ಭಾರತ-ಜಪಾನ್‌ 12ನೇ ಶೃಂಗಸಭೆ: 15 ಒಪ್ಪಂದಗಳಿಗೆ ಸಹಿ

ಅಹಮದಾಬಾದ್‌: ಭಾರತ ಮತ್ತು ಜಪಾನ್‌ ನಡುವಿನ ದ್ವಿಪಕ್ಷೀಯ ಸಹಕಾರ ಮತ್ತಷ್ಟು ಗಟ್ಟಿಯಾಗಿದೆ.

ಬುಲೆಟ್‌ ರೈಲು ಯೋಜನೆ ಕಾಮಗಾರಿಗೆ ಚಾಲನೆ ನೀಡಿದ ನಂತರ ಗಾಂಧಿನಗರದಲ್ಲಿ ನಡೆದ 12ನೇ ಭಾರತ-ಜಪಾನ್‌ ದ್ವಿಪಕ್ಷೀಯ ಶೃಂಗಸಭೆಯಲ್ಲಿ ಮೋದಿ ಮತ್ತು ಅಬೆ ಪಾಲ್ಗೊಂಡು ಹಲವಾರು ವಿಷಯಗಳ ಬಗ್ಗೆ ಚರ್ಚೆ ನಡೆಸಿದರು.

ಭಯೋತ್ಪಾದನೆ ವಿರುದ್ಧ ಹೋರಾಟ ಅದರಲ್ಲೂ ಲಷ್ಕರೆ ತಯ್ಬಾ ಹಾಗೂ ಇನ್ನುಳಿದ ಉಗ್ರ ಸಂಘಟನೆಗಳ ವಿರುದ್ಧದ ಭಾರತದ ಹೋರಾಟದಲ್ಲಿ ಕೈ ಜೋಡಿಸಲು ಜಪಾನ್‌ ಮುಂದಾಗಿದೆ.

ಉಭಯ ದೇಶಗಳ ವ್ಯಾಪಾರ ಸಹಕಾರಕ್ಕೆ ಸಂಬಂದಿಸಿದಂತೆ 15 ಒಪ್ಪಂದಗಳಿಗೆ ಸಹಿ ಹಾಕಲಾಯಿತು. ಭಾರತಕ್ಕೆ ಕಡಿಮೆ ಬಡ್ಡಿ ದರದಲ್ಲಿ ಸಾಲ, ಭಾರತದಲ್ಲಿ ಜಪಾನ್‌ ಹೂಡಿಕೆ ಹೆಚ್ಚಳ ಸೇರಿದಂತೆ ಹಲವು ಒಪ್ಪಂದಗಳು ಇದರಲ್ಲಿ ಸೇರಿವೆ. ಈಗಾಗಲೇ 15 ಜಪಾನ್‌ ಕಂಪನಿಗಳು ಭಾರತದಲ್ಲಿ ಹೂಡಿಕೆಗೆ ಆಸಕ್ತಿ ತೋರಿವೆ.

ಶೃಂಗಸಭೆಯ ನಂತರ ಉಭಯ ನಾಯಕರು ಜಂಟಿ ಮಾತನಾಡಿದರು.

ಕಳೆದ ಸಾಲಿನಲ್ಲಿ ಭಾರತದಲ್ಲಿ 4.7 ಬಿಲಿಯನ್‌ ಅಮೆರಿಕನ್‌ ಡಾಲರ್‌ ಮೊತ್ತದಷ್ಟು ಬಂಡವಾಳ ಹೂಡಿಕೆ ಮಾಡಿದೆ ಎಂದು ಜಪಾನ್‌ ಕೊಡುಗೆಯನ್ನು ಮೋದಿ ಕೊಂಡಾಡಿದರು.

ಜಪಾನ್‌ ಪ್ರಜೆಗಳಿಗೆ ಇಲ್ಲಿ ಅನುಕೂಲವಾಗುವಂತೆ ಫುಡ್‌ ಕೋರ್ಟ್‌ಗಳನ್ನು ಆರಂಭಿಸಲಾಗುವುದು. ಜಪಾನಿಗರಿಗೆ ತವರಿನ ಆಹಾರ ಒದಗಿಸುವ ಉದ್ದೇಶ ಇದಾಗಿದೆ ಎಂದು ಮೋದಿ ಹೇಳಿದರು.

ಗಾಂಧಿನಗರದಲ್ಲಿ ಮಹಾತ್ಮ ಗಾಂಧಿ ಅವರ ಜೀವನ ಚರಿತ್ರೆ ಸಾರುವ ದಂಡೀಕುಟಿರಕ್ಕೆ ಶಿಂಜೋ ಅಬೆ ಭೇಟಿ ನೀಡಿದರು.

ಭಾರತದಂಥ ಪರಮಾಪ್ತ ರಾಷ್ಟ್ರಗಳ ಜತೆ ದ್ವಿಪಕ್ಷೀಯ ಸಹಕಾರ ಸಂಬಂಧ ವೃದ್ಧಿಸಿಕೊಳ್ಳುವುದು ಹೆಮ್ಮೆಯ ವಿಷಯ. ನನ್ನ ಆಪ್ತಮಿತ್ರ ಮೋದಿ ಅವರ ಆತಿಥ್ಯ ನಿಜಕ್ಕೂ ಮೆಚ್ಚುವಂಥದ್ದು ಎಂದು ಶಿಂಜೋ ಅಬೆ ತಿಳಿಸಿದ್ದಾರೆ.

'ಅರಿಗತೊ ಗೊಝೈಮಸ್' ಎಂದು ಮೋದಿ ತಮ್ಮ ಭಾಷಣವನ್ನು ಜಪಾನಿ ಭಾಷೆಯಲ್ಲಿ ಥ್ಯಾಂಕ್ಯೂ ಎಂದು ಹೇಳಿ ಮುಗಿಸಿದರು.

India and Japan sign a number of agreements