ಕ್ಯಾಬ್ ಡ್ರೈವರ್ ಖಾತೆಗೆ 7 ಕೋಟಿ ಜಮಾ!

ಹೈದ್ರಾಬಾದ್: ಹೈದ್ರಾಬಾದ್‌ನ ಊಬರ್ ಕ್ಯಾಬ್ ಡ್ರೈವರೊಬ್ಬರ ಖಾತೆಗೆ 7 ಕೋಟಿ ಹಣ ಜಮಾ ಆಗಿರುವುದು ನೋಡಿ ಐಟಿ ಅಧಿಕಾರಿಗಳೇ ದಂಗಾಗಿ ಹೋಗಿದ್ದಾರೆ

ನವೆಂಬರ್ 8ರ ಬಳಿಕ ಯಾರೆಲ್ಲಾ ಖಾತೆಯಲ್ಲಿ ಅಧಿಕ ಹಣ ಹಾಕಲಾಗಿದೆ ಎಂದು ಪರೀಕ್ಷಿಸುವಾಗ ಈ ಅಂಶ ಬೆಳಕಿಗೆ ಬಂದಿದೆ. ನೋಟು ನಿಷೇಧ ಜಾರಿಗೆ ಬಂದ ಕೆಲವು ವಾರಗಳ ಬಳಿಕ ಈ ಕ್ಯಾಬ್ ಡ್ರೈವರ್‌ನ ಖಾತೆಗೆ 7 ಕೋಟಿ ಹಣ ಸ್ಟೇಟ್ ಬ್ಯಾಂಕ್ ಆಫ್ ಹೈದ್ರಾಬಾದ್ ನ ಬ್ರಾಂಚ್‌ಯೊಂದರಲ್ಲಿ ಜಮಾ ಆಗಿದೆ.

ಜಮಾವಾಗಿರುವ ಹಣ ವ್ಯವಸ್ಥಿತ ರೀತಿಯಲ್ಲಿ ಚಿನ್ನದ ವ್ಯಾಪಾರಿಯೊಬ್ಬರ ಖಾತೆಗೆ ವರ್ಗಾವಣೆ ಆಗಿದೆ. ಹಣದ ಮೂಲದ ಕುರಿತು ಕ್ಯಾಬ್ ಡ್ರೈವರ್ ಬಳಿ ವಿಚಾರಣೆ ನಡೆಸಿದಾಗ ಆತ ಅದರ ಕುರಿತು ಯಾವುದೇ ವಿವರಣೆ ನೀಡಲಿಲ್ಲ. ಬ್ಯಾಂಕ್‌ನ ಸುತ್ತಮುತ್ತದ ಸಿಸಿಟಿವಿ ಫೂಟೇಜ್ ಪರೀಕ್ಷಿಸಿದಾಗ ಆತನ ಜೊತೆಗೆ ಮತ್ತೊಬ್ಬ ಡ್ರೈವರ್ ಸೇರಿ ಕೊಂಡು ಹಣ ತಂದು ಹಾಕಿರುವುದು ಬೆಳಕಿಗೆ ಬಂದಿದೆ.

ಇದರ ಕುರಿತು ಅವರಿಬ್ಬರನ್ನು ವಿಚಾರಣೆಗೆ ಒಳಪಡಿಸಿದಾಗ ಚಿನ್ನ ಕೊಳ್ಳಲು ಹಣವನ್ನು ಚಿನ್ನದ ವ್ಯಾಪಾರಿಯ ಖಾತೆಗೆ ವರ್ಗಾವಣೆ ಮಾಡಿರುವುದಾಗಿ ಹೇಳಿದ್ದಾರೆ. ಇದೀಗ ಆ ಹಣವನ್ನು ಮುಟ್ಟುಗೋಲು ಹಾಕಲಾಗಿದ್ದು, ಪ್ರಧಾನಿ ಮಂತ್ರಿಯವರ ಗರೀಬ್ ಕಲ್ಯಾಣ ಯೋಜನೆಯಡಿಯಲ್ಲಿ ಮೂರುವರೆ ಕೋಟಿ ತೆರಿಗೆ ನೀಡಲು ಒಪ್ಪಿದ್ದಾರೆ. ಇನ್ನು ಬ್ಯಾಂಕ್ ಖಾತೆಯಲ್ಲಿರುವ ಹಣದಲ್ಲಿ ಶೇ. 25 ದಂಡ ಕಟ್ಟಬೇಕು, ಉಳಿದ ಹಣ ನಾಲ್ಕು ವರ್ಷಗಳ ಬಳಿಕ ಬಡ್ಡಿ ರಹಿತವಾಗಿ ನೀಡುವುದಾಗಿ ಐಟಿ ಅಧಿಕಾರಿಗಳು ಹೇಳಿದ್ದಾರೆ.