ಪರ್ಸೀಡ್ ಉಲ್ಕಾಪಾತ ವೀಕ್ಷಣೆಗೆ ಸಜ್ಜಾದ ಭಾರತ: ಆಗಸದ ವಿಸ್ಮಯ ನೋಡುವುದು ಹೇಗೆ?

ನವದೆಹಲಿ: ಕೊರೊನಾ ವೈರಸ್ ಹಾವಳಿ ನಡುವೆಯೂ ಬ್ರಹ್ಮಾಂಡದ ವಿದ್ಯಮಾನಗಳು ಖಗೋಳಪ್ರಿಯರನ್ನು ಸೂಜಿಗಲ್ಲಿನಂತೆ ಸೆಳೆಯುತ್ತಲೇ ಇವೆ. ಆಗಸದ ವಿಸ್ಮಯಗಳಿಗೆ ಸಾಕ್ಷಿಯಾಗುತ್ತಲೇ ಇದ್ದಾರೆ.

ಕಳೆದ ತಿಂಗಳಷ್ಟೇ ನಿಯೊವೀಸ್ ಧೂಮಕೇತುವಿನ ರಸದೌತಣ ಸವೆದಿದ್ದ ಖಗೋಳಪ್ರಿಯರು ಇದೀಗ ಉಲ್ಕಾಪಾತದ ವಿಹಂಗಮ ನೋಟವನ್ನು ಕಣ್ತುಂಬಿಕೊಳ್ಳಲು ಸಜ್ಜಾಗಿದ್ದಾರೆ.

ಹೌದು, ಇಂದಿನಿಂದ(ಮಂಗಳವಾರ) ಆಗಸ್ಟ್ `13ರವರೆಗೆ ಆಗಸದಲ್ಲಿ ಪರ್ಸೀಡ್ ಉಲ್ಕಾಪಾತ ಸಂಭವಿಸಲಿದ್ದು, ನಾಳೆ(ಬುಧವಾರ) ಗರಿಷ್ಠ ಮಟ್ಟದ ಉಲ್ಕಾಪಾತ ಸಂಭವಿಸಲಿದೆ. ಭಾರತದಲ್ಲೂ ಇದರ ವೀಕ್ಷಣೆ ಸಾಧ್ಯವಿದೆ.

ಮಂಗಳವಾರ ಮತ್ತು ಬುಧವಾರ(ಆಗಸ್ಟ್ 11 ಮತ್ತು 12)ರ ರಾತ್ರಿ ಪರ್ಸೀಡ್ ಉಲ್ಕಾಪಾತ ಸಂಭವಿಸಲಿದ್ದು, ಮಧ್ಯರಾತ್ರಿ 2ಗಂಟೆ ವೇಳೆಗೆ ಪರ್ಸೀಡ್ ಉಲ್ಕಾಪಾತವನ್ನು ಆನಂದಿಸಬಹುದಾಗಿದೆ.

ಜೆಮಿನಿಡ್ ಉಲ್ಕಾಪಾತದ ಖಗೋಳ ವಿಸ್ಮಯದ ಬಗ್ಗೆ ಬೆಳಕು ಚೆಲ್ಲಿದ ಗೂಗಲ್‌ ಡೂಡಲ್‌: ವೀಡಿಯೋ ನೋಡಿ

ಭಾರತದಲ್ಲಿ ಉಲ್ಕಾಪಾತ ದರ್ಶ ಹೇಗೆ?:

ಭಾರತದಲ್ಲೂ ಪರ್ಸೀಡ್ ಉಲ್ಕಾಪಾತದ ದರ್ಶನ ಸಾಧ್ಯವಿದ್ದು, ಪ್ರಕಾಶಮಾನವಾದ ಚಂದ್ರನ ಬೆಳಕಿನಲ್ಲಿ ಉಲ್ಕಾಪಾತ ಸ್ಪಷ್ಟವಾಗಿ ಗೋಚರವಾಗಲಿದೆ. ಕಡಿಮೆ ಮಾಲಿನ್ಯ ಹಾಗೂ ಜನಸಂಖ್ಯೆ ವಿರಳವಾಗಿರುವ ಪ್ರದೇಶದಲ್ಲಿ ಪರ್ಸೀಡ್ ಉಲ್ಕಾಪಾತವನ್ನು ಕಣ್ತುಂಬಿಕೊಳ್ಳಬಹುದು. ಮಧ್ಯರಾತ್ರಿ 2 ಗಂಟೆಗೆ ಉಲ್ಕಾಪಾತ ಗರಿಷ್ಠ ಮಟ್ಟ ತಲುಪುವುದರಿಂದ ಇದರ ವೀಕ್ಷಣೆ ಸುಲಭವಾಗಲಿದೆ.

