ಇಕ್ಕಟ್ಟು ತಂದಿಡುವ ಹುನ್ನಾರ: ಬರಿಗೈಯ್ಯಲ್ಲಿ ಮರಳಿದ ಸಂಸದ

ಹೊಸದಿಲ್ಲಿ: ಸಮರ್ಪಕ ವೀಸಾ ಹೊಂದಿಲ್ಲದ ಕಾರಣ ಬ್ರಿಟನ್‌ ಸಂಸದ ಲಾರ್ಡ್‌ ಅಲೆಕ್ಸಾಂಡರ್‌ ಕಾರ್ಲಿಲೆ ಅವರನ್ನು ದಿಲ್ಲಿ ವಿಮಾನ ನಿಲ್ದಾಣದಿಂದಲೇ ವಾಪಸ್‌ ಕಳಹಿಸಿದ ಘಟನೆ ಬುಧವಾರ ನಡೆದಿದ್ದು, ಗುರುವಾರ ಬೆಳಕಿಗೆ ಬಂದಿದೆ.

ಅಕ್ರಮ ವಿದೇಶಿ ದೇಣಿಗೆ ಸ್ವೀಕಾರ ಸೇರಿದಂತೆ ಹಲವು ಕ್ರಿಮಿನಲ್‌ ಪ್ರಕರಣಗಳಲ್ಲಿ ಜೈಲು ಸೇರಿರುವ ಬಾಂಗ್ಲಾದೇಶದ ಮಾಜಿ ಪ್ರಧಾನಿ ಖಲೀದಾ ಜಿಯಾ ಅವರ ಕಾನೂನು ಸಲಹೆಗಾರರಾಗಿರುವ ಕಾರ್ಲಿಲೆ ಅವರು ಭಾರತದಲ್ಲಿ ಪತ್ರಿಕಾಗೋಷ್ಠಿ ನಡೆಸುವ ಉದ್ದೇಶ ಹೊಂದಿದ್ದರು. ಆದರೆ ಅಸಮರ್ಪಕ ವೀಸಾದಿಂದ ಅದು ಸಾಧ್ಯವಾಗಿಲ್ಲ. ''ವೀಸಾ ಅರ್ಜಿಯಲ್ಲಿ ದಾಖಲಿಸಿದ್ದ ವಿವರಗಳಿಗೂ ಕಾರ್ಲಿಲೆ ಅವರ ಪ್ರವಾಸದ ಉದ್ದೇಶಕ್ಕೂ ತಾಳೆಯಾಗಿರಲಿಲ್ಲ. ಕೆಲವು ತಾಂತ್ರಿಕ ಸಮಸ್ಯೆಗಳಿಂದ ಅದು ಅಸಮರ್ಪಕವಾಗಿತ್ತು. ಹೀಗಾಗಿ ಸ್ವದೇಶಕ್ಕೆ ವಾಪಸ್‌ ಕಳುಹಿಸಿದೆವು,'' ಎಂದು ವಿದೇಶಾಂಗ ಸಚಿವಾಲಯದ ವಕ್ತಾರ ರವೀಶ್‌ ಕುಮಾರ್‌ ತಿಳಿಸಿದ್ದಾರೆ.

ಬಾಂಗ್ಲಾ ದೇಶ ಜತೆಗಿನ ಭಾರತದ ಸಂಬಂಧಕ್ಕೆ ಹುಳಿ ಹಿಂಡುವ ಉದ್ದೇಶವನ್ನು ಕಾರ್ಲಿಲೆ ಹೊಂದಿದ್ದಾರೆ ಎಂಬ ಸುಳಿವು ಪಡೆದೇ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಮೂಲಗಳು ತಿಳಿಸಿವೆ. ತಮ್ಮ ಢಾಕಾ ಪ್ರವೇಶಕ್ಕೆ ಬಾಂಗ್ಲಾದೇಶ ಅನುಮತಿ ನಿರಾಕರಿಸಿದ್ದರಿಂದಲೇ ಭಾರತದಲ್ಲಿ ಪತ್ರಿಕಾಗೋಷ್ಠಿ ನಡೆಸುವ ಉದ್ದೇಶವನ್ನು ಕಾರ್ಲಿಲೆ ಹೊಂದಿದ್ದರು.