ವಿಶ್ವಮಟ್ಟದಲ್ಲಿ ಹಿಂದಿಗೆ 2ನೇ ಸ್ಥಾನ: ಅತಿ ಹೆಚ್ಚು ಬಳಸುವ ಗೂಗಲ್‌ ಅಸಿಸ್ಟೆಂಟ್‌ ಭಾಷೆ

ನವದೆಹಲಿ: ಭಾರತದಲ್ಲಿ ಅತಿ ಹೆಚ್ಚು ಜನರಿಂದ ಬಳಸಲ್ಪಡುವ ಹಿಂದಿ ಭಾಷೆ ಇದೀಗ ವಿಶ್ವದಲ್ಲೇ ಅತಿ ಹೆಚ್ಚು ಬಳಸಲ್ಪಡುವ ಗೂಗಲ್‌ ಅಸಿಸ್ಟೆಂಟ್‌ ಭಾಷೆಯಾಗಿ ಹೊರಹೊಮ್ಮಿದೆ. ತಂತ್ರಜ್ಞಾನ ದಿಗ್ಗಜ ಗೂಗಲ್‌ನ ಕೃತಕ ಬುದ್ದಿಮತ್ತೆ (ಆರ್ಟಿಫಿಷಿಯಲ್‌ ಇಂಟಲಿಜೆನ್ಸ್‌) ಆಧಾರಿತ ಅಸಿಸ್ಟೆಂಟ್‌ ಭಾಷೆಗಳಲ್ಲಿ ಇಂಗ್ಲಿಷ್‌ ಮೊದಲ ಸ್ಥಾನದಲ್ಲಿದ್ದು, ನಂತರದ ಸ್ಥಾನದಲ್ಲಿ ಹಿಂದಿ ಇದೆ. ಗೂಗಲ್‌ ಅಸಿಸ್ಟೆಂಟ್‌ನಲ್ಲಿ ಸುಮಾರು 80 ರಾಷ್ಟ್ರಗಳ 30 ಭಾಷೆಗಳಿವೆ.

ಗೂಗಲ್‌ ತನ್ನಲ್ಲಿ ಹುಡುಕಾಟ ನಡೆಸುವ ಭಾರತೀಯರಿಗೆ ಅನುಕೂಲವಾಗಲೆಂದು ಎರಡು ವರ್ಷಗಳ ಹಿಂದೆ ಭಾರತೀಯ ಭಾಷೆಗಳನ್ನು ಅಸಿಸ್ಟೆಂಟ್‌ ಭಾಷೆಗಳಾಗಿ ಸೇರಿಸಿತ್ತು. ಹಿಂದಿ ಸೇರಿದಂತೆ ಇತರೆ 8 ಭಾರತೀಯ ಭಾಷೆಗಳು ಗೂಗಲ್‌ ಅಸಿಸ್ಟೆಂಟ್‌ ಭಾಷೆಗಳಾಗಿ ಸೇರ್ಪಡೆಯಾಗಿದ್ದವು. ಈ ಪೈಕಿ ಹಿಂದಿಯು ವಿಶ್ವದಲ್ಲೇ ಅತಿ ಹೆಚ್ಚು ಬಳಸಲ್ಪಡುವ ಗೂಗಲ್‌ ಅಸಿಸ್ಟೆಂಟ್‌ ಭಾಷೆಯಾಗಿ (ಇಂಗ್ಲಿಷ್‌ ಹೊರತುಪಡಿಸಿ) ಹೊರಹೊಮ್ಮಿದೆ ಎಂದು ಗೂಗಲ್‌ ಉಪಾಧ್ಯಕ್ಷ, ಉತ್ಪನ್ನ ವ್ಯವಸ್ಥಾಪಕ ಮ್ಯಾನುಯಲ್ ಬ್ರೋನ್‌ಸ್ಟಿನ್ ತಿಳಿಸಿದ್ದಾರೆ.

ಕಳೆದ ಗೂಗಲ್‌ ವಾಯ್ಸ್‌ ಅಸಿಸ್ಟೆಂಟ್‌ ಮೂಲಕ "ಭಾರತದಲ್ಲಿ ಮದುವೆ' ಕುರಿತಂತೆ ಹೆಚ್ಚು (4.5 ಲಕ್ಷ ಜನ) ಹುಡುಕಾಟ ನಡೆದಿವೆ ಎಂದು ಗೂಗಲ್‌ ಹೇಳಿತ್ತು. 2011ರ ಜನಗಣತಿಯ ಪ್ರಕಾರ ಭಾರತದಲ್ಲಿಒಟ್ಟು 52,83,47,193 ಹಿಂದಿ ಭಾಷಿಗರಿದ್ದಾರೆ. ಪ್ರಸ್ತುತ ಈ ಸಂಖ್ಯೆ ಮತ್ತಷ್ಟು ಹೆಚ್ಚಿದೆ.

