ಇಸ್ರೇಲ್‌ನಿಂದ ಸ್ಪೈಕ್‌ ಕ್ಷಿಪಣಿಗಳ ಖರೀದಿ

ಹೊಸದಿಲ್ಲಿ: ಸೇನೆಯ ಸಮರ ಸಿದ್ಧತೆಯನ್ನು ಸುಧಾರಿಸುವ ಸಲುವಾಗಿ ತುರ್ತಾಗಿ ಇಸ್ರೇಲ್‌ನಿಂದ ಟ್ಯಾಂಕ್‌ ಪ್ರತಿರೋಧ 'ಸ್ಪೈಕ್‌' ಕ್ಷಿಪಣಿಗಳ ಖರೀದಿಗೆ ಭಾರತ ಮುಂದಾಗಿದೆ.
ನಾಲ್ಕು ಕಿಲೋಮೀಟರ್‌ ವ್ಯಾಪ್ತಿಯ ಗುರಿಗಳನ್ನು ನಿಖರವಾಗಿ ತಲುಪಬಲ್ಲ ಸಾಮರ್ಥ್ಯ‌ ಹೊಂದಿರುವ ಈ ಸ್ಪೈಕ್‌ ಕ್ಷಿಪಣಿಗಳನ್ನು ಗುಡ್ಡಗಾಡು ಪ್ರದೇಶ ಹಾಗೂ ಸಮತಟ್ಟಾದ ಪ್ರದೇಶದಲ್ಲಿ ಸುಲಭವಾಗಿ ಬಳಸಬಹುದಾಗಿದೆ.
ವಿವಿಧ ವಾಹನಗಳು, ಹೆಲಿಕಾಪ್ಟರ್‌ಗಳು, ಹಡಗುಗಳು ಹಾಗೂ ಕೈಯ್ಯಲ್ಲಿ ಹೊತ್ತೊಯ್ಯಬಹುದಾದ ಲಾಂಚರ್‌ಗಳನ್ನು ಬಳಸಿಯೂ ಈ ಕ್ಷಿಪಣಿಗಳನ್ನು ಉಡಾಯಿಸಬಹುದು ಎಂಬುದು ಇವುಗಳ ವಿಶೇಷ.

ಬಾಲಾಕೋಟ್‌ ದಾಳಿಯ ಬಳಿಕ ಕಳೆದ ಏಪ್ರಿಲ್‌ನಲ್ಲಿ ಸ್ಪೈಕ್‌ ಕ್ಷಿಪಣಿಗಳ ತುರ್ತು ಖರೀದಿಗೆ ಸೇನೆ ಅನುಮೋದನೆ ನೀಡಿತ್ತು. ಜುಲೈ ತಿಂಗಳಲ್ಲಿ ಈ ಸಂಬಂಧ ಇಸ್ರೇಲ್‌ಗೆ ಅಧಿಕೃತ ಆರ್ಡರ್‌ ಸಲ್ಲಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ. ರಕ್ಷಣಾ ಸಚಿವ ರಾಜನಾಥ್‌ ಸಿಂಗ್‌ ಅವರನ್ನು ಕಳೆದ ತಿಂಗಳು ಮೂರೂ ಸೇನಾಪಡೆಗಳ ಮುಖ್ಯಸ್ಥರು ಭೇಟಿಯಾಗಿ ಚರ್ಚೆ ನಡೆಸಿದ್ದರು. ಅದರ ಬೆನ್ನಲ್ಲೇ ಈಗ ಕ್ಷಿಪಣಿಗಳ ಖರೀದಿಯನ್ನು ಆಕೈರುಗೊಳಿಸಲಾಗಿದೆ.
ಸೇನೆಯು 300 ಕೋಟಿ ರೂ. ಒಳಗಿನ ಖರೀದಿಗಾಗಿ ರಕ್ಷಣಾ ಸಚಿವಾಲಯದ ಅನುಮತಿ ಇಲ್ಲದೆ ತಾನೇ ಆರ್ಡರ್‌ ನೀಡಬಹುದಾಗಿದೆ.