುವಂತಾಯ್ತು ಎಂದೂ ಅಹ್ಮದಿ ವಾದಿಸಿದರು.

ವಿದ್ಯಾರ್ಥಿನಿಯರು ಹಿಜಾಬ್ ಧರಿಸಿ ಶಾಲೆಗೆ ಹೋದರೆ ಏನು ಸಮಸ್ಯೆ? ಇತರ ವಿದ್ಯಾರ್ಥಿಗಳಿಗೆ ಏನು ಅಡ್ಡಿ? ಇದರಿಂದ ಜಾತ್ಯತೀತ ಶಿಕ್ಷಣ, ಏಕತೆಗೆ ಎಲ್ಲಿ ಅಡ್ಡಿ ಬರುತ್ತದೆ ಎಂದು ಅಹ್ಮದಿ ಪ್ರಶ್ನಿಸಿದರು.


ಮತ್ತೊಬ್ಬ ದೂರುದಾರ ವಿದ್ಯಾರ್ಥಿನಿ ಪರ ವಕೀಲ ರಾಜೀವ್ ಧವನ್ ಕೂಡಾ ಅಹ್ಮದಿ ಅವರಿಗೆ ದನಿಗೂಡಿಸಿದರು. ಹಿಜಾಬ್ ಬೇಕೇ ಬೇಡವೇ ಎಂದು ನಿರ್ಧರಿಸುವಾಗ ಹಳೆಯ ದಾಖಲೆ ಹುಡುಕುವ ಅಗತ್ಯ ಇಲ್ಲ. ಹಿಜಾಬ್ ಧಾರಣೆ ಪ್ರಚಲಿತದಲ್ಲಿ ಇದೆಯೇ? ಇಲ್ಲವೇ? ಎಂಬುದನ್ನು ಮಾತ್ರ ಗಮನಿಸಬೇಕು. ಜೊತೆಯಲ್ಲೇ ಈ ಆಚರಣೆ ಹಿಂದೆ ದುರುದ್ದೇಶ ಇದೆಯೇ? ಅಥವಾ ಸದುದ್ದೇಶದಿಂದ ಕೂಡಿದೆಯೇ? ಎಂದೂ ಪರಿಶೀಲಿಸಬೇಕು ಎಂದು ನ್ಯಾಯಪೀಠಕ್ಕೆ ಮನವಿ ಮಾಡಿದರು.

ಸಂವಿಧಾನದ ಆರ್ಟಿಕಲ್ 14 ಹಾಗೂ 15ರ ಅನ್ವಯ ಹಿಜಾಬ್ ನಿಷೇಧ ತಪ್ಪು ಎಂದು ವಾದಿಸಿದ ಧವನ್, ಸರ್ಕಾರದ ನಿರ್ಧಾರವು ಮುಸ್ಲಿಮರನ್ನು ಅದರಲ್ಲೂ ಮುಸ್ಲಿಂ ಮಹಿಳೆಯರನ್ನು ಗುರಿಯಾಗಿಸಿ ಕೈಗೊಂಡ ತೀರ್ಮಾನ ಎಂದು ಆಪಾದಿಸಿದರು.
ಲೇಖಕರ ಬಗ್ಗೆ
ದಿಲೀಪ್ ಡಿ. ಆರ್.
ವಿಜಯ ಕರ್ನಾಟಕದ ಡಿಜಿಟಲ್ ಪತ್ರಕರ್ತನಾಗಿ 2019ರ ಆಗಸ್ಟ್‌ನಿಂದ ಕಾರ್ಯ ನಿರ್ವಹಣೆ ಮಾಡುತ್ತಿದ್ದಾರೆ. ಇದಕ್ಕೂ ಮುನ್ನ ಕನ್ನಡ ಟಿವಿ ನ್ಯೂಸ್ ವಾಹಿನಿಗಳಲ್ಲಿ 14 ವರ್ಷಕ್ಕೂ ಹೆಚ್ಚು ಕಾಲ ವಿವಿಧ ಹುದ್ದೆಗಳಲ್ಲಿ ಕಾರ್ಯ ನಿರ್ವಹಿಸಿದ ಅನುಭವ ಹೊಂದಿದ್ದಾರೆ. ರಾಜಕೀಯ, ವಿಜ್ಞಾನ-ತಂತ್ರಜ್ಞಾನ ರಂಗಗಳು ಇವರ ಆಸಕ್ತಿಯ ವಿಷಯಗಳು. ಇದಲ್ಲದೆ ಹಾಸ್ಯ, ವಿಡಂಬನಾತ್ಮಕ ಬರಹ, ವ್ಯಕ್ತಿ ಚಿತ್ರ, ಜೀವ ಪರ ನಿಲುವಿನ ಸಂವೇದನಾತ್ಮಕ ಲೇಖನಗಳನ್ನು ಹೆಚ್ಚಾಗಿ ಬರೆಯುತ್ತಾರೆ. ಕಾಡು, ಹಸಿರು, ಬೆಟ್ಟ ಗುಡ್ಡಗಳ ಚಾರಣ ಮಾಡುವುದು ಇವರ ಹವ್ಯಾಸ.... ಇನ್ನಷ್ಟು ಓದಿ

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