ಮುಂಬಯಿ: ಇಪ್ಪತ್ತೆರಡು ತಾಸುಗಳ ಅವಧಿಯಲ್ಲಿ, ಒಂದೇ ಒಂದು ರನ್‌ ವೇ ಬಳಸಿಕೊಂಡು 969 ವಿಮಾನಗಳ ಸಂಚಾರ ನಿರ್ವಹಣೆ ಮಾಡುವ ಮೂಲಕ ಮುಂಬಯಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವು ಹೊಸ ದಾಖಲೆ ಬರೆದಿದೆ.
ಕಳೆದ ಶುಕ್ರವಾರ, ವಿಮಾನಗಳ ಈ ಮಹಾಪೂರವನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ ಹೆಗ್ಗಳಿಗೆ ಹಾಗೂ ದಾಖಲೆಯ ಶ್ರೇಯಸ್ಸು ಮುಂಬಯಿ ಏರ್‌ಪೋರ್ಟ್‌ಗೆ ಸಂದಿದೆ. ಲಂಡನ್‌ನ ಗ್ಯಾಟ್‌ವಿಕ್‌ ಹೊರತು ಪಡಿಸಿದರೆ ಇಂತದ್ದೊಂದು ಸಂಚಾರ ದಟ್ಟಣೆ ನಿಭಾಯಿಸಿದ ಏರ್‌ಪೋರ್ಟ್‌ ಜಗತ್ತಿನಲ್ಲಿ ಬೇರೊಂದಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ನ್ಯೂಯಾರ್ಕ್‌, ಲಂಡನ್‌ ಮತ್ತು ದಿಲ್ಲಿಯಂತಹ ಮೆಗಾ ಸಿಟಿಗಳು ಎರಡು ಅಥವಾ ಅದಕ್ಕಿಂತ ಹೆಚ್ಚಿನ ರನ್‌ ವೇಗಳನ್ನು ಹೊಂದಿದ್ದು ಏಕಕಾಲಕ್ಕೆ ಬಂದು ಹೋಗುವ ಹಲವಾರು ವಿಮಾನಗಳ ಸಂಚಾರ ದಟ್ಟಣೆಯನ್ನು ಸುಲಭವಾಗಿ ನಿರ್ವಹಿಸುತ್ತವೆ. ಆದರೆ ಮುಂಬಯಿ ನಿಲ್ದಾಣದ್ದು ಬೇರೆಯದೇ ಕಥೆ. ಇಲ್ಲಿ ಹೆಸರಿಗೆ ಇರುವುದು ಎರಡು ನಿಲ್ದಾಣ. ಆದರೆ ಅವು ಪ್ರತ್ಯೇಕವಾಗಿಲ್ಲ. ಒಂದನ್ನೊಂದು ಹಾಯ್ದು ಹೋಗುತ್ತವೆಯಾದ್ದರಿಂದ ಒಂದು ಬಾರಿಗೆ ಒಂದು ವಿಮಾನ ಮಾತ್ರ ಸಂಚರಿಸಲು ಸಾಧ್ಯ. ಆದ್ದರಿಂದ ಇದನ್ನು ತಾಂತ್ರಿಕವಾಗಿ ಸಿಂಗಲ್‌ ರನ್‌ವೇ ಪಟ್ಟಿಗೆ ಸೇರಿಸಲಾಗಿದೆ.
ದಾಖಲೆ ಸುಧಾರಣೆ: ಈ ಹಿಂದೆ ಒಂದೇ ದಿನ 900 ವಿಮಾನಗಳ ಸಂಚಾರವನ್ನು ನಿರ್ವಹಿಸುವ ಮೂಲಕ ಇದೇ ಏರ್‌ಪೋರ್ಟ್‌ ದಾಖಲೆ ನಿರ್ಮಿಸಿತ್ತು. ಶುಕ್ರವಾರ 969 ವಿಮಾನಗಳನ್ನು ನಿರ್ವಹಿಸುವುದರೊಂದಿಗೆ ತನ್ನದೇ ದಾಖಲೆಯನ್ನು ಇನ್ನಷ್ಟು ಸುಧಾರಣೆ ಮಾಡಿದೆ. ನಿಗದಿತ ವೇಳಾಪಟ್ಟಿಯಿಂದ ಹೊರತಾದ ಚಾರ್ಟರ್‌ ಮತ್ತು ಖಾಸಗಿ ವಿಮಾನಗಳ ಒತ್ತಡವು ಶುಕ್ರವಾರ ದಿಢೀರನೆ ಹೆಚ್ಚಾಗಿತ್ತು ಎಂದು ಏರ್‌ಪೋರ್ಟ್‌ ವಕ್ತಾರರು ಹೇಳಿದ್ದಾರೆ.
ಏಕಕಾಲಕ್ಕೆ ಬಳಕೆಯಾಗದ ಇಲ್ಲಿನ ಎರಡು ರನ್‌ವೇಗಳನ್ನು ಶಿಫ್ಟ್‌ ಆಧಾರದ ಮೇಲೆ ಬಳಸಿಕೊಳ್ಳಲಾಗುತ್ತಿದೆ. ಶುಕ್ರವಾರ ಕೂಡ ಬೆಳಗ್ಗೆ ಒಂದು, ಸಂಜೆ ಮತ್ತೊಂದು ರನ್‌ ವೇ ಬಳಸಿಕೊಳ್ಳಲಾಯಿತು. ವಿಮಾನಯಾನ ಇಲಾಖೆ ಅಂದಾಜಿಸಿರುವ ಪ್ರಕಾರ, ಗಂಟೆಗೆ ಗರಿಷ್ಠ 46 ವಿಮಾನಗಳ ಸಂಚಾರವನ್ನು ಈ ನಿಲ್ದಾಣ ನಿರ್ವಹಿಸಬಹುದಾಗಿದೆ. ಆದರೆ, ಈ ಅಂದಾಜನ್ನು ಮೀರಿ ಶುಕ್ರವಾರ ಗಂಟೆಗೆ 50 ವಿಮಾನಗಳ ಸಂಚಾರ ನಿರ್ವಹಣೆ ಮಾಡಲಾಗಿದೆ.
ಲಂಡನ್‌ನ ಗ್ಯಾಟ್‌ವಿಕ್‌ ವಿಮಾನ ನಿಲ್ದಾಣವು ಗಂಟೆಗೆ 50 ವಿಮಾನಗಳ ಸಂಚಾರ ದಟ್ಟಣೆಯನ್ನು ನಿಭಾಯಿಸುವ ಮೂಲಕ ಜಗತ್ತಿನ ಪ್ರಥಮ ಒತ್ತಡ ನಿರ್ವಹಣಾ ಏರ್‌ಪೋರ್ಟ್‌ ಎನಿಸಿದೆ.
In 24 hours, Mumbai airport handles 969 flights; sets new world record