ಶ್ರೀನಗರ: ಅಲೀಗಢ ಮುಸ್ಲಿಂ ವಿಶ್ವವಿದ್ಯಾಲಯದ ಸಂಶೋಧನಾ ವಿದ್ಯಾರ್ಥಿ ಮನನ್‌ ಬಶೀರ್‌ ವಾನಿ ಪಾಕ್‌ ಮೂಲದ ಹಿಜ್ಬುಲ್‌ ಮುಜಾಹಿದೀನ್‌ ಉಗ್ರ ಸಂಘಟನೆ ಸೇರಿರುವ ಆಘಾತಕಾರಿ ಸಂಗತಿ ವರದಿಯಾಗಿದೆ.
ಕೆಲ ದಿನಗಳ ಹಿಂದಷ್ಟೇ ರಜೆ ಪಡೆದು ವಿಶ್ವವಿದ್ಯಾಲಯದಿಂದ ತಮ್ಮ ಊರಾದ ಜಮ್ಮು-ಕಾಶ್ಮೀರದ ಕುಪ್ವಾರ ಜಿಲ್ಲೆಯ ತಿಕಿಪೋರಾದ ಲೊಲಾಬ್‌ಗೆ ಬಂದಿದ್ದ . ಆದರೆ ಇದ್ದಕ್ಕಿದ್ದಂತೆ ನಾಪತ್ತೆಯಾಗಿದ್ದ. ಈ ಬೆಳವಣಿಗೆಯ ಬೆನ್ನಲ್ಲೇ ಬಂದೂಕು ಹಿಡಿದುಕೊಂಡಿರುವ ಬಶೀರ್‌ ವಾನಿ ಫೋಟೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿತ್ತು.
ಈತ ತಮ್ಮ ಸಂಘಟನೆ ಸೇರಿರುವುದಾಗಿ ಹಿಜ್ಬುಲ್‌ ಮುಜಾಹಿದೀನ್‌ ಖಚಿತಪಡಿಸಿದೆ. ಅನ್ವಯಿಕ ಭೂಗರ್ಭಶಾಸ್ತ್ರ ವಿಷಯದಲ್ಲಿ ಸಂಶೋಧನೆ ನಡೆಸುತ್ತಿದ್ದ ವಾನಿಯನ್ನು ವಿ.ವಿ. ವಜಾಗೊಳಿಸಿದೆ. ಈ ಮಧ್ಯೆ ವಾನಿ ತಾಯಿ ಶಮೀಮಾ, ಉಗ್ರ ಸಂಘಟನೆಯ ಸಂಗ ಬಿಟ್ಟು ಮನೆಗೆ ಮರಳುವಂತೆ ಮಾಧ್ಯಮಗಳ ಮೂಲಕ ಮನವಿ ಮಾಡಿಕೊಂಡಿದ್ದಾರೆ.