ಎಲ್‌ಎಸಿಯಿಂದ ಭಾರತೀಯ ಸೇನೆ ವಾಪಸ್‌ ಇಲ್ಲ

ಹೊಸದಿಲ್ಲಿ: ಪೂರ್ವ ಲಡಾಕ್‌ ಬಳಿಯ ವಾಸ್ತವ ಗಡಿ ನಿಯಂತ್ರಣ ರೇಖೆ (ಎಲ್‌ಎಸಿ)ಯ ಆಯಕಟ್ಟಿನ ಪ್ರದೇಶಗಳಲ್ಲಿ ಭಾರತೀಯ ಯೋಧರನ್ನು ನಿಯೋಜಿಸಲಾಗಿದೆ.

ಎಲ್‌ಎಸಿಯಿಂದ ಹಂತಹಂತವಾಗಿ ಸೇನೆ ಹಿಂಪಡೆಯುವ ಕುರಿತು ಭಾರತ-ಚೀನಾ ಸೇನಾ ಕಮಾಂಡ್‌ಗಳ 8ನೇ ಸುತ್ತಿನ ಮಾತುಕತೆಯಲ್ಲಿನಿರ್ಧಾರವಾಗಿದೆ. ಚೀನಾ ಮೊದಲು ಸೇನೆ ವಾಪಸಾತಿ ಪ್ರಕ್ರಿಯೆ ಆರಂಭಿಸಬೇಕಿದ್ದು, ಮೂರು ಹಂತಗಳಲ್ಲಿ ಇದು ಪೂರ್ಣಗೊಳ್ಳಬೇಕಿದೆ. ಆದರೆ ಹಿಂದಿನ ಮಾತುಕತೆಗಳಲ್ಲಿಆದ ತೀರ್ಮಾನಕ್ಕೆ ಬದ್ಧವಾಗಿ ಚೀನಾದ ಪೀಪಲ್ಸ್‌ ಲಿಬರೇಷನ್‌ ಆರ್ಮಿ (ಪಿಎಲ್‌ಎ) ನಡೆದುಕೊಂಡಿಲ್ಲ. ಹೀಗಾಗಿ ಹಿಮವರ್ಷದ ನಡುವೆಯೂ ಭಾರತೀಯ ಯೋಧರು ತಮ್ಮ ನೆಲೆಗಳಲ್ಲಿ ಭದ್ರವಾಗಿ ನೆಲೆಯೂರಿ ಗಡಿ ಕಾವಲಿಗೆ ನಿಂತಿದ್ದಾರೆ. ''ನೀವು ಸೇನಾ ವಾಪಸಾತಿ ಪ್ರಕ್ರಿಯೆಗೆ ಚಾಲನೆ ನೀಡದ ಹೊರತು ನಾವು ಒಂದೇ ಒಂದು ಇಂಚು ಕೂಡ ಗಡಿಯಿಂದ ಹಿಂದಕ್ಕೆ ಸರಿಯುವುದಿಲ್ಲ'' ಎಂಬ ಸಂದೇಶವನ್ನು ಈ ಮೂಲಕ ಪಿಎಲ್‌ಎಗೆ ರವಾನಿಸಲಾಗಿದೆ.

ಚೀನಾ ಸೈನಿಕರಿಂದ ಅತಿಕ್ರಮಣಕ್ಕೆ ಯತ್ನ ನಡೆದು ಅದಕ್ಕೆ ಭಾರತೀಯ ಯೋಧರು ವಿರೋಧ ವ್ಯಕ್ತಪಡಿಸಿದ ಎಲ್‌ಎಸಿಯಲ್ಲಿನ ಘರ್ಷಣಾ ಸ್ಥಳಗಳಲ್ಲಿ(ಗೊಗ್ರಾ ಹಾಟ್‌ ಸ್ಟ್ರಿಂಗ್ಸ್‌, ಪಾಂಗಾಂಗ್‌ ತ್ಸೊ ಸರೋವರದ ಉತ್ತರ ಮತ್ತು ದಕ್ಷಿಣ ತೀರ) ಭಾರತ ಅಥವಾ ಚೀನಾ ಪಡೆಗಳು ಮುಂಬರುವ ಚಳಿಗಾಲದಲ್ಲಿ ಗಸ್ತು ತಿರುಗುವುದಿಲ್ಲ ಎಂದು ವರದಿಯಾಗಿತ್ತು. ಆದರೆ ಸದ್ಯದ ಪರಿಸ್ಥಿತಿ ಅದಕ್ಕಿಂತ ಭಿನ್ನವಾಗಿದ್ದು ತನ್ನ ಗಡಿಯೊಳಗೆ ಪೂರ್ವ ನಿಗದಿಯಂತೆ ಭಾರತೀಯ ಪಡೆಗಳು ಗಸ್ತು ತಿರುಗುತ್ತಿವೆ ಎಂದು ಸೇನಾ ಮೂಲಗಳು ತಿಳಿಸಿವೆ.