ಹಿಂದಿ ಭಾಷೆಯು ಕೇವಲ ಉತ್ತರದ ಭಾಷೆಯೇ?: ಹಿಂದಿ ಹೇರಿಕೆ ಚರ್ಚೆ

ಆದರೂ, ಗೂಗಲ್‌ ಅಸಿಸ್ಟೆಂಟ್‌ ಅನ್ನು ಒಟ್ಟು ಎಷ್ಟು ಜನ ಬಳಸುತ್ತಾರೆ ಎಂಬ ಅಂಕಿ ಅಂಶಗಳನ್ನು ಗೂಗಲ್‌ ಬಹಿರಂಗಪಡಿಸಿಲ್ಲ. ಆಪಲ್‌ನ ಸಿರಿ ಮತ್ತು ಅಮೆಜಾಜ್‌ ಅಲೆಕ್ಸಾದಲ್ಲಿಯೂ ಹಿಂದಿ ಭಾಷೆ ಬಳಕೆಗೆ ಅವಕಾಶವಿದೆ. ಇವುಗಳ ನಡುವಿನ ಸ್ಪೆರ್ಧೆಯಿಂದಲೇ ಅಂಕಿಅಂಶಗಳ ಕುರಿತು ಮಾಹಿತಿ ಬಹಿರಂಗಪಡಿಸಿಲ್ಲ.

ಇದೀಗ ' ಹೇ ಗೂಗಲ್‌, ಟಾಕ್‌ ಟು ಮಿ ಇನ್‌ ಹಿಂದಿ' ಎನ್ನು ವ ಮೂಲಕ ಗೂಗಲ್‌ನಲ್ಲಿ ನೇರವಾಗಿ ಹಿಂದಿಯಲ್ಲಿ ಮಾತನಾಡಬಹುದು.
ಗೂಗಲ್‌ ಮತ್ತು ಅಮೆಜಾನ್‌ ಕಂಪನಿಗಳು ದೇಶದ ಪ್ರಾದೇಶಿಕ ಭಾಷೆಗಳ ಮೂಲಕ ಜನರನ್ನು ತಲುಪಲು ಪ್ರಯತ್ನಿಸುತ್ತಿವೆ. ಭಾರತದಲ್ಲಿ ಹೊಸದಾಗಿ ಇಂಟರ್‌ನೆಟ್‌ ಬಳಸುವವರಲ್ಲಿ ಶೇ.90 ಜನ ಪ್ರಾದೇಶಿಕ ಭಾಷೆಗಳಿಂದಲೇ ಬರುವವರಾಗಿದ್ದಾರೆ. ಹೀಗಾಗಿ ಟೆಕ್‌ ದೈತ್ಯಕಂಪನಿಗಳು ಭಾರತದ ಪ್ರಾದೇಶಿ ಭಾಷೆಗಳ ಮೇಲೆ ಹೆಚ್ಚು ಒಲವು ಹೊಂದಿವೆ.

ಹಿಂದಿ ಏಕ ಭಾ‍ಷಾ ಸೂತ್ರ-ವಿವಾದದ ಬೆನ್ನಲ್ಲೇ ಅಮಿತ್ ಶಾ ಯೂ ಟರ್ನ್

ಅಮೆಜಾನ್‌ ಅಲೆಕ್ಸಾಗೆ ಹಿಂದಿ ಗೊತ್ತು: 2017ರಲ್ಲಿ ಭಾರತಕ್ಕೆ ಕಾಲಿಟ್ಟ ಅಮೆಜಾನ್‌ನ ಅಲೆಕ್ಸಾ ಹಿಂದಿ ಬಲ್ಲವಳಾಗಿದ್ದಾಳೆ. ನೀವು ಹಿಂದಿಯಲ್ಲಿ ಹೇಳಿದ ಕೆಲಸಗಳನ್ನು ಅರ್ಥಮಾಡಿಕೊಂಡು ಚಾಚೂತಪ್ಪದೆ ಪಾಲಿಸುತ್ತಾಳೆ. ಅಲೆಕ್ಸಾ ಎಂಬುದು ಒಂದು ಡಿಜಿಟಲ್‌ ಸಾಧನವಾಗಿದ್ದು, ಕೃತಕ ಬುದ್ಧಿಮತ್ತೆ ಆಧಾರದಲ್ಲಿ ಕಾರ್ಯನಿರ್ವಹಿಸುತ್ತದೆ. ನೀವು ಹೇಳುವುದನ್ನು ಅರ್ಥಮಾಡಿಕೊಂಡು ಪ್ರತಿಕ್ರಿಯಿಸಬಲ್ಲ ಸಾಧನವಾಗಿದೆ.

ಗೂಗಲ್‌ ಬೋಲೋ ಆಪ್‌: ಗೂಗಲ್‌ ಅಸಿಸ್ಟೆಂಟ್‌ ಅಲ್ಲದೆ, ಪ್ರಾದೇಶಿಕ ಭಾಷೆಗಳಲ್ಲಿ ಗೂಗಲ್‌ ಹಲವಾರು ಉತ್ಪನ್ನಗಳನ್ನು ಬಿಡುಗಡೆ ಮಾಡಿದೆ. ಪುಟ್ಟ ಮಕ್ಕಳಿಗೆ ಭಾಷೆ ಕಲಿಕೆಗೆ ಸಹಾಯಕವಾಗುವ "ಬೋಲೋ' ಆಪ್‌ ಬಿಡುಗಡೆ ಮಾಡಿದೆ . ಈ ಆಪ್‌ನಲ್ಲಿ ಬೆಂಗಾಳಿ, ಮರಾಠಿ, ತಮಿಳು, ತೆಲುಗು ಹಾಗೂ ಉರ್ದು ಭಾಷೆಗಳು ಲಭ್ಯವಿದೆ.