ಮನುಷ್ಯನ ದೇಹದ ರೋಗ ನಿರೋಧಕ ಶಕ್ತಿ ಬಗ್ಗೆ ದೇಶ ವ್ಯಾಪಿ ಸಮೀಕ್ಷೆಗೆ ಮುಂದಾದ ಐಸಿಎಂಆರ್‌!

ಹೊಸದಿಲ್ಲಿ: ಭಾರತದಲ್ಲಿ ಕೊರೊನಾ ವೈರಸ್‌ ಸೋಂಕು ಸಮುದಾಯದ ಹರಡುವಿಕೆ ಹಂತಕ್ಕೆ ತಲುಪಿದೆಯೇ ಎಂಬುದನ್ನು ಪರಿಶೀಲಿಸಲು ರಾಷ್ಟ್ರ ವ್ಯಾಪಿ ಸೆರೊಲಾಜಿಕಲ್‌ ಸಮೀಕ್ಷೆ ನಡೆಸುವುದಾಗಿ ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ(ಐಸಿಎಂಆರ್‌) ತಿಳಿಸಿದೆ.

ಅಲ್ಲದೆ ದೇಶದ ಜನರಲ್ಲಿ ಕೊರೊನಾ ವಿರುದ್ಧ ಹೋರಾಡಲು ಇರುವ ರೋಗ ನಿರೋಧಕ ಶಕ್ತಿಯ ಬಗ್ಗೆ ತಿಳಿಯುವುದು ಸಹ ಈ ಸಮೀಕ್ಷೆಯ ಉದ್ದೇಶವಾಗಿದೆ. ಇದಕ್ಕಾಗಿ ಐಸಿಎಂಆರ್‌ ವ್ಯಕ್ತಿಗಳ ರಕ್ತದಲ್ಲಿರುವ ಸೆರಂ ಅನ್ನು ಪಡೆದು ಪರೀಕ್ಷೆ ನಡೆಸಲಿದೆ. ಇದಕ್ಕೂ ಮುನ್ನ ಕಳೆದ ಏಪ್ರಿಲ್‌-ಮೇ ತಿಂಗಳಲ್ಲೂ ಐಸಿಎಂಆರ್‌ ಇಂಥದ್ದೇ ಸೆರೊಲಾಜಿಕಲ್‌ ಸಮೀಕ್ಷೆ ನಡೆಸಿತ್ತು.

ಅದರ ಫಲಿತಾಂಶಗಳನ್ನು ಇನ್ನೂ ಬಹಿರಂಗಪಡಿಸಿಲ್ಲ. ಈ ಮುನ್ನ ನಡೆಸಿದ ಸಮೀಕ್ಷೆಯಲ್ಲಿ 83 ಜಿಲ್ಲೆಗಳ ಪೈಕಿ 65 ಜಿಲ್ಲೆಗಳಲ್ಲಿನ 0.73% ಜನರು 'ಸಾರ್ಸ್‌-ಕೋವ್‌-2' ವೈರಸ್‌ ಸೋಂಕಿಗೆ ಗುರಿಯಾಗಿರುವುದು ಪತ್ತೆಯಾಗಿದೆ. ಆದರೆ ದಿಲ್ಲಿ ಸೇರಿದಂತೆ ಇನ್ನೂ ಹಲವು ನಗರಗಳ ದತ್ತಾಂಶ ಸಂಯೋಜನೆ ಕಾರ್ಯ ಮುಂದುವರಿದಿದ್ದು, ಆ ಬಳಿಕ ಹಳೆ ಸಮೀಕ್ಷೆಯ ಫಲಿತಾಂಶ ಬಿಡುಗಡೆ ಮಾಡಲಾಗುವುದು ಎಂದು ಮೂಲಗಳು ತಿಳಿಸಿವೆ.

ಏನಿದು ಸೇರಂ ಸಮೀಕ್ಷೆ? ಮನುಷ್ಯನ ದೇಹದಲ್ಲಿ ರಕ್ತದಲ್ಲಿರುವ ಸೇರಂನ್ನ ವೈದ್ಯಕೀಯ ಅಥವಾ ವೈಜ್ಞಾನಿಕ ಅಧ್ಯಯನ ನಡೆಸುವ ಮೂಲಕ ಮನುಷ್ಯನ ದೇಹದಲ್ಲಿರುವ ರೋಗ ಪತ್ತೆ ಮಾಡಬಹುದು. ಅಲ್ಲದೇ ಅಧ್ಯಯನದ ಮೂಲಕ ಮನುಷ್ಯನ ದೇಹದಲ್ಲಿ ಯಾವ ರೀತಿ ರೋಗ ನಿರೋಧಕ ಶಕ್ತಿ ಇದೆ ಎಂಬುವುದನ್ನ ತಿಳಿದುಕೊಳ್ಳಬಹುದು.