ಪರೀಕ್ಷೆಗೆ ಸಿದ್ಧವಾದ ಕೆ-4 ಕ್ಷಿಪಣಿ : ಸಮುದ್ರದ ಆಳದಿಂದಲೇ ವೈರಿಪಡೆ ಸೀಳಬಲ್ಲ ಮಿಸೈಲ್‌

ಭುವನೇಶ್ವರ: ಸಾವಿರಾರು ಕಿಮೀ ದೂರದಿಂದಲೇವೈರಿಗಳ ಮೇಲೆರಗಿ ಸದೆಬಡಿಯಬಹುದಾದ ಕ್ಷಿಪಣಿ ತಂತ್ರಜ್ಞಾನ ಮತ್ತಷ್ಟು ಬಲಗೊಳ್ಳುತ್ತಿದೆ. ಜಲಾಂತರ್ಗಾಮಿಗಳ ಮೂಲಕ ನೀರಿನಾಳದಿಂದಲೇ ವೈರಿಗಳನ್ನು ಗುರಿ ಇಟ್ಟು ಹೊಡೆಯಬಹುದಾದ ಕೆ- 4 ಕ್ಷಿಪಣಿ ಪ್ರಯೋಗಿಕ ಉಡಾವಣೆಗೆ ಸಿದ್ದಗೊಂಡಿದೆ.

ಆಂಧ್ರಪ್ರದೇಶದ ಕಡಲ ತೀರದಲ್ಲಿ ಜಲಾಂತರ್ಗಾಮಿ ಮೂಲಕ ಮುಂದಿನ ಶುಕ್ರವಾರ ಪ್ರಾಯೋಗಿಕವಾಗಿ ಉಡಾವಣೆಯಾಗಲಿದೆ. ಈ ಕ್ಷಿಪಣಿ ವ್ಯವಸ್ಥೆಯನ್ನು 'ರಕ್ಷಣಾ ಸಂಶೋಧನಾ ಮತ್ತು ಅಭಿವೃದ್ಧಿ ಸಂಸ್ಥೆ' (ಡಿಆರ್‌ಡಿಒ) ಅಭಿವೃದ್ಧಿಪಡಿಸಿದೆ.

ಈ ಕ್ಷಿಪಣಿಗಳನ್ನು ಅರಿಹಂತ್‌ ದರ್ಜೆಯ ಜಲಾಂತರ್ಗಾಮಿಗಳ ನೀರಿನ ಆಳದಿಂದಲೇ ಉಡಾವಣೆ ಮಾಡಲು ಸಾದ್ಯವಾಗುವಂತೆ ಅಭಿವೃದ್ಧಿಪಡಿಸಲಾಗಿದೆ. ಅಲ್ಲದೆ ಇದು ಅಣುಶಕ್ತಿ ಆಧಾರಿತ ಕ್ಷಿಪಣಿಯಾಗಿದೆ. ಡಿಆರ್‌ಡಿಒ ಯೋಜಿಸಿರುವಂತೆ ವಿಶಾಖಪಟ್ಟಣ ಕಡಲತೀರದಿಂದ ಶುಕ್ರವಾರ ಪರೀಕ್ಷಾರ್ಥ ಉಡಾವಣೆ ನಡೆಯಲಿದೆ.

ಮಾಜಿ ರಾಷ್ಟ್ರಪತಿ ದಿವಂಗತ ಎಪಿಜೆ ಅಬ್ದುಲ್‌ ಕಲಾಂ ಅವರ ಹೆಸರು ಇರಿಸಲಾಗಿರುವ ‘ಕೆ’ ಸರಣಿಯ ಕ್ಷಿಪಣಿಗಳನ್ನು ಅರಿಹಂತ್‌ ಜಲಾಂತರ್ಗಾಮಿಗಾಗಿಯೇ ಅಭಿವೃದ್ಧಿಪಡಿಸಲಾಗಿದೆ. ‘ಕೆ–15’ ಕ್ಷಿಪಣಿಗಳು 750 ಕಿಲೋ ಮೀಟರ್‌ ಗುರಿ ಸಾಮರ್ಥ್ಯ ಹೊಂದಿದ್ದರೆ,‘ಕೆ–4’ ಕ್ಷಿಪಣಿಗಳು 3,500 ಕಿಲೋ ಮೀಟರ್‌ ಗುರಿಸಾಮರ್ಥ್ಯ ಹೊಂದಿದೆ.