ಬೇಕಾಬಿಟ್ಟಿ ಕಾರು ಚಾಲನೆ: ಪ್ರಶ್ನಿಸಿದ ವ್ಯಕ್ತಿ ಮೇಲೆ ಮಹಿಳೆ ಹಲ್ಲೆ

ಹೈದರಾಬಾದ್‌: ಸಿಕಂದರಾಬಾದ್‌ನ ಬೇಗಂಪೇಟ್‌ ಫ್ಲೈಒವರ್‌ನಲ್ಲಿ ಇತರ ವಾಹನ ಚಾಲಕರು, ಸವಾರರು ಭೀತಿಗೊಳ್ಳುವಂತೆ ಬೇಕಾಬಿಟ್ಟಿ ಕಾರು ಚಾಲನೆ ಮಾಡಿದ ಮಹಿಳೆ, ಆ ಬಗ್ಗೆ ಪ್ರಶ್ನಿಸಿದ ವ್ಯಕ್ತಿಯನ್ನು ಬೆನ್ನಟ್ಟಿ ನಿಂದಿಸಿ ಹಲ್ಲೆ ನಡೆಸಿರುವ ವೀಡಿಯೊ ವೈರಲ್‌ ಆಗಿದೆ.

ವ್ಯಕ್ತಿಯ ಮೇಲೆ ಕೈ ಮಾಡುವುದನ್ನು ತಡೆಯಲು ಯತ್ನಿಸಿದ ಪೊಲೀಸ್‌ ಸಿಬ್ಬಂದಿ ಮೇಲೂ ಮಹಿಳೆ ರೇಗಾಡಿದ್ದಾಳೆ. ಆದರೆ ಮಹಿಳೆಯ ವಿರುದ್ಧ ದೂರು ದಾಖಲಾಗಿಲ್ಲ, ಅದೇ ರೀತಿ ಆಕೆಯ ಗುರುತು ಕೂಡ ಪತ್ತೆಯಾಗಿಲ್ಲ.

ಮಹಿಳೆ ದಟ್ಟಣೆಯ ಅವಧಿಯಲ್ಲಿ ಗ್ರೀನ್‌ಲ್ಯಾಂಡ್‌ ಜಂಕ್ಷನ್‌ನಿಂದ ಸಿಕಂದರಾಬಾದ್‌ನತ್ತ ಪ್ರಯಾಣಿಸುತ್ತಿದ್ದರು. ಮಹಿಳೆ ಕಾರು ಚಲಾಯಿಸುವಾಗ ಪಕ್ಕದಲ್ಲೇ ಸಂಚರಿಸುತ್ತಿದ್ದ ಬೈಕ್‌ಗಳಿಗೆ ತಾಗುತ್ತಿತ್ತು. ಇದರಿಂದ ಬೆಚ್ಚಿದ ಬೈಕ್‌ ಸವಾರ ಕೂಗುತ್ತಿದ್ದಂತೆಯೇ ಮಹಿಳೆ ಕಾರು ನಿಲ್ಲಿಸಿ ಆ ವ್ಯಕ್ತಿಯ ಜತೆ ವಾಗ್ವಾದ ಆರಂಭಿಸಿದ್ದಾರೆ. ಕಾರಿನಿಂದ ಇಳಿದು ಆ ವ್ಯಕ್ತಿಯತ್ತ ನುಗ್ಗಿ ಬಯ್ಯುತ್ತ ಕಿರಿಚಾಡಿದ್ದಾಳೆ. ಅದೇ ರಸ್ತೆಯಲ್ಲಿ ಬರುತ್ತಿದ್ದ ಪೊಲೀಸ್‌ ಸಿಬ್ಬಂದಿ ನಿಲ್ಲಿಸಿ ಮಾತನಾಡಿಸಬೇಕಾದರೆ ಅವರ ಮೇಲೂ ಮಹಿಳೆ ಹರಿ ಹಾಯ್ದಿದ್ದಾಳೆ. ಬಳಿಕ ಮಹಿಳೆ ಮನ ಬಂದಂತೆ ಕೆಟ್ಟದಾಗಿ ನಿಂದಿಸಿದ್ದು, ಪ್ರತಿಯಾಗಿ ಆ ವ್ಯಕ್ತಿ ಕೂಡ ಅದೇ ರೀತಿ ನಿಂದಿಸಿದ್ದಾರೆ.

ಮಹಿಳೆಯ ವಿರುದ್ಧ ಸಂತ್ರಸ್ತ ವ್ಯಕ್ತಿ ದೂರು ನೀಡಿಲ್ಲ, ಸಿಸಿಟಿವಿಯಲ್ಲಿ ಆಕೆ ಬೇಕಾಬಿಟ್ಟಿ ಕಾರು ಚಾಲನೆ ಮಾಡಿರುವುದು ದಾಖಲಾಗಿದೆ. ಯಾರಾದರೂ ದೂರು ನೀಡಿದರೆ ಮಹಿಳೆಯನ್ನು ಪತ್ತೆ ಹಚ್ಚುವುದಾಗಿ ಬೇಗಂಪೇಟ್‌ ಸಂಚಾರ ಪೊಲೀಸ್‌ ಇನ್ಸ್‌ಪೆಕ್ಟರ್‌ ಕೆ. ಕಲ್ಯಾಣ್‌ ಕುಮಾರ್‌ ಹೇಳಿದ್ದಾರೆ.