ಈ ಗುಲಾಬಿಯು ನಿನಗಾಗಿ... ಸೇನಾಧಿಕಾರಿಯ ಪ್ರೇಮ್‌ ಕಹಾನಿ

ಚೆನ್ನೈ: ಸೇನಾ ತರಬೇತಿ ಸಮಾರೋಪ ಸಮಾರಂಭದಲ್ಲೇ ಯುವತಿಗೆ ಪ್ರೇಮ ನಿವೇದನೆ ಮಾಡಿದ ಸೇನಾಧಿಕಾರಿಯೊಬ್ಬರ ಪ್ರೇಮ್‌ ಕಹಾನಿ ಜನ ಮೆಚ್ಚುಗೆಗೆ ಪಾತ್ರವಾಗಿದೆ.

ಭಾರತೀಯ ಸೇನೆಯ 'ಅಧಿಕಾರಿಗಳ ತರಬೇತಿ ಅಕಾಡೆಮಿ'ಯಿಂದ (ಒಟಿಎ)ಪದವಿ ಪಡೆದಿರುವ ಠಾಕೂರ್‌ ಚಂದ್ರೇಶ್‌ ಸಿಂಗ್‌ ಅವರು ಬಹಿರಂಗವಾಗಿ ಯುವತಿಗೆ ಪ್ರೇಮ ನಿವೇದನೆ ಮಾಡುತ್ತಿರುವ ಚಿತ್ರ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.

ಚೆನ್ನೈನಲ್ಲಿರುವ ತರಬೇತಿ ಅಕಾಡೆಮಿಯು ಇತ್ತೀಚೆಗೆ ಪದವಿ ಪ್ರದಾನ ಸಮಾರಂಭ ಆಯೋಜಿಸಿತ್ತು. ಈ ಸಮಾರಂಭದಲ್ಲಿ ಠಾಕೂರ್‌ ಅವರ ಸ್ನೇಹಿತೆ ಧಾರಾ ಮೆಹ್ತಾ ಸಹ ಭಾಗವಹಿಸಿದ್ದರು. ಪದವಿ ಪತ್ರ ಸ್ವೀಕರಿಸಿದ ಬಳಿಕ ಧಾರಾ ಮೆಹ್ತಾ ಬಳಿ ತೆರಳಿದ ಠಾಕೂರ್‌ ಮಂಡಿಯೂರಿ ಗುಲಾಬಿ ಹೂಗುಚ್ಚ ನೀಡುವ ಮೂಲಕ ಪ್ರೇಮ ನಿವೇದನೆ ಮಾಡಿದರು. ಥೇಟ್‌ ಸಿನಿಮಾ ದೃಶ್ಯವನ್ನು ಹೋಲುತ್ತಿದ್ದ ಈ ದೃಶ್ಯ ಕಂಡು ಅಲ್ಲಿದ್ದವರು ಶಾಕ್‌ ಆಗಿದ್ದರು. ಬಳಿಕ ಈ ಅವಿಸ್ಮರಣಿಯ ಘಟನೆಯ ಪೋಟೊವನ್ನು ಸಾಮಾಜಿಕ ಜಾಲತಾಣದಲ್ಲಿ ಅಪ್‌ಲೋಡ್‌ ಮಾಡಲಾಗಿತ್ತು.

ಸೇನಾ ಅಧಿಕಾರಿಯ ಪ್ರೇಮ ನೀವದನೆಯನ್ನು ಯುವತಿ ಧಾರಾ ಮೆಹ್ತಾ ಒಪ್ಪಿಕೊಂಡಿದ್ದಾರೆ. 25ವರ್ಷದ ಠಾಕೂರ್‌ ಚಂದ್ರೇಶ್‌ ಸಿಂಗ್‌ ಸೇನೆಯ ರಜಪೂತ್‌ ರೈಫಲ್ಸ್‌ನ ಅಧಿಕಾರಿಯಾಗಿ ನಿಯೋಜನೆಗೊಂಡಿದ್ದಾರೆ.

ಪೋಷಕರ ಸಮ್ಮತಿ: ನಮ್ಮ ಪೋಷಕರಿಗೂ ಹಾಗೂ ಧಾರಾ ಮೆಹ್ತಾ ಪೋಷಕರಿಗೆ ಕರೆ ಮಾಡಿ, ಪದವಿ ಪ್ರದಾನ ಸಮಾರಂಭದಲ್ಲಿ ಪ್ರೇಮ ನಿವೇದನೆ ಮಾಡುವುದಾಗಿ ತಿಳಿಸಿದ್ದರು. ಇದಕ್ಕೆ ಉಭಯ ಕುಟುಂಬಗಳು ಒಪ್ಪಿಗೆ ಸೂಚಿಸಿದ್ದವು. ಹಿರಿಯ ಸೇನಾ ಅಧಿಕಾರಿಗಳ ಅನುಮತಿ ಪಡೆದು ಪ್ರೇಮ ನಿವೇದನೆ ಮಾಡಿದೆ ಎಂದು ಠಾಕೂರ್‌ ಹೇಳಿಕೊಂಡಿದ್ದಾರೆ

ಬೆಂಗಳೂರಲ್ಲಿ ಪ್ರೇಮಾಂಕುರ
ಕಳೆದ ಆರು ವರ್ಷಗಳಿಂದ ಚಂದ್ರೇಶ್‌ ಸಿಂಗ್‌ ಮತ್ತು ಧಾರಾ ಮೆಹ್ತಾ ಪ್ರೀತಿಸುತ್ತಿದ್ದಾರೆ. ಇವರಿಬ್ಬರ ನಡುವೆ ಮೊದಲ ಪರಿಚಯ ಬೆಳೆದಿದ್ದು ಬೆಂಗಳೂರಿನ ಸೇಂಟ್‌ ಜೋಸೆಫ್‌ ಕಲಾ ಮತ್ತು ವಿಜ್ಞಾನ ಕಾಲೇಜಿನಲ್ಲಿ. 2012ರಲ್ಲಿ ಇಬ್ಬರು ಬೇರೆ ಬೇರೆ ವಿಷಯಗಳಲ್ಲಿ ಅಧ್ಯಯನ ಮಾಡುತ್ತಿದ್ದರೂ ಹಿಂದಿ ತರಗತಿಯಲ್ಲಿ ಒಟ್ಟಿಗೆ ಕುಳಿತು ಪಾಠ ಕೇಳುತ್ತಿದ್ದರು. ಮೊದಲ ಎರಡು ವರ್ಷಗಳಲ್ಲಿ ಕೇವಲ ಹಾಯ್‌-ಬಾಯ್‌ ಗೆಳೆಯರಾಗಿದ್ದರು. ನಂತರದ ದಿನಗಳಲ್ಲಿ ಇಬ್ಬರಲ್ಲೂ ಪ್ರೀತಿ ಅಂಕುರಿಸಿತು ಎಂದು ಠಾಕೂರ್‌ ವಿವರಿಸಿದ್ದಾರೆ.