ದೇಶದಲ್ಲಿ ಮೊದಲ ಬಾರಿಗೆ ಬಾಲಾಪರಾಧಿಗೆ ಜೀವಾವಧಿ

ಹೈದರಾಬಾದ್‌: ಎರಡು ವರ್ಷಗಳ ಹಿಂದೆ ಅಪ್ರಾಪ್ತ ಬಾಲಕನೊಂದಿಗೆ ಅನೈಸರ್ಗಿಕ ಲೈಂಗಿಕ ಕ್ರಿಯೆ ನಡೆಸಿದ ಆರೋಪದ ಮೇರೆಗೆ ಗುರುವಾರ 19 ವರ್ಷದ ಯುವಕನೊಬ್ಬನಿಗೆ ಕೋರ್ಟ್‌ ಕಠಿಣ ಜೀವಾವಧಿ ಶಿಕ್ಷೆ ವಿಧಿಸಿದೆ. ''ಆರೋಪಿ ಕೃತ್ಯ ಎಸಗಿದ್ದಾಗ 17 ವರ್ಷದವನಾಗಿದ್ದ . ಹಾಗಾಗಿ ಬಾಲಾಪರಾಧಿಗೆ ದೇಶದಲ್ಲಿ ಇದೇ ಮೊದಲ ಬಾರಿಗೆ ಜೀವಾವಧಿ ಶಿಕ್ಷೆ ನೀಡಲಾಗಿದೆ,'' ಎಂದು ತೆಲಂಗಾಣ ಪೊಲೀಸರು ತಿಳಿಸಿದ್ದಾರೆ.

ಅಪರಾಧಿಗೆ ಕೋರ್ಟ್‌ 5 ಸಾವಿರ ರೂ. ದಂಡ ಕೂಡ ವಿಧಿಸಿದೆ. 2017ರ ಜೂನ್‌ 28ರಂದು ಅಪರಾಧಿ, 11 ವರ್ಷದ ಅಪ್ರಾಪ್ತ ಬಾಲಕನನ್ನು ಸರಕಾರಿ ಶಾಲಾ ಮೈದಾನದಿಂದ ಅಪಹರಿಸಿದ್ದ. ಆತನೊಂದಿಗೆ ಬಲವಂತದಿಂದ ಲೈಂಗಿಕ ಕ್ರಿಯೆ ನಡೆಸಿದ್ದಲ್ಲದೇ ಬಾಲಕನ ತಲೆಗೆ ಕಬ್ಬಿಣದ ಪೈಪ್‌ನಿಂದ ಹೊಡೆದು ಹತ್ಯೆಗೈದಿದ್ದ. ಮೃತದೇಹವನ್ನು ಎಂಟು ದಿನ ಅಡಗಿಸಿಟ್ಟಿದ್ದ.