ಆರ್‌ಜೆ ಆತ್ಮಹತ್ಯೆ: ಆರ್ಮಿ ಮೇಜರ್ ಅರೆಸ್ಟ್

ಹೈದರಾಬಾದ್: ರೇಡಿಯೋ ಜಾಕಿ (ಆರ್‌ಜೆ) ಸಂಧ್ಯಾ ಸಿಂಗ್ ನೇಣು ಬಿಗಿದು ಆತ್ಮಹತ್ಯೆಗೆ ಶರಣಾದ 13 ದಿನಗಳ ಬಳಿಕ ಆರೋಪಿ ಪತಿ, ಭಾರತೀಯ ಸೈನ್ಯದ ಮೇಜರ್ ವೈಭವ್ ವಿಶಾಲ್ (30) ಅವರನ್ನು ಹೈದರಾಬಾದ್ ಪೊಲೀಸರು ಬಂಧಿಸಿದ್ದಾರೆ.

ಆರೋಪಿ ವಿಶಾಲ ಅವರನ್ನು ಬಂಧಿಸಿರುವ ಪೊಲೀಸರು ಸ್ಥಳೀಯ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದಾರೆ. ನ್ಯಾಯಾಲಯ 14 ದಿನಗಳ ಕಾಲ ನ್ಯಾಯಾಂಗ ಬಂಧನ ವಿಧಿಸಿದೆ.

ಪತ್ನಿ ಆತ್ಮಹತ್ಯೆಗೆ ಶರಣಾದ ಹಿನ್ನೆಲೆಯಲ್ಲಿ ಸಿಕಂದರಾಬಾದ್‌ ಸೇನೆಯ 54 ಇನ್‌ಪ್ಯಾಂಟ್ರಿ ಡಿವಿಜನ್‌ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಮೇಜರ್ ವಿಶಾಲ್ ವಿರುದ್ಧ ಏಪ್ರಿಲ್ 18ರಂದು ದೂರು ದಾಖಲಾಗಿತ್ತು.

ಸಂಧ್ಯಾ ಸಿಂಗ್ (30) ಹೈದರಾಬಾದ್‌ನ ಬೊಲರಮ್‌ನಲ್ಲಿರುವ ಪತಿ ವೈಭವ್ ವಿಶಾಲ ಅವರ ಸೇನಾ ವಸತಿನಿಲಯದಲ್ಲಿ ಆತ್ಮಹತ್ಯೆಗೆ ಶರಣಾಗಿದ್ದರು. ಪತಿ ವೈಭವ್ ವಿರುದ್ಧ 304-ಬಿ (ವರದಕ್ಷಿಣೆ ಕಿರುಕುಳ) ಮತ್ತು ಎಸ್‌ಸಿ, ಎಸ್‌ಟಿ ಕಾಯಿದೆ ಅಡಿಯಲ್ಲಿ ಪ್ರಕರಣ ದಾಖಲಾಗಿತ್ತು.

ಘಜಿಯಾಬಾದ್ ರೈಲ್ವೆ ನಿಲ್ದಾಣದಲ್ಲಿ ಸ್ಟೇಶನ್ ಮಾಸ್ಟರ್ ಆಗಿ ಸೇವೆ ಸಲ್ಲಿಸುತ್ತಿರುವ ಸಂಧ್ಯಾ ಸಿಂಗ್ ಅವರ ಸಹೋದರಿ ಉಮಾ ಸಿಂಗ್ ಅವರು ಪೊಲೀಸರಲ್ಲಿ ದೂರು ದಾಖಲಿಸಿದ್ದರು. 'ವೈಭವ್ ವಿಶಾಲ್, ಆತನ ತಾಯಿ, ಸಹೋದರಿ ಖುಷಿ ಅಲಿಯಾಸ್ ಮೆಗಾ ರೈ ಅವರು ತನ್ನ ಸಹೋದರಿಗೆ ವರದಕ್ಷಿಣೆ ಕಿರುಕುಳ ನೀಡುತ್ತಿದ್ದರು. ಕಿರುಕುಳ ತಾಳಲಾರದೆ ಆತ್ಮಹತ್ಯೆಗೆ ಶರಣಾಗಿದ್ದಾರೆ' ಎಂದು ದೂರಿನಲ್ಲಿ ತಿಳಿಸಿದ್ದಾರೆ.