ಚೀನಾ ಗಡಿಯಲ್ಲಿ ಎಚ್‌ಎಎಲ್‌ ಯುದ್ಧ ಹೆಲಿಕಾಪ್ಟರ್‌ ಅಬ್ಬರ

ಹೊಸದಿಲ್ಲಿ: ಹಿಂದೂಸ್ತಾನ್‌ ಏರೋನಾಟಿಕ್ಸ್‌ ಲಿಮಿಟೆಡ್‌ ಕಂಪನಿ ನಿರ್ಮಿತ ಎರಡು ಲಘು ಯುದ್ಧ ಹೆಲಿಕಾಪ್ಟರ್‌ಗಳನ್ನು (ಎಲ್‌ಸಿಎಚ್‌) ಲಡಾಖ್‌ನ ಗಡಿ ಭಾಗದ ಕಾವಲಿಗೆ ನಿಯೋಜಿಸಲಾಗುತ್ತಿದೆ.

ಸಶಸ್ತ್ರ ಪಡೆಗಳ ನಿರ್ದಿಷ್ಟ ಅಗತ್ಯಗಳನ್ನು ಗಮನದಲ್ಲಿಟ್ಟುಕೊಂಡು ನಿರ್ಮಿಸಿದ ಲಘು ಹೆಲಿಕಾಪ್ಟರ್‌ಗಳು ಇದಾಗಿವೆ. ಆತ್ಮ ನಿರ್ಭರ್‌ ಅಭಿಯಾನದ ಭಾಗವಾಗಿ ಇವು ನಿರ್ಮಾಣಗೊಂಡಿವೆ. ಜಗತ್ತಿನ ಅತಿ ಹಗುರ ಯುದ್ಧ ಹೆಲಿಕಾಪ್ಟರ್‌ ಎಂದೆನಿಸಿಕೊಂಡಿದ್ದು ವಾಯುಪಡೆಯ ಅಗತ್ಯಗಳನ್ನು ಪೂರೈಸಲಿದೆ. ಲಡಾಖ್‌ ಗಡಿಯಲ್ಲಿನ ಸದ್ಯದ ಪರಿಸ್ಥಿತಿಯಲ್ಲಿಇವುಗಳ ನಿಯೋಜನೆ ವಾಯುಪಡೆಗೆ ಬಲ ತುಂಬಲಿದೆ ಎಂದು ಎಚ್‌ಎಲ್‌ ಮುಖ್ಯ ವ್ಯವಸ್ಥಾಪಕ ನಿರ್ದೇಶಕ ಆರ್‌. ಮಾಧವನ್‌ ಹೇಳಿದರು.

ವರ್ಷಾಂತ್ಯದ ವೇಳೆಗೆ ವಾಯುಪಡೆಗೆ 10 ಮತ್ತು ಸೇನಾ ಪಡೆಗೆ 5 ಲಘು ಹೆಲಿಕಾಪ್ಟರ್‌ಗಳನ್ನು ಪೂರೈಸಲು ಕಂಪನಿ ನಿರ್ಧರಿಸಿದೆ. ವಾಯುಪಡೆ ಹಾಗೂ ಸೇನೆಗೆ ಒಟ್ಟು 160 ಎಲ್‌ಸಿಎಚ್‌ಗಳ ಅಗತ್ಯವಿದೆ. ಈಗಾಗಲೇ ರಕ್ಷಣಾ ಪರಿಕರಗಳ ಸ್ವಾಧೀನ ಮಂಡಳಿ 15 ಎಲ್‌ಸಿಎಚ್‌ಗಳ ಖರೀದಿಗೆ ಅನುಮತಿ ನೀಡದೆ.

ಇತ್ತೀಚೆಗೆ ಲೇಹ್‌ನಲ್ಲಿಎತ್ತರದ ಪ್ರದೇಶದಲ್ಲಿನಡೆಸಿದ ಪ್ರಾಯೋಗಿಕ ಹಾರಾಟದಲ್ಲಿವಾಯುಪಡೆ ಉಪ ಮುಖ್ಯಸ್ಥ ಏರ್‌ ಮಾರ್ಷಲ್‌ ಹರ್ಜಿತ್‌ ಸಿಂಗ್‌ ಅರೋರಾ ಅವರು ವಿಂಗ್‌ ಕಮಾಂಡರ್‌ (ನಿವೃತ್ತ) ಸುಭಾಷ್‌ ಪಿ.ಜಾನ್‌ ಅವರೊಂದಿಗೆ ಪಾಲ್ಗೊಂಡಿದ್ದರು. ಅತಿ ಎತ್ತರದ ಕಡಿದಾದ ಪ್ರದೇಶದ ಹೆಲಿಪ್ಯಾಡ್‌ನಲ್ಲಿಇಳಿಯುವ ಹಾಗೂ ಪ್ರತಿಕೂಲ ವಾತಾವರಣದಲ್ಲೂಕಾಪ್ಟರ್‌ ಉತ್ತಮ ಪ್ರದರ್ಶನ ತೋರಿದೆ ಎಂದು ಎಚ್‌ಎಎಲ್‌ ಹೇಳಿದೆ.