ಚೀನಾ, ಪಾಕ್‌ ದಾಳಿ ತಡೆಗಟ್ಟಲು ಕಾಶ್ಮೀರಕ್ಕೆ ಪ್ರತ್ಯೇಕ ಸೇನಾ ಘಟಕ: ಬಿಪಿನ್‌ ರಾವತ್‌

ಹೊಸದಿಲ್ಲಿ: ಪಾಕಿಸ್ತಾನ ಮತ್ತು ಚೀನಾದ ಸಂಭಾವ್ಯ ದಾಳಿಗಳನ್ನು ಸಮರ್ಥವಾಗಿ ಮಟ್ಟಹಾಕಲು ಜಮ್ಮು-ಕಾಶ್ಮೀರಕ್ಕೆ ಪ್ರತ್ಯೇಕ ಸೇನಾ ಕಮಾಂಡ್‌ ರಚಿಸುವ ಬಗ್ಗೆ ಸರಕಾರ ಚಿಂತನೆ ನಡೆಸಿದೆ ಎಂದು ಸಶಸ್ತ್ರ ಪಡೆಗಳ ಸಿಬ್ಬಂದಿ ಮುಖ್ಯಸ್ಥ ಜನರಲ್‌ ಬಿಪಿನ್‌ ರಾವತ್‌ ಹೇಳಿದ್ದಾರೆ.

ವಾಯುಪಡೆ, ಭೂಸೇನೆ, ನೌಕಾಪಡೆಯ ನುರಿತ ಅಧಿಕಾರಿಗಳು ಹಾಗೂ ಯೋಧರನ್ನು ಒಳಗೊಂಡ ಕಮಾಂಡ್‌ ಇದಾಗಿರಲಿದೆ. ಭೂ, ಜಲ, ವಾಯು ಗಡಿಯಿಂದ ಎದುರಾಗುವ ದಾಳಿಗಳನ್ನು ತ್ರಿ ಸಮನ್ವಯದ ಮೂಲಕ ಏಕಕಾಲಕ್ಕೆ ಮಣಿಸುವ ಉದ್ದೇಶ ಈ ಕಮಾಂಡ್‌ನ ಹಿಂದೆ ಇದೆ.

ಇಂತಹ ಕಮಾಂಡ್‌ ರಚನೆಯಿಂದ ಗಡಿ ಭದ್ರತಾ ವ್ಯವಸ್ಥೆ ಮತ್ತಷ್ಟು ಬಲಗೊಳ್ಳಲಿದೆ ಎಂದು ರಾವತ್‌ ಅವರು ಮಾಧ್ಯಮಗಳಿಗೆ ವಿವರ ನೀಡಿದ್ದಾರೆ.

ಏರ್‌ ಡಿಫೆನ್ಸ್‌ ಕಮಾಂಡ್‌ ಹಾಗೂ ಪೆನಿನ್ಸುಲಾ ಕಮಾಂಡ್‌ಗಳನ್ನು ಮುಂದಿನ ವರ್ಷದ ಅಂತ್ಯದೊಳಗೆ ಸ್ಥಾಪಿಸುವ ಉದ್ದೇಶ ಹೊಂದಲಾಗಿದೆ. ರಫೇಲ್‌ ಫೈಟರ್‌ ಜೆಟ್‌ಗಳ ಸೇರ್ಪಡೆಯಿಂದ ದೇಶದ ಸೇನಾ ಬಲ ಇನ್ನಷ್ಟು ವೃದ್ಧಿಯಾಗಲಿದೆ ಎಂದು ಸಶಸ್ತ್ರ ಪಡೆಗಳ ಸಿಬ್ಬಂದಿ ಮುಖ್ಯಸ್ಥ ಜನರಲ್‌ ಬಿಪಿನ್‌ ರಾವತ್‌ ತಿಳಿಸಿದ್ದಾರೆ.