ಭಾರತಕ್ಕೆ ಸಿಕ್ತು ರಫೇಲ್ ಬಲ - ಮೊದಲ ಹಾರಾಟ ನಡೆಸಿದ ರಾಜನಾಥ್

ಹೊಸದೆಹಲಿ: ಬಹುನಿರೀಕ್ಷಿತ ರಫೇಲ್ ಯುದ್ಧ ವಿಮಾನ ಅಧಿಕೃತವಾಗಿ ಭಾರತಕ್ಕೆ ಹಸ್ತಾಂತರಗೊಂಡಿದ್ದು ಕೇಂದ್ರ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಯುದ್ಧ ವಿಮಾನದಲ್ಲಿ ಹಾರಾಟ ನಡೆಸಿದ್ದಾರೆ. 36 ರಫೇಲ್ ಯುದ್ಧ ವಿಮಾನಗಳನ್ನು ಫ್ರಾನ್ಸ್ ಸರಕಾರ ಭಾರತಕ್ಕೆ ಹಸ್ತಾಂತರಿಸಿದ್ದು ಈ ಪೈಕಿ ಒಂದನ್ನು ಮಂಗಳವಾರ ಅನೌಪಚಾರಿಕವಾಗಿ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರಿಗೆ ಹಸ್ತಾತರ ಮಾಡಲಾಗಿದೆ.

ವಿಜಯದಶಮಿ ದಿನದ ಹಿನ್ನೆಲೆಯಲ್ಲಿ ಫಾನ್ಸ್ ಸರಕಾರದಿಂದ ರಫೇಲ್ ವಿಮಾನ ಪಡೆದುಕೊಂಡ ರಾಜನಾಥ್ ಸಿಂಗ್ ಯುದ್ಧ ವಿಮಾನಕ್ಕೆ ಆಯುಧ ಪೂಜೆಯನ್ನು ನೆರವೇರಿಸಿದ್ದಾರೆ. ಇದಾದ ಬಳಿಕ ಫಾನ್ಸ್ ವಾಯುಸೇನೆಯ ಪೈಲಟ್ ಜೊತೆಗೆ ರಫೇಲ್ ಯುದ್ಧ ವಿಮಾನದಲ್ಲಿ ಮೊದಲ ಹಾರಾಟ ನಡೆಸಿದ್ದಾರೆ.

ಈಡುಗಾಯಿ ಒಡೆದು 'ರಫೇಲ್' ಹತ್ತಿದ ರಾಜನಾಥ್!: ವಿಜಯದಶಮಿಯಂದೇ ಭಾರತಕ್ಕೆ ಸಿಕ್ತು ಬ್ರಹ್ಮಾಸ್ತ್ರ!

ರಫೇಲ್ ಯುದ್ಧ ವಿಮಾನವನ್ನು ಏರುವ ಮುನ್ನ ಈ ಕುರಿತಾದ ಪೋಟೋಗಳನ್ನು ಅವರು ತಮ್ಮ ಅಧಿಕೃತ ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದರು. ರಫೇಲ್‌ನಲ್ಲಿ ಹಾರಾಟಕ್ಕೆ ತಯಾರಾಗಿದ್ದೇವೆ ಎಂದು ಟ್ವೀಟ್ ಮಾಡಿದ್ದರು.


ಸೆಪ್ಟಂಬರ್ 2016ರಲ್ಲಿ ಭಾರತ ಸರಕಾರ ಫಾನ್ಸ್ ದೇಶದ ಜೊತೆಗೆ ರಫೇಲ್ ಯುದ್ಧ ವಿಮಾನ ಖರೀದಿ ಒಪ್ಪಂದ ಮಾಡಿಕೊಂಡಿತ್ತು. 59 ಸಾವಿರ ಕೋಟಿ ಮೊತ್ತದ ಒಪ್ಪಂದದ ಪ್ರಕಾರ ಮುಂದಿನ ವರ್ಷ ಮೇ ತಿಂಗಳ ಒಳಗಾಗಿ ಮೊದಲ ಹಂತದಲ್ಲಿ ನಾಲ್ಕು ಯುದ್ಧ ವಿಮಾನಗಳು ಭಾರತಕ್ಕೆ ಹಸ್ತಾಂತರವಾಗಲಿವೆ.

2022 ಸೆಪ್ಟಂಬರ್ ಒಳಗಾಗಿ ಎಲ್ಲಾ ಯುದ್ಧ ವಿಮಾನಗಳು ಭಾರತಕ್ಕೆ ಹಸ್ತಾಂತರವಾಗುತ್ತದೆ. ರಕ್ಷಣಾ ಸಚಿವರು ಬುಧವಾರ ಫ್ರಾನ್ಸ್ ರಕ್ಷಣಾ ಉದ್ಯಮಿಗಳ ಜೊತೆಗೂ ಮಾತುಕತೆ ನಡೆಸಲಿದ್ದಾರೆ.