ಐಎಸ್‌ಐ ಏಜೆಂಟ್‌ ಜತೆ ಸೆಕ್ಸ್‌ ಚಾಟ್‌: ಭಾರತೀಯ ವಾಯುಪಡೆ ಅಧಿಕಾರಿ ಬಂಧನ

ಹೊಸದಿಲ್ಲಿ: ಪಾಕಿಸ್ತಾನದ ಐಎಸ್‌ಐ ಜತೆ ಭಾರತೀಯ ವಾಯುಪಡೆಗೆ ಸಂಬಂಧಿಸಿದ ಕೆಲವು ಮಾಹಿತಿಗಳನ್ನು ಸೋರಿಕೆ ಮಾಡಿದ ಆರೋಪದ ಮೇಲೆ ವಾಯುಪಡೆಯ ಗ್ರೂಪ್ ಕ್ಯಾಪ್ಟನ್ ಅರುಣ್ ಮೆರ್ವಾಹ ಅವರನ್ನು ದಿಲ್ಲಿ ವಿಶೇಷ ಪೊಲೀಸ್ ಪಡೆ ಬಂಧಿಸಿದೆ.

ಅರುಣ್‌ ಮೇರ್ವಾಹರ ನಡವಳಿಕೆ ಮೇಲೆ ಸಂದೇಹ ಹೊಂದಿದ್ದ ದಿಲ್ಲಿ ವಿಶೇಷ ಪೊಲೀಸರು ಜ.31ರಂದು ಬಂಧಿಸಿ ವಿಚಾರಣೆಗೆ ಒಳಪಡಿಸಿದ್ದಾರೆ. ಈ ವೇಳೆ ಪಾಕ್‌ನ ಐಎಸ್‌ಐ ತಂಡ ಮೇರ್ವಾಹ್‌ಗೆ ಯುವತಿಯೊಬ್ಬಳ ಮೂಲಕ ಆನ್‌ಲೈನ್‌ ಚಾಟ್‌ ಮೂಲಕ ಟ್ರಾಪ್‌ ಮಾಡಿದ್ದಾರೆ. ಒಂದು ವಾರಕ್ಕಿಂತಲೂ ಅಧಿಕ ಕಾಲ ನಡೆದ ಈ ಚಾಟ್‌ನಲ್ಲಿ ಸೆಕ್ಸ್‌ ಹಾಗೂ ಇತರೇ ವಿಚಾರದ ಕುರಿತು ಸಂಭಾಷಣೆ ನಡೆದಿದೆ ಎಂದು ಮೂಲಗಳು ಟೈಮ್ಸ್‌ ಆಫ್‌ ಇಂಡಿಯಾಗೆ ಮಾಹಿತಿ ನೀಡಿದ್ದಾರೆ.

ತಮ್ಮ ಸ್ಮಾರ್ಟ್​ ಫೋನ್‌ನಲ್ಲಿ ವಾಯುಸೇನೆಯ ಗುಪ್ತ ಮಾಹಿತಿಗಳ ಫೋಟೋ ತೆಗೆದು ವ್ಯಾಟ್ಸ್ಆಪ್‌​ ಮೂಲಕ ಐಎಸ್ಐ ಏಜೆಂಟ್​ ರವಾನಿಸುತ್ತಿದ್ದರಂತೆ. ವಾಯುಸೇನೆ ಅಧಿಕಾರಿ ಅರುಣ್ ಮರ್ವಾಹ್ ಹನಿ ಟ್ರ್ಯಾಪ್‌ಗೆ ಬಲಿಯಾಗಿರುವ ಸಾಧ್ಯತೆ ಇದ್ದು, ಇದೇ ಕಾರಣಕ್ಕೆ ಅವರನ್ನು ಅಧಿಕಾರಿಗಳ ವಶಕ್ಕೆ ಪಡೆದಿದ್ದಾರೆ ಎನ್ನಲಾಗಿದೆ.

ಭಾರತೀಯ ವಾಯುಸೇನೆಯ ಹಿರಿಯ ಅಧಿಕಾರಿಯೊಬ್ಬರು ನೀಡಿದ ದೂರಿನನ್ವಯ 51 ವರ್ಷ ವಯಸ್ಸಿನ ಅರುಣ್ ಮೆರ್ವಾ ಅವರನ್ನು ಬಂಧಿಸಲಾಗಿದೆ ಎನ್ನಲಾಗಿದೆ. ಮಾಹಿತಿಗಳ ಪ್ರಕಾರ ಇವರನ್ನು ಪಟಿಯಾಲ ಹೌಸ್‌ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಯಿಗಿದ್ದು, ಲೋಧಿ ಕಾಲೋನಿಯಲ್ಲಿ ಇವರ ವಿಚಾರಣೆ ನಡೆದಿದೆ ಎಂದು ಮೂಲಗಳು ಹೇಳಿವೆ.