ಮಾನ್ಸೂನ್‌ ಆತಂಕ ಬೇಡ, ಇನ್ನೆರಡು ತಿಂಗಳು ಉತ್ತಮ ಮಳೆ

ಹೊಸದಿಲ್ಲಿ: ಬಿಹಾರ, ಜಾರ್ಖಂಡ್‌ ಮತ್ತು ಈಶಾನ್ಯ ರಾಜ್ಯಗಳನ್ನು ಹೊರತುಪಡಿಸಿ ದೇಶದೆಲ್ಲೆಡೆ ಜುಲೈ ಅಂತ್ಯದವರೆಗೆ ಅತ್ಯುತ್ತಮ ಮಳೆ ಹಂಚಿಕೆಯಾಗಿದ್ದು, ನೈಋುತ್ಯ ಮುಂಗಾರಿನ ಎರಡನೇ ಘಟ್ಟವಾದ ಆಗಸ್ಟ್‌-ಸೆಪ್ಟೆಂಬರ್‌ನಲ್ಲೂ ಉತ್ತಮ ಮಳೆ ಬೀಳಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಶುಕ್ರವಾರ ಹೇಳಿದೆ.

ಮುಂದಿನ ಎರಡು ತಿಂಗಳಲ್ಲಿ ಮಳೆ ಹಂಚಿಕೆ ಉತ್ತಮವಾಗಿರುತ್ತದೆ ಎಂದು ನಿರೀಕ್ಷಿಸಲಾಗಿದೆ. ಹಾಗಾಗಿ ಮುಂಗಾರು ಕೃಷಿ ಬೆಳೆಗಳಿಗೆ ಆಶಾದಾಯಕ ವಾತಾವರಣವಿದೆ ಎಂದು ಇಲಾಖೆ ಅಭಿಪ್ರಾಯಪಟ್ಟಿದೆ.

ಮಳೆ ಲೆಕ್ಕಾಚಾರದ ಪ್ರಕಾರ, ದೀರ್ಘಾಂತರ ಸರಾಸರಿಯ ಶೇಕಡಾ 96-104ರಷ್ಟು ಮಳೆ ಬಂದರೆ ಅದನ್ನು ವಾಡಿಕೆ ಮಳೆ ಎಂದು ಪರಿಗಣಿಸಲಾಗುತ್ತದೆ. 90-96% ಇದ್ದರೆ ಸಾಮಾನ್ಯಕ್ಕಿಂತ ಕಡಿಮೆ ಎನ್ನಲಾಗುತ್ತದೆ. ಆಗಸ್ಟ್‌ ತಿಂಗಳಲ್ಲಿ ಶೇಕಡಾ 9ರಷ್ಟು ವ್ಯತ್ಯಾಸ ನಿರೀಕ್ಷೆಯೊಂದಿಗೆ 96% ಮಳೆ ಬೀಳಬಹುದು ಎಂದು ಇಲಾಖೆ ಅಭಿಪ್ರಾಯಪಟ್ಟಿದೆ. ಹವಾಮಾನ ಇಲಾಖೆಯ ಹೆಚ್ಚುವರಿ ಮಹಾ ನಿರ್ದೇಶಕ ಎಂ.ಮಹಾಪಾತ್ರ ಅವರ ಪ್ರಕಾರ, ಆಗಸ್ಟ್‌-ಸೆಪ್ಟೆಂಬರ್‌ನಲ್ಲಿ 94ರಿಂದ 100 ಶೇಕಡಾ ಮಳೆ ಬೀಳಬಹುದು.

ಸ್ಕೈಮೆಟ್‌ ಹೇಳುವುದೇನು?: ಈ ನಡುವೆ ಖಾಸಗಿ ಹವಾಮಾನ ಸಂಸ್ಥೆ ಸ್ಕೈ ಮೆಟ್‌, ಪೆಪಿಫಿಕ್‌ ಸಾಗರದ ಮೇಲ್ಮೈ ಉಷ್ಣತೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಈ ವರ್ಷ ವಾಡಿಕೆಗಿಂತ ಕಡಿಮೆ ಮಳೆ ಬೀಳಲಿದೆ ಎಂದು ಮುನ್ಸೂಚನೆ ನೀಡಿದೆ.

ಬಿದ್ದ ಮಳೆ ಪ್ರಮಾಣ (ಮಿ.ಮೀಗಳಲ್ಲಿ)

ತಿಂಗಳು ಪ್ರಮಾಣ ವಾಡಿಕೆ ಮಳೆ

ಜೂನ್‌ 155.3 163.5

ಜುಲೈ 272.4 289.2