ಹಿಟ್ಲರ್‌ಗೆ ಆರ್‌ಎಸ್‌ಎಸ್‌ ಹೋಲಿಸಿದ ಇಮ್ರಾನ್‌ ಖಾನ್‌

ಹೊಸದಿಲ್ಲಿ: ಜಮ್ಮು ಮತ್ತು ಕಾಶ್ಮೀರದಲ್ಲಿ 370ನೇ ವಿಧಿ ರದ್ದತಿಯಿಂದ ಭಾರಿ ಅಸಮಾಧಾನಗೊಂಡಿರುವ ಪಾಕಿಸ್ತಾನ ಪ್ರಧಾನಿ ಇಮ್ರಾನ್‌ ಖಾನ್‌, ರಾಷ್ಟ್ರೀಯ ಸ್ವಯಂ ಸೇವಕ ಸಂಘ(ಆರ್‌ಎಸ್‌ಎಸ್‌) ವಿರುದ್ಧ ಭಾನುವಾರ ಟ್ವಿಟರ್‌ನಲ್ಲಿ ಕಿಡಿಕಾರಿದ್ದಾರೆ.
ನನಗೆ ಆರ್‌ಎಸ್‌ಎಸ್‌ನ ಹಿಂದೂ ಸಾರ್ವಭೌಮತ್ವ ಸಿದ್ಧಾಂತದಿಂದ ತುಂಬ ಭಯವಾಗುತ್ತಿದೆ. ಹಿಟ್ಲರ್‌ನ ನಾಜಿ ಸರ್ವಾಧಿಕಾರದಂತೆ ಭಾರತ ಆಕ್ರಮಿತ ಕಾಶ್ಮೀರದಲ್ಲಿಯೂ ಆರ್‌ಎಸ್‌ಎಸ್‌ ಪಾರಮ್ಯ ಮೆರೆಯಲಿದೆ. ಇದಕ್ಕೆ ಕೊನೆಯಿಲ್ಲ. ಪರಿಣಾಮ ಮೊದಲು ಭಾರತದಲ್ಲಿ ಮುಸ್ಲಿಮರು ಬಳಿಕ ಪಾಕಿಸ್ತಾನದಲ್ಲಿ ಮುಸ್ಲಿಮರನ್ನು ಗುರಿಯಾಗಿಸಲಾಗುತ್ತದೆ ಎಂದು ಟ್ವೀಟ್‌ ಮಾಡಿದ್ದಾರೆ.

ಇದಕ್ಕೆ ಟ್ವೀಟಿಗರಿಂದ ಭಾರಿ ವಿರೋಧ ವ್ಯಕ್ತವಾಗಿದ್ದು, ಇಮ್ರಾನ್‌ ಖಾನ್‌ ಅವರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.

ನಿಜವಾದ ನಾಜಿಗಳು ನೀವು. ಪಾಕಿಸ್ತಾನ ಸೇನಾಧಿಕಾರಿಗಳು, ಐಎಸ್‌ಐನಿಂದ ಹಲವು ಭಯಾನಕ ಸಂಚು ಹಾಗೂ ಹತ್ಯೆಗಳು ನಡೆಯುತ್ತಿದೆ. ಪಾಕಿಸ್ತಾನದ ಕೀಳುಮಟ್ಟವನ್ನು ಮೊದಲು ಸರಿಪಡಿಸಿಕೊಳ್ಳಿ ಎಂದು ಖಾನ್‌ಗೆ ಹಲವು ಟ್ವೀಟಿಗರು ತಿರುಗೇಟು ಕೊಟ್ಟಿದ್ದಾರೆ.