ಭಾರತ-ಅಮೆರಿಕ 2+2 ಮಾತುಕತೆ ಮತ್ತೆ ಮುಂದಕ್ಕೆ

ವಾಷಿಂಗ್ಟನ್‌: ಭಾರತ ಮತ್ತು ಅಮೆರಿಕ ನಡುವಿನ ಬಹು ನಿರೀಕ್ಷಿತ 2+2 ಮಾತುಕತೆಯನ್ನು ಅಮೆರಿಕ 'ಅನಿವಾರ್ಯ ಕಾರಣಗಳಿಂದ' ಮುಂದೂಡಿದೆ. ಆದರೆ, ಮುಂದೂಡಿಕೆಗೆ ಕಾರಣವಾದ ಅನಿವಾರ್ಯತೆಗಳ ಬಗ್ಗೆ ಮೌನವಾಗಿದೆ. ಈ ಬೆಳವಣಿಗೆಯನ್ನು ಭಾರತ ದುರದೃಷ್ಟಕರ ಎಂದು ವ್ಯಾಖ್ಯಾನಿಸಿದೆ. ಇದು ಟ್ರಂಪ್‌ ಆಡಳಿತಕ್ಕೆ ಮುಜುಗರದ ಸಂಗತಿ ಎಂದು ಹೇಳಲಾಗುತ್ತಿದೆ.

ಜುಲೈ 6ಕ್ಕೆ ನಿಗದಿಯಾಗಿತ್ತು: ಭಾರತದ ಪರವಾಗಿ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್‌ ಮತ್ತು ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್‌ ಹಾಗೂ ಅಮೆರಿಕದ ಪರವಾಗಿ ವಿದೇಶಾಂಗ ಕಾರ‍್ಯದರ್ಶಿ ಮೈಕೆಲ್‌ ಆರ್‌ ಪಾಂಪಿಯೊ ಮತ್ತು ರಕ್ಷಣಾ ಕಾರ್ಯದರ್ಶಿ ಜೇಮ್ಸ್‌ ಮಾಟಿಸ್‌ ನಡುವೆ ಮಾತುಕತೆ ಜುಲೈ 6ಕ್ಕೆ ನಿಗದಿಯಾಗಿತ್ತು. ಮೋದಿ ಅವರು 2017ರಲ್ಲಿ ಅಮೆರಿಕಕ್ಕೆ ಭೇಟಿ ನೀಡಿದ್ದ ವೇಳೆ ಸಭೆಯ ರೂಪುರೇಷೆ ಸಿದ್ಧವಾಗಿತ್ತು. ವ್ಯೂಹಾತ್ಮಕ, ಭದ್ರತೆ ಮತ್ತು ರಕ್ಷಣಾ ಸಹಕಾರ ಚರ್ಚೆಯ ಪ್ರಮುಖ ವಿಷಯ.

ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಅವರು ಸುಷ್ಮಾ ಸ್ವರಾಜ್‌ ಅವರಿಗೆ ಕರೆ ಮಾಡಿ ಮುಂದೂಡಿಕೆಗೆ ವಿಷಾದ ವ್ಯಕ್ತಪಡಿಸಿದ್ದಾರೆ. ಕಳೆದ ಏಪ್ರಿಲ್‌ನಲ್ಲೂ ಒಮ್ಮೆ ಇದೇ ಮಾದರಿಯ ಸಭೆ ನಿಗದಿಯಾಗಿ ಮುಂದೂಡಲ್ಪಟ್ಟಿತ್ತು.

ಯಾಕಿರಬಹುದು?

* ಅಮೆರಿಕ ಅಧ್ಯಕ್ಷ ಟ್ರಂಪ್‌ ಅವರು ರಷ್ಯಾದಲ್ಲಿ ನಡೆಯುವ ಸಮಾವೇಶದಲ್ಲಿ ಭಾಗವಹಿಸಬೇಕಾಗಿದ್ದು, ಅಲ್ಲಿ ರಕ್ಷಣಾ ವ್ಯವಹಾರಗಳ ಚರ್ಚೆ ನಡೆಯಲಿದೆ. ಹೀಗಾಗಿ ಸಭೆ ಮುಂದೂಡಿರುವ ಸಾಧ್ಯತೆ ಇದೆ.