ಗುರು ನಿಮ್ಮ ವಿರುದ್ಧ ಕೇಸ್‌ ಹಾಕ್ತಿದ್ದೀನಿ ಆಶೀರ್ವದಿಸಿ: ಕಪಿಲ್‌ ಮಿಶ್ರಾ

ಹೊಸದಿಲ್ಲಿ: ಸ್ಥಾನಕ್ಕೆ ರಾಜೀನಾಮೆ ನೀಡಿ ಚುನಾವಣೆಯಲ್ಲಿ ಸ್ಪರ್ಧಿಸಿ ಗೆಲುವು ಸಾಧಿಸಿ ತೋರಿಸಿ ಎಂದು ದಿಲ್ಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್‌ಗೆ ಜಲಸಂಪನ್ಮೂಲ ಖಾತೆಯ ಮಾಜಿ ಸಚಿವ ಕಪಿಲ್ ಮಿಶ್ರಾ ಬಹಿರಂಗ ಸವಾಲು ಎಸೆದಿದ್ದಾರೆ.

'ನೀವು ನನ್ನನ್ನು ವಿಧಾನಸಭೆಯಿಂದ ತೆಗೆದುಹಾಕಲು ಯತ್ನಿಸುತ್ತಿದ್ದೀರಿ. ನೀವು ಯಾವುದೇ ಕ್ಷೇತ್ರದಿಂದ ನನ್ನ ವಿರುದ್ಧ ಚುನಾವಣೆಯಲ್ಲಿ ಸ್ಪರ್ಧಿಸಿ ತೋರಿಸಿ. ದಿಲ್ಲಿ ಜನ ನಿಮ್ಮನ್ನು ಬೆಂಬಲಿಸುತ್ತಾರೆಂದು ನಂಬಿದ್ದರೆ, ನಾನು ರಾಜೀನಾಮೆ ನೀಡಲು ಸಹ ಸಿದ್ಧ' ಎಂದಿದ್ದಾರೆ.

'ಗುರು' ಕೇಜ್ರಿವಾಲ್ ಅವರೇ ನಿಮ್ಮ ವಿರುದ್ಧ ಕೇಸ್‌ ಹಾಕುತ್ತಿದ್ದೇನೆ. ನನ್ನನ್ನು ಆಶೀರ್ವದಿಸಿ,' ಎಂದು ಭಾರವಾದ ಹೃದಯದಿಂದ ಹೇಳಿದ್ದಾರೆ.

'ನಾನು ಅರವಿಂದ್ ಕೇಜ್ರಿವಾಲ್ ಅವರಿಗೆ ಬಹಿರಂಗ ಪತ್ರ ಬರೆಯುತ್ತಿದ್ದೇನೆ. ಇಂದು ಸಿಬಿಐ ಬಳಿ ಹೋಗುವ ಮೂಲಕ ನನ್ನ ಹೋರಾಟ ಪ್ರಾರಂಭಿಸುತ್ತೇನೆ. ಭ್ರಷ್ಟಾಚಾರ ನಡೆದಿರುವ ಕುರಿತು ನನಗೆ ಸಂಪೂರ್ಣ ಮಾಹಿತಿ ಇದೆ. ನಾನು ಸಿಬಿಐ ಅಧಿಕಾರಗಳ ಮುಂದೆ ಎಲ್ಲ ವಿಷಯವನ್ನು ಬಹಿರಂಗಪಡಿಸುತ್ತೇನೆ' ಎಂದು ಕೇಜ್ರಿವಾಲ್ ಅವರಿಗೆ ಎಚ್ಚರಿಕೆ ನೀಡಿದರು.

''ಎಎಪಿ ಪಕ್ಷ ಹಾಗೂ ದಿಲ್ಲಿ ಸರಕಾರ ಎಸಗಿರುವ 211 ಭ್ರಷ್ಟಾಚಾರ ಪ್ರಕರಣಗಳನ್ನು ಸ್ವೀಕರಿಸಿದ್ದೇನೆ. ಕಳೆದ ಎರಡು ವರ್ಷಗಳಿಂದ ಪರದೆಯ ಹಿಂದೆ ಏನಾಯಿತು ಎನ್ನುವುದನ್ನು ನೆನಸಿಕೊಂಡರೆ ನೋವಾಗುತ್ತದೆ', ಮಿಶ್ರಾ ಬೇಸರ ವ್ಯಕ್ತಪಡಿಸಿದ್ದಾರೆ.