ರಫೇಲ್‌ ಬಂದರೆ ಆಗಸದಲ್ಲಿ ಭಾರತ ಸೂಪರ್‌ ಪವರ್‌!

ಗ್ವಾಲಿಯರ್‌: ರಫೇಲ್‌ ಯುದ್ಧ ವಿಮಾನವು ಮಿರಾಜ್‌-2000 ಯುದ್ಧವಿಮಾನಕ್ಕಿಂತ ದುಪ್ಪಟ್ಟು ಸಾಮರ್ಥ್ಯ‌ ಹೊಂದಿದೆ ಎಂದು ಪಶ್ಚಿಮ ವಲಯದ ಏರ್‌ ಕಮಾಂಡರ್‌ ಆಗಿರುವ ಏರ್‌ ಮಾರ್ಷಲ್‌ ಆರ್‌.ನಂಬಿಯಾರ್‌ ಹೇಳಿದ್ದಾರೆ.
ಕಾರ್ಗಿಲ್‌ ಯುದ್ಧ ಗೆಲುವಿನ 20ನೇ ವರ್ಷದ 'ವಿಜಯ ದಿವಸ' ಆಚರಣೆ ಸಿದ್ಧತೆಗಳನ್ನು ಪರಿಶೀಲಿಸಿದ ಬಳಿಕ ಮಾಧ್ಯಮಗಳ ಜತೆ ಮಾತನಾಡಿದ ಅವರು, ''ಕಾರ್ಗಿಲ್‌ ಯುದ್ಧದ ಗೆಲುವಿನಲ್ಲಿ ಮಿರಾಜ್‌-2000 ಯುದ್ಧ ವಿಮಾನಗಳು ಪ್ರಮುಖ ಪಾತ್ರ ವಹಿಸಿವೆ. ಆದರೆ ಹಲವು ವಿಶೇಷಗಳಿಂದ ಕೂಡಿರುವ ರಫೇಲ್‌ ನಮ್ಮ ಬತ್ತಳಿಕೆ ಸೇರಿದರೆ ಆಗಸದಲ್ಲಿ ಭಾರತವೇ ಸೂಪರ್‌ ಪವರ್‌ ಆಗಲಿದೆ'' ಎಂದು ಹೇಳಿದರು.
''ಕಾರ್ಗಿಲ್‌ ಯುದ್ಧದ ಆರಂಭದಲ್ಲಿ ಪಾಕಿಸ್ತಾನವು ಎರಡು ಯುದ್ಧ ವಿಮಾನ ಹಾಗೂ ಒಂದು ಹೆಲಿಕಾಪ್ಟರ್‌ ಹೊಡೆದುರುಳಿಸಿದ್ದರಿಂದ ವಾಯುಪಡೆಯ ನೈತಿಕ ಸ್ಥೈರ್ಯ ಸ್ವಲ್ಪಮಟ್ಟಿಗೆ ಕುಂದಿತ್ತು. ನಂತರ ಚೇತರಿಸಿಕೊಂಡು ತಕ್ಕ ತಿರುಗೇಟು ನೀಡಿತು,'' ಎಂದು ನಂಬಿಯಾರ್‌ ವಿವರಿಸಿದರು.
ಫ್ರಾನ್ಸ್‌ನಿಂದ ರಫೇಲ್‌ ಯುದ್ಧವಿಮಾನಗಳ ಖರೀದಿಗೆ ಭಾರತ ನಿರ್ಧರಿಸಿದ್ದು, ಮೂರು ತಿಂಗಳ ಒಳಗೆ ಅಂದರೆ ಸೆಪ್ಟೆಂಬರ್‌ ಕೊನೆಯೊಳಗೆ 36 ವಿಮಾನಗಳು ವಾಯುಪಡೆಗೆ ಹಸ್ತಾಂತರವಾಗುವ ಸಾಧ್ಯತೆ ಇದೆ.