ಹೋಟೆಲ್‌ ಕಟ್ಟಡ ಕುಸಿತ: 10 ಜನರ ದುರ್ಮರಣ

ಇಂದೋರ್‌: ಮೂರು ಮಹಡಿಯ ಹೋಟೆಲ್‌ ಕುಸಿದು 10 ಮಂದಿ ಮೃತಪಟ್ಟು ಹಲವರು ಗಾಯಗೊಂಡಿರುವ ಘಟನೆ ಮಧ್ಯಪ್ರದೇಶದ ಇಂದೋರ್‌ನಲ್ಲಿ ಶನಿವಾರ ರಾತ್ರಿ ನಡೆದಿದೆ.

ಘಟನೆ ಕುರಿತು ಸರಕಾರ ನ್ಯಾಯಾಂಗ ತನಿಖೆಗೆ ಆದೇಶಿಸಿದ್ದು, ತೆರವು ಕಾರ್ಯಾಚರಣೆ ಬಹುತೇಕ ಪೂರ್ಣಗೊಂಡಿದೆ. ಶರವೇಗದಲ್ಲಿ ಬಂದ ಕಾರು ನಗರದ ಬಸ್‌ ನಿಲ್ದಾಣದ ಸಮೀಪದಲ್ಲಿರುವ ಹೋಟೆಲ್‌ ಕಟ್ಟಡದ ಪಿಲ್ಲರ್‌ಗೆ ಡಿಕ್ಕಿ ಹೊಡೆದಿದ್ದರಿಂದ ಈ ಅನಾಹುತ ಸಂಭವಿಸಿದೆ. ಡಿಕ್ಕಿ ರಭಸಕ್ಕೆ ಪಿಲ್ಲರ್‌ ಕಿತ್ತುಕೊಂಡು ಹೋಗುತ್ತಿದ್ದಂತೆ 60 ವರ್ಷ ಹಳೆಯ ಕಟ್ಟಡ ಉರುಳಿಬಿತ್ತು.

ನೋಡನೋಡುತ್ತಿದ್ದಂತೆಯೇ ಜನರು ಅವಶೇಷಗಳಡಿ ಸಿಲುಕಿ ಜೀವ ಕಳೆದುಕೊಂಡರು ಎಂದು ಪ್ರತ್ಯಕ್ಷ ದರ್ಶಿಗಳ ಹೇಳಿಕೆ ಉಲ್ಲೇಖಿಸಿ ಪೊಲೀಸ್‌ ಅಧಿಕಾರಿ ಸಂಜು ಕಾಂಬ್ಳೆ ವಿವರಣೆ ನೀಡಿದ್ದಾರೆ. ಈ ಹೋಟೆಲ್‌ನಲ್ಲಿ ಲಾಡ್ಜ್‌ ಕೂಡ ಇದ್ದ ಕಾರಣ ಘಟನೆ ನಡೆದಾಗ ಸುಮಾರು 40 ಜನ ಕಟ್ಟಡದೊಳಗಿದ್ದರು ಎನ್ನಲಾಗಿದೆ. ಮುಖ್ಯಮಂತ್ರಿ ಶಿವರಾಜ್‌ ಸಿಂಗ್‌ ಚೌಹಾಣ್‌ ಅವರು ಮೃತರ ಕುಟುಂಬಗಳಿಗೆ ತಲಾ 2 ಲಕ್ಷ ರೂ. ಹಾಗೂ ಗಾಯಾಳುಗಳಿಗೆ ತಲಾ 50 ಸಾವಿರ ರೂ. ಪರಿಹಾರ ಘೋಷಿಸಿದ್ದಾರೆ.