ರಷ್ಯಾನಿರ್ಮಿತ ಆರ್‌-27 ಕ್ಷಿಪಣಿ ಖರೀದಿಗೆ ಒಡಂಬಡಿಕೆ

ಹೊಸದಿಲ್ಲಿ: ಶತ್ರು ಸಂಹಾರ ಸುಖೋಯ್‌-30 ಯುದ್ಧವಿಮಾನಗಳಲ್ಲಿ ಪ್ರಬಲ ಅಸ್ತ್ರವಾಗಿ ಬಳಕೆಯಾಗುವ ಆರ್‌-27 ಕ್ಷಿಪಣಿಗಳ ಖರೀದಿಗೆ ಭಾರತವು ರಷ್ಯಾ ಜತೆ ಒಡಂಬಡಿಕೆ ಮಾಡಿಕೊಂಡಿದೆ.

''ಸುಖೋಯ್‌-30 ಎಂಕೆಐ ಯುದ್ಧ ವಿಮಾನಗಳಿಗೆ ಜೋಡಿಸಿ, ವಾಯು ಮಾರ್ಗದಲ್ಲಿಯೇ ಶತ್ರು ಪಡೆಗಳ ಮೇಲೆ ದಾಳಿ ನಡೆಸಬಲ್ಲ ಆರ್‌-27 ಕ್ಷಿಪಣಿಗಳ ಖರೀದಿಗೆ ರಷ್ಯಾ ಜತೆ ಒಪ್ಪಂದ ಮಾಡಿಕೊಳ್ಳಲಾಗಿದೆ. ಇದು 1,500 ಕೋಟಿ ರೂ.ಗಳ ಒಡಂಬಡಿಕೆ,'' ಎಂದು ರಕ್ಷಣಾ ಸಚಿವಾಲಯದ ಮೂಲಗಳು ತಿಳಿಸಿವೆ. ರಷ್ಯಾದ ಈ ದೂರಗಾಮಿ ಕ್ಷಿಪಣಿಗಳ ಸೇರ್ಪಡೆಯಿಂದ ಸುಖೋಯ್‌ ವಿಮಾನಗಳ ಯುದ್ಧ ಸಾಮರ್ಥ್ಯ‌ಕ್ಕೆ ಭೀಮಬಲ ದಕ್ಕಲಿದೆ ಎಂದು ಸೇನಾ ಮೂಲಗಳು ವಿಶ್ವಾಸ ವ್ಯಕ್ತಪಡಿಸಿವೆ.

ಬಿಗಿ ಷರತ್ತು: ಈ ಬಾರಿ ವಾರ್‌ ವೇಸ್ಟೇಜ್‌ ರಿಸರ್ವ್‌ (ಡಬ್ಲ್ಯುಡಬ್ಲ್ಯುಆರ್‌) ಷರತ್ತಿನಡಿ ಈ ಕ್ಷಿಪಣಿಗಳ ಖರೀದಿಗೆ ಭಾರತ ಒಪ್ಪಂದ ಮಾಡಿಕೊಂಡಿದೆ. ಈ ಪ್ರಕಾರ, ರಷ್ಯಾ ತಾನು ಪೂರೈಸುವ ಶಸ್ತ್ರಾಸ್ತ್ರಗಳ ಮೂರು ಸವೀರ್‍ಸ್‌ ಮಾಡುವುದು ಕಡ್ಡಾಯವಾಗಿದೆ. ಜತೆಗೆ ನಿರ್ದಿಷ್ಟ ಅವಧಿಯಲ್ಲಿ ಸಮಸ್ಯೆ ಕಾಣಿಸಿದರೆ ಅಂತಹ ಕ್ಷಿಪಣಿಗಳಿಗೆ ಪರ್ಯಾಯ ಕ್ಷಿಪಣಿ ಒದಗಿಸುವುದನ್ನು ಷರತ್ತಿನಲ್ಲಿ ಸೇರಿಸಲಾಗಿದೆ. ಆರ್‌-27 ಕ್ಷಿಪಣಿಗಳನ್ನು ರಷ್ಯಾ ನಿರ್ಮಿತ ಮಿಗ್‌ ಮತ್ತು ಸುಖೋಯ್‌ ಯುದ್ಧ ವಿಮಾನ ಸರಣಿಯ ಬಳಕೆಗಾಗಿಯೇ ಅಭಿವೃದ್ಧಿ ಪಡಿಸಲಾಗಿದೆ.

ಕಳೆದ 50 ದಿನಗಳಲ್ಲಿ ಭಾರತೀಯ ವಾಯುಪಡೆಯು 7600 ಕೋಟಿ ರೂ. ಮೊತ್ತದ ಶಸ್ತ್ರಾಸ್ತ್ರಗಳ ಖರೀದಿ ಒಪ್ಪಂದ ಮಾಡಿಕೊಂಡಿದೆ.