ಹೊಸದಿಲ್ಲಿ: ಹರಿಯಾಣ ಕಾಂಗ್ರೆಸ್‌ ಮುಖಂಡ ಕುಲದೀಪ್‌ ಬಿಷ್ಣೋಯಿ ಹಾಗೂ ಅವರ ಸೋದರ ಚಂದ್ರಮೋಹನ್‌ ಅವರಿಗೆ ಸೇರಿದ 150 ಕೋಟಿ ರೂ. ಮೌಲ್ಯದ ಬೇನಾಮಿ ಸ್ವತ್ತೊಂದನ್ನು ಆದಾಯ ತೆರಿಗೆ ಅಧಿಕಾರಿಗಳು ಮಂಗಳವಾರ ಮುಟ್ಟುಗೋಲು ಹಾಕಿದ್ದಾರೆ. ಗುರುಗ್ರಾಮದ ವಾಣಿಜ್ಯ ವಲಯದಲ್ಲಿದ್ದ ಪಂಚತಾರಾ ಹೋಟೆಲ್‌ ಮುಟ್ಟುಗೋಲಾಗಿರುವ ಬೇನಾಮಿ ಸ್ವತ್ತು. ಬಿಷ್ಣೋಯಿ ಸೋದರರಿಗೆ ಸೇರಿದ ಇದು ಬ್ರೈಟ್‌ ಸ್ಟಾರ್‌ ಹೋಟೆಲ್‌ ಪ್ರೈವೆಟ್‌ ಲಿಮಿಟೆಡ್‌ ಒಡೆತನದಲ್ಲಿ ನಡೆಯುತ್ತಿದೆ ಎಂದು ಐಟಿ ಅಧಿಕಾರಿಗಳು ತಿಳಿಸಿದ್ದಾರೆ. ಜುಲೈ 23ರಂದು ಬಿಷ್ಣೋಯಿ ಅವರಿಗೆ ಸೇರಿದ 13 ಕಚೇರಿ ಹಾಗೂ ನಿವಾಸಗಳ ಮೇಲೆ ಐಟಿ ದಾಳಿ ನಡೆದಿತ್ತು. ಈ ವೇಳೆ ಲಭಿಸಿದ ದಾಖಲೆ ಪತ್ರಗಳ ಆಧಾರದ ಮೇಲೆ ಪಂಚತಾರಾ ಹೋಟೆಲ್‌ ಅವರ ಬೇನಾಮಿ ಸ್ವತ್ತು ಎನ್ನುವುದು ಖಚಿತಪಟ್ಟಿದೆ. ಕುಲದೀಪ್‌ ಮತ್ತು ಚಂದ್ರಮೋಹನ್‌ ಇಬ್ಬರೂ ಹರಿಯಾಣದ ಮಾಜಿ ಮುಖ್ಯಮಂತ್ರಿ ಭಜನ್‌ಲಾಲ್‌ ಅವರ ಪುತ್ರರು. ಕುಲದೀಪ್‌ ಹಾಲಿ ಕಾಂಗ್ರೆಸ್‌ ಶಾಸಕ. ಅವರ ಸೋದರ ಚಂದ್ರಮೋಹನ್‌ ಮಾಜಿ ಉಪ ಮುಖ್ಯಮಂತ್ರಿಯಾಗಿದ್ದಾರೆ.
ಹರಿಯಾಣ ಕಾಂಗ್ರೆಸ್‌ ಮುಖಂಡನ 150 ಕೋಟಿ ರೂ. ಬೆಲೆಯ ಬೇನಾಮಿ ಸ್ವತ್ತು ಜಪ್ತಿ
ಜುಲೈ 23ರಂದು ಬಿಷ್ಣೋಯಿ ಅವರಿಗೆ ಸೇರಿದ 13 ಕಚೇರಿ ಹಾಗೂ ನಿವಾಸಗಳ ಮೇಲೆ ಐಟಿ ದಾಳಿ ನಡೆದಿತ್ತು.
PTI 28 Aug 2019, 5:00 am