ಹೊಸದಿಲ್ಲಿ: ಪಂಚರಾಜ್ಯಗಳ ಚುನಾವಣೆಯ ಮತಗಟ್ಟೆ ಸಮೀಕ್ಷೆ ಹಲವು ವೈರುಧ್ಯಗಳಿಗೆ ಸಾಕ್ಷಿಯಾಗಿರುವದಷ್ಟೇ ಅಲ್ಲ, ಇವುಗಳನ್ನು ಎಷ್ಟು ನಂಬಬಹುದು ಎಂಬ ಶಂಕೆಗೂ ಕಾರಣವಾಗಿದೆ.
ಸಮೀಕ್ಷೆ ನಡೆಸಿದ ಸಂಸ್ಥೆಗಳು ಬೇರೆಬೇರೆ ಸುದ್ದಿವಾಹಿನಿಗಳಿಗೆ ಬೇರೆಬೇರೆ ರೀತಿಯ ಫಲಿತಾಂಶ ನೀಡಿರುವುದು ಇದಕ್ಕೆ ಕಾರಣ. ಪ್ರಸಿದ್ಧ ಸಮೀಕ್ಷಾ ಸಂಸ್ಥೆಯೊಂದು ಗೋವಾದಲ್ಲಿ ಬಿಜೆಪಿ 18 ಸ್ಥಾನಗಳನ್ನು ಗೆಲ್ಲಲಿದೆ ಎಂದು ಒಂದು ಸುದ್ದಿವಾಹಿನಿಗೆ ನೀಡಿದ ಸಮೀಕ್ಷಾ ಫಲಿತಾಂಶದಲ್ಲಿ ತಿಳಿಸಿದ್ದರೆ, ಇನ್ನೊಂದು ಸುದ್ದಿವಾಹಿನಿಗೆ ನೀಡಿದ ಫಲಿತಾಂಶದಲ್ಲಿ ಬಿಜೆಪಿಗೆ 15.21 ಸ್ಥಾನಗಳನ್ನು ನೀಡಿದೆ. ಅದೇ ಸಂಸ್ಥೆ ಉತ್ತರ ಪ್ರದೇಶ ಕುರಿತಂತೆ ಒಂದು ಸುದ್ದಿವಾಹಿನಿಗೆ ಬಿಜೆಪಿ 161 ಸ್ಥಾನಗಳನ್ನು ಗಳಿಸಲಿದೆ ಎಂದು ತಿಳಿಸಿದ್ದು, ಇನ್ನೊಂದು ಸುದ್ದಿವಾಹಿನಿಗೆ ನೀಡಿದ ಫಲಿತಾಂಶದಲ್ಲಿ 115 ಸ್ಥಾನಗಳ ಲೆಕ್ಕ ನೀಡಿದೆ. ಇದು ಕೇವಲ ಒಂದು ಸಮೀಕ್ಷಾ ಸಂಸ್ಥೆಗೆ ಸೀಮಿತಗೊಂಡಿಲ್ಲ. ಬಹುತೇಕ ಸಮೀಕ್ಷಾ ಸಂಸ್ಥೆಗಳು ಇದೇ ರೀತಿಯ ಪರಸ್ಪರ ತಾಳೆಯಾಗದ ಅಂಕಿ-ಅಂಶಗಳನ್ನು ನೀಡಿ ಗೊಂದಲ ಮೂಡಿಸಿವೆ.
