ಹ್ಯಾಕರ್‌ಗಳಿಂದ ಫೇಸ್ಬುಕ್ ಫ್ರೆಂಡ್ ರಿಕ್ವೆಸ್ಟ್ ಬರಬಹುದು ಹುಷಾರ್: ಸಾಮಾಜಿಕ ಜಾಲತಾಣದಲ್ಲಿ ವೈರಲ್

ಹೊಸದಿಲ್ಲಿ: ನಿಮಗೆ ಹ್ಯಾಕರ್‌ಗಳಿಂದ ಫೇಸ್‌ಬುಕ್ ಫ್ರೆಂಡ್ ರಿಕ್ವೆಸ್ಟ್ ಬರಬಹುದು ಹುಷಾರ್ ಅಂತ ಯಾರಾದರೂ ಸಂದೇಶ ಕಳಿಸುತ್ತಿದ್ದಾರಾ. ಹೀಗೆ ಕಳುಹಿಸಿದರೆ, ಈ ಬಗ್ಗೆ ನೀವು ಎಚ್ಚರವಿರಬೇಕಾದ ಅಗತ್ಯವಿಲ್ಲ. ಯಾಕೆಂದರೆ, ಇದು ಸುಳ್ಳು ಸಂದೇಶವಾಗಿದೆ.

ಜೇಡೆನ್ ಕೆ. ಸ್ಮಿತ್ ಎಂಬ ಹ್ಯಾಕರ್ ನಿಮಗೆ ಫೇಸ್‌ಬುಕ್‌ನಲ್ಲಿ ಸ್ನೇಹಿತನಾಗಲು ಮನವಿ ಕಳಿಸುತ್ತಾರೆ ಎಂಬ ಸಂದೇಶವೊಂದು ಸಾಮಾಜಿಕ ಜಾಲತಾಣಗಳಲ್ಲಿ
ಹರಿದಾಡುತ್ತಿದೆ. ಅಲ್ಲದೆ, ಇದೇ ಹೆಸರಿನ ಅಕೌಂಟ್‌ನಿಂದ ಅನೇಕ ಸಂದೇಶಗಳ ಪೋಸ್ಟ್‌ಗಳು ಸಹ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಆದರೆ, ಈ ಸಂದೇಶ ಸುಳ್ಳು ಎಂಬುದು ಸಾಬೀತಾಗಿದೆ. ಹಾಗೂ, ಕಳೆದೊಂದು ವರ್ಷದಿಂದ ಈ ಸುಳ್ಳು ಸಂದೇಶಗಳನ್ನು ಕಳಿಸಲಾಗ್ತಿದೆ. ಹೀಗಾಗಿ ನೀವು, ಈ ರೀತಿಯ ಸಂದೇಶಗಳಿಗೆ ತಲೆಕೆಡಿಸಿಕೊಳ್ಳುವ ಅಗತ್ಯವಿಲ್ಲ.

ಈ ಸುಳ್ಳು ಸಂದೇಶಗಳನ್ನು ಅನೇಕರು ಕಳಿಸುತ್ತಿರುವುದಲ್ಲದೆ, ನಿಮ್ಮ ಎಲ್ಲ ಸ್ನೇಹಿತರಿಗೂ ಇದನ್ನು ಕಳಿಸಿ. ನಿಮ್ಮ ಫೇಸ್‌ಬುಕ್, ಮೆಸೆಂಜರ್‌ ಲಿಸ್ಟ್‌ನಲ್ಲಿರುವವರಿಗೆ ಎಲ್ಲರಿಗೆ ಈ ಸಂದೇಶ ರವಾನಿಸಿ ಎಂದು ಹಲವರು ಸಾಮಾಜಿಕ ಜಾಲತಾಣಗಳಲ್ಲಿ ಶೇರ್ ಮಾಡುತ್ತಿದ್ದಾರೆ. ಜೇಡೆನ್ ಕೆಸ್ಮಿತ್ ಎಂಬುವರು ಹ್ಯಾಕರ್ ಆಗಿದ್ದಾರೆ. ಅಲ್ಲದೆ, ಅವರು ಫೇಸ್‌ಬುಕ್ ಫ್ರೆಂಡ್ ರಿಕ್ವೆಸ್ಟ್ ಕಳಿಸುತ್ತಾರೆ. ಫೇಸ್ಬುಕ್ ಸ್ನೇಹಿತರಾಗುವ ಮನವಿಗೆ ಒಪ್ಪಿಕೊಂಡರೆ ನಿಮ್ಮ ಅಕೌಂಟ್ ಅನ್ನು ಹ್ಯಾಕ್ ಮಾಡುತ್ತಾರೆ ಎಂಬ ಸಂದೇಶವು ಕಳೆದೊಂದು ವರ್ಷದಿಂದ ಹರಿದಾಡುತ್ತಿದೆ. ಇನ್ನು, ಈ ರೀತಿಯ ಸುಳ್ಳು ಪೋಸ್ಟ್‌ಗಳನ್ನು ಹಾಕಿ ಮಾಲ್‌ವೇರ್ ಅಥವಾ ವೈರಸ್ ಹರಡಿಸುವ ಸಾಧ್ಯತೆಯೂ ಇದೆ. ಹೀಗಾಗಿ, ಇಂತಹ ಸಂದೇಶಗಳ ಮೇಲೆಕ್ಲಿಕ್ ಮಾಡಬೇಡಿ ಎಂದು ಅನೇಕ ತಜ್ಙರು ನೆಟ್ಟಿಗರಿಗೆ ಎಚ್ಚರಿಕೆ ನೀಡಿದ್ದಾರೆ.