ಮುಖ್ಯಮಂತ್ರಿಗಳೊಂದಿಗೆ ಪ್ರಧಾನಿ ಸಂವಾದ: '10 ರಾಜ್ಯಗಳಲ್ಲಿ ಕೊರೊನಾವನ್ನು ಮಣಿಸಿದರೆ ದೇಶವೇ ಗೆದ್ದಂತೆ'!

ಹೊಸದಿಲ್ಲಿ: ದೇಶದ ಒಟ್ಟು ಕೊರೊನಾ ಪ್ರಕರಣಗಳ ಪೈಕಿ ಶೇ.80ರಷ್ಟು ಪಾಲು ಹೊಂದಿರುವ ಹತ್ತು ರಾಜ್ಯಗಳಲ್ಲಿ ಕೊರೊನಾ ಸೋಂಕು ಪ್ರಸರಣ ನಿಯಂತ್ರಿ­ಸಿದರೆ ಕೋವಿಡ್‌­ -19 ವಿರುದ್ಧದ ಸಮರದಲ್ಲಿಇಡೀ ದೇಶ ಗೆದ್ದಂತೆ ಎಂದು ಪ್ರಧಾನಿ ನರೇಂದ್ರ ಮೋದಿ ಅಭಿಪ್ರಾಯ­ಪಟ್ಟಿದ್ದಾರೆ.

ಹೆಚ್ಚು ಕೊರೊನಾ ಸೋಂಕಿ­ತರನ್ನು ಹೊಂದಿ­ರುವ ಕರ್ನಾಟಕ, ಆಂಧ್ರ­ಪ್ರದೇಶ, ತಮಿಳುನಾಡು, ಪಶ್ಚಿಮ ಬಂಗಾಳ, ಮಹಾರಾಷ್ಟ್ರ, ಪಂಜಾಬ್‌, ಬಿಹಾರ, ಗುಜರಾತ್‌, ತೆಲಂಗಾಣ ಮತ್ತು ಉತ್ತರ ಪ್ರದೇಶದ ಮುಖ್ಯಮಂತ್ರಿಗಳ ಜತೆ ಮಂಗಳವಾರ ವಿಡಿಯೊ ಕಾನ್ಫರೆನ್ಸ್‌ ಮೂಲಕ ಪ್ರಧಾನಿ ಸಂವಾದ ನಡೆಸಿದರು.

''ಕೊರೊನಾ ನಿಯಂತ್ರಣದ ವಿಚಾರ­ದಲ್ಲಿ ಪ್ರತಿ ರಾಜ್ಯವೂ ಗರಿಷ್ಠ ಸಹಕಾರ ನೀಡಿದೆ. ಇದು ಟೀಮ್‌ ಇಂಡಿಯಾದ ಪ್ರದರ್ಶನ. ಆಸ್ಪತ್ರೆಗಳು ಮತ್ತು ಆರೋಗ್ಯ ಕಾರ್ಯಕರ್ತರು ಎದುರಿಸುತ್ತಿರುವ ಸವಾ­ಲುಗಳು ಮತ್ತು ಒತ್ತಡಗಳನ್ನು ನಾವು ಈ ವೇಳೆ ಗಮನಿಸಬೇಕು. ಸೋಂಕು ನಿಯಂತ್ರಣದಲ್ಲಿ ಕಂಟೈನ್‌ಮೆಂಟ್‌, ಸಂಪರ್ಕ ಪತ್ತೆ ಮತ್ತು ಕಣ್ಗಾವಲು ಅತ್ಯಂತ ಪರಿಣಾಮಕಾರಿ ಅಸ್ತ್ರಗಳಾಗಿವೆ. ಈ ಸೂತ್ರ­ಗಳನ್ನು ರಾಜ್ಯಗಳು ಕಟ್ಟುನಿಟ್ಟಾಗಿ ಪಾಲಿಸ­ಬೇಕು,'' ಎಂದು ಸಲಹೆ ಮಾಡಿದರು.

ದಿನನಿತ್ಯ ಸೋಂಕಿತರ ಪತ್ತೆಗಾಗಿ ನಡೆಸಲಾಗುವ ಪರೀಕ್ಷೆಗಳ ಸಂಖ್ಯೆ ಸುಮಾರು 7 ಲಕ್ಷ ತಲುಪಿದೆ. ತಪಾಸಣೆ ಸಂಖ್ಯೆ ನಿರಂತರವಾಗಿ ಹೆಚ್ಚುತ್ತಿದೆ. ಇದು ರೋಗವನ್ನು ಆರಂಭದಲ್ಲೇ ಗುರುತಿಸಲು ಮತ್ತು ನಿಯಂತ್ರಿಸಲು ನೆರವಾಗಿದೆ. ವಿಶ್ವದಲ್ಲೇ ಅತೀ ಕಡಿಮೆ ಸರಾಸರಿ ಮರಣ ಪ್ರಮಾಣ ಇರುವುದು ಭಾರತದಲ್ಲಿ ಮಾತ್ರ ಎನ್ನುವುದು ಸಮಾಧಾನಕರ ಸಂಗತಿ.

ಕೊರೊನಾ ಎಫೆಕ್ಟ್‌: ಪ್ರಯಾಣಿಕ ರೈಲು ಸಂಚಾರ ಸದ್ಯಕ್ಕಿಲ್ಲ ಎಂದ ಇಲಾಖೆ!
ಚೇತರಿಕೆ ಪ್ರಮಾಣ ಹೆಚ್ಚುತ್ತಿರುವುದರಿಂದ ಸಕ್ರಿಯ ಪ್ರಕರಣಗಳ ಸಂಖ್ಯೆ ಕಡಿಮೆಯಾಗುತ್ತಿದೆ. ಹೀಗಾಗಿ ಮರಣ ಪ್ರಮಾಣವನ್ನು ಶೇ.1 ಕ್ಕಿಂತ ಕಡಿಮೆ ಮಾಡುವ ಗುರಿಯನ್ನು ಶೀಘ್ರದಲ್ಲೇ ಸಾಧಿಸಬಹುದು,'' ಎಂದು ಪ್ರಧಾನಿ ವಿಶ್ವಾಸ ವ್ಯಕ್ತಪಡಿಸಿದರು.