‘ಫಿಟ್ ಇಂಡಿಯಾ ಅಭಿಯಾನ’ದ ಮಹತ್ವ ಏನು?: ದಢೂತಿಗಳ ನಾಡಾಗುತ್ತಿದ್ಯಾ ಭಾರತ?

ಹೊಸದಿಲ್ಲಿ: ನಮ್ಮ ಎತ್ತರಕ್ಕೆ ಅನುಗುಣವಾಗಿ ನಮ್ಮ ದೇಹದ ತೂಕ ಇರಬೇಕು. ಇದನ್ನು ಬಾಡಿ ಮಾಸ್ ಇಂಡೆಕ್ಸ್ (BMI) ಅಂತಾರೆ. ನಿಮ್ಮ BMI ಕನಿಷ್ಟ 18.5ರಷ್ಟಿರಬೇಕು. ಗರಿಷ್ಟ 25 ದಾಟಬಾರದು. ಹಾಗಿದ್ದಾಗ ಮಾತ್ರ ನಾವು ಆರೋಗ್ಯವಾಗಿದ್ದೇವೆ ಎಂದು ಅರ್ಥ. ಆದ್ರೆ, ಬಹುತೇಕ ಭಾರತೀಯರ ದೇಹಸ್ಥಿತಿ ‘ನಾರ್ಮಲ್’ ಆಗಿಲ್ಲ!

ನಾವೀಗ 2005-06 ಹಾಗೂ 2015-16ರ ಅಂಕಿಅಂಶಗಳತ್ತ ಗಮನ ಹರಿಸೋಣ. 2005-06ರಲ್ಲಿ ಶೇ. 35.6ರಷ್ಟು ಭಾರತೀಯ ಮಹಿಳೆಯರು ತೆಳ್ಳಗಿದ್ದರು. ಫಿಟ್ ಆಗಿದ್ದರು. ಆದ್ರೆ, 2015-16ರಲ್ಲಿ ಆ ಪ್ರಮಾಣ ಶೇ. 22.9ಕ್ಕೆ ಕುಸಿದಿದೆ. ಇನ್ನು 2005-06ರಲ್ಲಿ ದೇಶದಲ್ಲಿ ಶೇ. 12.6ರಷ್ಟು ಮಹಿಳೆಯರು ದಢೂತಿಗಳಾಗಿದ್ದರು. ಆದ್ರೆ, ಇದೀಗ ದಢೂತಿ ಮಹಿಳೆಯರ ಪ್ರಮಾಣ ಶೇ. 20.7ಕ್ಕೆ ಏರಿಕೆಯಾಗಿಬಿಟ್ಟಿದೆ.

ಭಾರತೀಯ ಪುರುಷರ ದೇಹದ ಕಥೆ ಕೂಡಾ ಮಹಿಳೆಯರಿಗಿಂತಾ ಭಿನ್ನವಾಗೇನೂ ಇಲ್ಲ. 2005-06ರಲ್ಲಿ ದೇಶದ ಶೇ. 34.2ರಷ್ಟು ಪುರುಷರು ತೆಳ್ಳಗೆ, ಫಿಟ್ ಆಗಿ, ಆರೋಗ್ಯವಂತರಾಗಿ ಇದ್ದರು. ಆದ್ರೆ, 2015-16ರಲ್ಲಿ ಫಿಟ್ ಆಗಿರುವ ಪುರುಷರ ಪ್ರಮಾಣ 20.2ಕ್ಕೆ ಕುಸಿದಿದೆ. ಇನ್ನು 2005-06ರಲ್ಲಿ ಭಾರತದಲ್ಲಿ ಶೇ. 9.3ರಷ್ಟು ಪುರುಷರು ದಢೂತಿಗಳಾಗಿದ್ದರು. ಆದ್ರೆ 2015-16ರಲ್ಲಿ ದಢೂತಿ ಪುರುಷರ ಪ್ರಮಾಣ 18.9ಕ್ಕೆ ಏರಿಕೆ ಕಂಡಿದೆ.

ದೇಶದ ಎಲ್ಲಾ ಮಹಾನಗರಗಳಲ್ಲಿ ರಾಷ್ಟ್ರೀಯ ಕೌಟುಂಬಿಕ ಆರೋಗ್ಯ ಸಮೀಕ್ಷೆ ನಡೆಸಿದ ವೇಳೆ ಬೆಳಕಿಗೆ ಬಂದ ಆಘಾತಕಾರಿ ಅಂಕಿಅಂಶ ಇದು. ಸಿರಿವಂತರು, ನಡುವಯಸ್ಸಿನವರು ಹಾಗೂ ನಗರಗಳಲ್ಲೇ ಹೆಚ್ಚಾಗಿ ವಾಸಿಸುವವರು ತುಂಬಾ ಬೇಗ ದಢೂತಿಗಳಾಗಿ ಬದಲಾಗುತ್ತಿದ್ದಾರೆ. ಅದ್ರಲ್ಲೂ ಮಹಿಳೆಯರು 30 ವರ್ಷ ದಾಟಿದ ಬಳಿಕ ಪುರುಷರಿಗಿಂತಾ ಅತಿ ವೇಗವಾಗಿ ದೇಹದ ತೂಕ ಹೆಚ್ಚಿಸಿಕೊಂಡು ದಢೂತಿಗಳಾಗಿ ಬದಲಾಗುತ್ತಿದ್ದಾರೆ. ಮಹಿಳೆಯರ ದೈಹಿಕ ಚಟುವಟಿಕೆ ಪುರುಷರಿಗಿಂತಾ ಕಡಿಮೆ ಇರೋದೇ ಇದಕ್ಕೆ ಕಾರಣ ಎನ್ನಬಹುದು.

ಮತ್ತೊಂದು ಅಂಕಿ ಅಂಶದ ಪ್ರಕಾರ ನವದೆಹಲಿಗೆ ಹೋಲಿಸಿದ್ರೆ ಬೆಂಗಳೂರಿನ ಪುರುಷರೇ ಹೆಚ್ಚು ದಢೂತಿಗಳು ಎಂದು ಕಂಡುಬಂದಿದೆ. ಆಹಾರ ಕ್ರಮ ಕೂಡಾ ದೇಹದ ತೂಕ ಹೆಚ್ಚಳಕ್ಕೆ ಕಾರಣ ಅನ್ನೋದು ತಜ್ಞರ ಅಭಿಪ್ರಾಯ.