ಮದುವೆ ರದ್ದತಿವರೆಗೂ ಪತ್ನಿ ನಿರ್ವಹಣೆ ಹೊಣೆ ಪತಿಗೇ

ಹೊಸದಿಲ್ಲಿ: ಕೌಟುಂಬಿಕ ಹಿಂಸೆ ತಡೆ ಕಾನೂನಿನ ಪ್ರಕಾರ, ಒಂದು ಮದುವೆ ರದ್ದತಿ ಆದೇಶ ಬರುವವರೆಗೆ ಗಂಡನೇ ಹೆಂಡತಿಯ ಎಲ್ಲ ಜೀವನ ನಿರ್ವಹಣೆ ಜವಾಬ್ದಾರಿಯನ್ನು ಹೊತ್ತುಕೊಳ್ಳಬೇಕು ಎಂದು ದಿಲ್ಲಿಯ ಕೋರ್ಟ್‌ ಹೇಳಿದೆ.

ತನ್ನನ್ನು ಮದುವೆಯಾಗುವ ಮೊದಲು ಆಕೆಗೆ ಇನ್ನೊಂದು ಮದುವೆಯಾಗಿತ್ತು ಎಂಬ ಕಾರಣ ನೀಡಿ ವ್ಯಕ್ತಿಯೊಬ್ಬ ಪತ್ನಿಯನ್ನು ತ್ಯಜಿಸಿದ್ದ. ಆಕೆಯ ದಾವೆಯನ್ನು ಆಲಿಸಿದ್ದ ಮ್ಯಾಜಿಸ್ಟೀರಿಯಲ್‌ ನ್ಯಾಯಾಲಯ ತಿಂಗಳಿಗೆ 5000 ರೂ. ಜೀವನ ನಿರ್ವಹಣೆ ವೆಚ್ಚ ಕೊಡಬೇಕು ಎಂದು ಆದೇಶಿಸಿತ್ತು. ಇದನ್ನು ಪ್ರಶ್ನಿಸಿ ಪತಿ ಸೆಷನ್ಸ್‌ ಕೋರ್ಟ್‌ಗೆ ಮೊರೆ ಹೋಗಿದ್ದ.

ಮಹಿಳೆ ಆಗಲೇ ಡೈವೋರ್ಸ್‌ಗೆ ಅರ್ಜಿ ಸಲ್ಲಿಸಿರುವುದರಿಂದ ಮದುವೆ ರದ್ದತಿ ಆದೇಶ ಬರುವವರೆಗೆ ಆಕೆಗೆ ಹಣಕಾಸಿನ ನೆರವು ನೀಡುವುದು ಆತನ ಜವಾಬ್ದಾರಿಯಾಗುತ್ತದೆ ಎಂದು ಹೆಚ್ಚುವರಿ ಸೆಷನ್ಸ್‌ ನ್ಯಾಯಾಧೀಶ ಜಗದೀಶ್‌ ಕುಮಾರ್‌ ತಿಳಿಸಿದರು.

ಮಹಿಳೆಗೆ ಮೊದಲೇ ಮದುವೆಯಾಗಿರುವುದರಿಂದ ತನ್ನೊಂದಿಗೆ ನಡೆದಿರುವ ವಿವಾಹ ಕಾನೂನುಬದ್ಧವಲ್ಲ ಎಂಬ ಅಂಶವನ್ನು ವಿಚಾರಣೆ ನ್ಯಾಯಾಲಯ ಪರಿಗಣಿಸಬೇಕಿತ್ತು ಎಂದು ಪತಿ ವಾದಿಸಿದ್ದ. ಮತ್ತು ಮೊದಲ ಮದುವೆಯ ನೋಂದಣಿ ದಾಖಲೆಯನ್ನು ಹಾಜರುಪಡಿಸಿದ್ದ. ಆದರೆ, ಕೋರ್ಟ್‌ ಈ ವಾದವನ್ನು ಒಪ್ಪಲಿಲ್ಲ.