ಹಿಮವರ್ಷಕ್ಕೂ ಸಡ್ಡು: ಕಳೆದ ಕೆಲ ದಿನಗಳಿಂದ ಎಲ್‌ಎಸಿಯ ದೌಲತ್‌ ಬೇಗ್‌ ಓಲ್ಡಿ (ಡಿಬಿಒ ಸೆಕ್ಟೆರ್‌) ಪ್ರದೇಶದಲ್ಲಿ ಹಿಮವರ್ಷ ಆರಂಭವಾಗಿದೆ. ಘರ್ಷಣಾ ಸ್ಥಳ ಎನಿಸಿರುವ ಪಾಂಗಾಂಗ್‌ ತ್ಸೊ ಸರೋವರದ ತೀರ ಪ್ರದೇಶ ಕೂಡ ಮುಂದಿನ ದಿನಗಳಲ್ಲಿ ಹಿಮಚ್ಛಾದಿತ ಆಗಲಿದೆ. ಹಾಗಾಗಿ ಮುನ್ನೆಚ್ಚರಿಕೆ ವಹಿಸಿರುವ ಭಾರತೀಯ ಪಡೆಗಳು ಸ್ನೋ ಟೆಂಟ್‌ಗಳು ಮತ್ತು ಇಗ್ಲೂಸ್‌ಗಳನ್ನು ಆಶ್ರಯಕ್ಕಾಗಿ ರಚಿಸಿಕೊಂಡಿದ್ದಾರೆ. ಚಳಿ ನಿರೋಧಕ ಜಾಕೆಟ್‌ಗಳನ್ನು ಧರಿಸಿ ಪ್ರಮುಖ ಗುಡ್ಡಗಾಡು ಪ್ರದೇಶಗಳಲ್ಲಿ ಸಮರ ಸನ್ನದ್ಧರಾಗಿ ನಿಂತಿದ್ದಾರೆ. ಈ ಪ್ರದೇಶದಲ್ಲಿ ಚಳಿಗಾಲದಲ್ಲಿ ತಾಪಮಾನವು ಶೂನ್ಯ ಡಿಗ್ರಿ ಸೆಲ್ಸಿಯಸ್‌ಗಿಂತ ಕೆಳಕ್ಕೆ ಇಳಿಯುವುದರಿಂದ ಹೆಪ್ಪು ಗಟ್ಟಿಸುವಂತಹ ಚಳಿ ಇರುತ್ತದೆ.

ಈಗಾಗಲೇ ಎಂಟು ಸುತ್ತುಗಳ ಸಂಧಾನ ಸಭೆಗಳು ಭಾರತ-ಚೀನಾ ಮಿಲಿಟರಿ ಕಮಾಂಡರ್‌ಗಳ ಮಟ್ಟದಲ್ಲಿನಡೆದಿದ್ದು, ಗಡಿ ಬಿಕ್ಕಟ್ಟು ಶಮನಕ್ಕೆ ಪರಿಣಾಮಕಾರಿ ಪರಿಹಾರ ಹೊರಬಿದ್ದಿಲ್ಲ.

ಚೀನಾ ಮತ್ತು ಭಾರತ ಮಿಲಿಟರಿ ಪಡೆಗಳು ಪರಸ್ಪರರ ಸಾಮರ್ಥ್ಯ ಪರೀಕ್ಷೆಯಲ್ಲಿನಿರತವಾಗಿವೆ. ಹಾಗಾಗಿ ಎಲ್‌ಎಸಿಯಲ್ಲಿಸದ್ಯದ ಮಟ್ಟಿಗೆ ಬಿಕ್ಕಟ್ಟು ಶಮನ ಆಗುವುದು ಸಾಧ್ಯವಿಲ್ಲದ ಮಾತು. ಮುಂಬರುವ ಚಳಿಗಾದಲ್ಲಿಯಾರು ಸ್ಥಿರವಾಗಿ ಗಡಿ ಕಾಯ್ದುಕೊಳ್ಳುತ್ತಾರೆ ಎನ್ನುವ ಸವಾಲು ಕೂಡ ಉಭಯ ಪಡೆಗಳ ನಡುವೆ ಶುರುವಾಗಿದೆ. ಸ್ವಲ್ಪ ಹಿಂದೇಟು ಹಾಕಿದವರು ಸೋಲು ಒಪ್ಪಿಕೊಂಡಂತಾಗಲಿದೆ.
- ಭಾರತೀಯ ಸೇನೆಯ ನಿವೃತ್ತ ಅಧಿಕಾರಿ

ಸಂಚಾರಕ್ಕೆ ಮುಕ್ತ

ರಕ್ಷಣಾ ಸಚಿವಾಲಯದ ವ್ಯಾಪ್ತಿಗೆ ಬರುವ ಗಡಿ ರಸ್ತೆ ಸಂಸ್ಥೆ (ಬಿಆರ್‌ಒ) ಎಲ್‌ಎಸಿಯಲ್ಲಿನ ಅತಿ ಎತ್ತರದ ತಾಣಗಳಲ್ಲಿಯೂ ಭಾರತೀಯ ಸೇನೆಯ ಸಂಚಾರಕ್ಕೆ ರಸ್ತೆಗಳನ್ನು ಮುಕ್ತವಾಗಿಟ್ಟಿದೆ. ಸಾಮಾನ್ಯವಾಗಿ ಚಳಿಗಾಲ ಆರಂಭವಾಗುತ್ತಿದ್ದಂತೆಯೇ ಇಲ್ಲಿಸಂಚಾರವನ್ನು ನಿಲ್ಲಿಸಲಾಗುತ್ತಿತ್ತು. ಎಲ್‌ಎಸಿಯಲ್ಲಿ ಸಮುದ್ರಮಟ್ಟದಿಂದ ಅತಿ ಎತ್ತರದಲ್ಲಿರುವ ತಾಣಗಳಿವು:

ಮಾರ್ಸಿಮಿಕಾ ಲಾ 18,314 ಅಡಿ (ಹಾಟ್ಸ್‌ ಸ್ಟ್ರಿಂಗ್ಸ್‌ ಬಳಿ)

ಛಾಂಗ್‌ ಲಾ 17,585 ಅಡಿ (ಪಾಂಗಾಂಗ್‌ ತ್ಸೊ ಬಳಿ)

ಖರ್ದುಂಗ್‌ ಲಾ 17,582 ಅಡಿ ( ದೌಲತ್‌ ಬೇಗ್‌ ಓಲ್ಡಿ ಬಳಿ)