ಜಾಧವ್‌ ಜತೆ ಮುಕ್ತ ಮಾತುಕತೆಗೆ ಅವಕಾಶ ಕಲ್ಪಿಸಲು ಭಾರತ ಆಗ್ರಹ

ಹೊಸದಿಲ್ಲಿ: ಸೆರೆಯಲ್ಲಿರುವ ಭಾರತೀಯ ನೌಕಾಪಡೆ ಮಾಜಿ ಯೋಧ ಕುಲಭೂಷಣ್‌ ಜಾಧವ್‌ ಅವರಿಗೆ ಅಂತಾರಾಷ್ಟ್ರೀಯ ನ್ಯಾಯಾಲಯದ ತೀರ್ಪಿನಂತೆ ಯಾವುದೇ ಅಡೆತಡೆ ಇಲ್ಲದ ರಾಯಭಾರ ಸಂಪರ್ಕ ಒದಗಿಸುವಂತೆ ಭಾರತವು ಪಾಕಿಸ್ತಾನಕ್ಕೆ ಮನವಿ ಮಾಡಿದೆ.

ಅಂತಾರಾಷ್ಟ್ರೀಯ ಕೋರ್ಟ್‌ನ ಛೀಮಾರಿ ಬಳಿಕ ಪಾಕಿಸ್ತಾನವು ಜಾಧವ್‌ ಅವರನ್ನು ಭೇಟಿಯಾಗಲು ಭಾರತದ ರಾಯಭಾರ ಕಚೇರಿ ಅಧಿಕಾರಿಗಳಿಗೆ ಶುಕ್ರವಾರ ಅವಕಾಶ ಕಲ್ಪಿಸುವುದಾಗಿ ಗುರುವಾರ ಹೇಳಿತ್ತು. ಆದರೆ, ಭಾರತದ ಅಧಿಕಾರಿಗಳು ಕಾರಾಗೃಹದಲ್ಲಿ ಜಾಧವ್‌ ಅವರನ್ನು ಭೇಟಿಯಾಗುವ ವೇಳೆ ಪಾಕಿಸ್ತಾನದ ಅಧಿಕಾರಿಯೂ ಜತೆಗಿರುತ್ತಾರೆ ಮತ್ತು ಈ ಭೇಟಿಯನ್ನು ಸಿ.ಸಿ ಕ್ಯಾಮೆರಾದಲ್ಲಿ ಚಿತ್ರೀಕರಿಸಲಾಗುವುದು ಎಂದು ಪಾಕಿಸ್ತಾನ ಹೇಳಿತ್ತು. ಈ ಷರತ್ತನ್ನು ಭಾರತ ತಿರಸ್ಕರಿಸಿದ್ದು, ಯಾವುದೇ ಷರತ್ತು ವಿಧಿಸದೇ ರಾಯಭಾರ ಕಚೇರಿ ಅಧಿಕಾರಿಗಳಿಗೆ ಅವಕಾಶ ನೀಡಬೇಕು. ನಿರ್ಭೀತ ಹಾಗೂ ಒತ್ತಡರಹಿತ ವಾತಾವರಣದಲ್ಲಿ ಮಾತುಕತೆ ನಡೆಸಲು ಅವಕಾಶ ಕಲ್ಪಿಸಬೇಕು ಎಂದು ಮನವಿ ಸಲ್ಲಿಸಿದೆ. ಇದಕ್ಕೆ ಪಾಕ್‌ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ ಎಂದು ಮೂಲಗಳು ತಿಳಿಸಿವೆ.

ಬೇಹುಗಾರಿಕೆ ಆರೋಪದಲ್ಲಿ ಜಾಧವ್‌ ಅವರಿಗೆ ವಿಧಿಸಿರುವ ಗಲ್ಲು ಶಿಕ್ಷೆ ತೀರ್ಪನ್ನು ಪಾಕ್‌ ಪುನರ್‌ ಪರಿಶೀಲಿಸಬೇಕು ಹಾಗೂ ರಾಯಭಾರ ನೆರವು ಒದಗಿಸಬೇಕು. ಇಲ್ಲದಿದ್ದರೆ ಅದು 1963ರ ವಿಯೆನ್ನಾ ಒಪ್ಪಂದ ಉಲ್ಲಂಘಿಸಲಾಗುತ್ತದೆ ಎಂದು ಅಂತಾರಾಷ್ಟ್ರೀಯ ನ್ಯಾಯಾಲಯವು ಜುಲೈ 17ರಂದು ತೀರ್ಪಿ ನೀಡಿದೆ. ಆ ಹಿನ್ನೆಲೆಯಲ್ಲಿ ರಾಯಭಾರ ನೆರವಿಗೆ ಪಾಕಿಸ್ತಾನ ಸಮ್ಮತಿಸಿರುವುದರಿಂದ ಗಲ್ಲು ಶಿಕ್ಷೆಯ ತೀರ್ಪನ್ನೂ ಪುನರ್‌ ಪರಿಶೀಲಿಸಬಹುದು ಎಂಬ ಆಶಾಭಾವ ಜಾಧವ್‌ ಕುಟುಂಬದಲ್ಲಿ ಮೂಡಿದೆ.