ಈ ಉಲ್ಕಾಪಾತವನ್ನು ವೀಕ್ಷಿಸಲು ಯಾವುದೇ ವಿಶೇಷ ಉಪಕರಣದ ಅವಶ್ಯಕತೆ ಇಲ್ಲ. ಬರಿಗಣ್ಣಿನಿಂದಲೇ ಚಂದ್ರನ ಬೆಳಕಿನಲ್ಲಿ ಇದನ್ನು ವೀಕ್ಷಣೆ ಮಾಡಬಹುದಾಗಿದೆ. ಆಗಸದ ಉತ್ತರ ಭಾಗದಲ್ಲಿ ಪರ್ಸೀಯಸ್ ನಕ್ಷತ್ರಪುಂಜದ ಬಳಿ ಈ ಉಲ್ಕಾಪಾತ ಸಂಭವಿಸಲಿರುವುದರಿಂದ ಇದಕ್ಕೆ ಪರ್ಸೀಡ್ ಉಲ್ಕಾಪಾತ ಎಂದು ಹೆಸರಿಸಲಾಗಿದೆ.

ಮೋಡ ಕವಿದ ವಾತಾವರಣವಿದ್ದರೆ ವೀಕ್ಷಣೆ ಕಷ್ಟ:

ಹೌದು, ಭಾರತದಲ್ಲಿ ಸದ್ಯ ಮಾನ್ಸೂನ್ ಮಾರುತಗಳ ಅಬ್ಬರ ಜೋರಾಗಿರುವುದರಿಂದ ದೇಶದ ಬಹುತೇಕ ಭಾಗಗಳಲ್ಲಿ ಭಾರೀ ಮಳೆಯಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಮೋಡ ಕವಿದ ವಾತಾವರಣ ನಿರ್ಮಾಣವಾದರೆ ಪರ್ಸೀಡ್ ಉಲ್ಕಾಪಾತದ ವೀಕ್ಷಣೆ ಕಷ್ಟ ಎನ್ನುತ್ತಾರೆ ಖಗೋಳ ವಿಜ್ಞಾನಿಗಳು.

ಉಲ್ಕಾಪಾತದ ಅದ್ಭುತ ದೃಶ್ಯ ಕ್ಯಾಮೆರಾದಲ್ಲಿ ಸೆರೆ : ಅಪೂರ್ವ ವಿಡಿಯೋ ವೈರಲ್

ಉಲ್ಕಾಪಾತ ಸಂಭವಿಸಲು ಕಾರಣವೇನು?:

ಉಲ್ಕೆಗಳು ಮೂಲತಃ ಉಲ್ಕಾಶಿಲೆಗಳ ಭಾಗವಾಗಿದ್ದು, ಅವು ಧೂಳು ಮತ್ತು ವಿವಿಧ ಗಾತ್ರಗಳಲ್ಲಿರುವ ಬಾಹ್ಯಾಕಾಶ ವಸ್ತುಗಳಾಗಿವೆ. ಈ ಉಲ್ಕಾಶಿಲೆಗಳು ಭೂಮಿಯ ವಾತಾವರಣಕ್ಕೆ ಪ್ರವೇಶಿಸಿದ ಮೇಲೆ ಹೊತ್ತಿ ಉರಿಯುತ್ತವೆ. ಈ ಕಾರಣಕ್ಕೆ ಇವುಗಳನ್ನುಉಲ್ಕೆಗಳು ಎಂದು ಕರೆಯಲಾಗುತ್ತದೆ.

ಉಲ್ಕಾಶಿಲೆಗಳು ಭೂ ವಾತಾವರಣಕ್ಕೆ ಹೆಚ್ಚಿನ ವೇಗದಲ್ಲಿ ಚಲಿಸಿದಾಗ ಭಸ್ಮವಾಗುತ್ತವೆ. ಇದರ ಪರಿಣಾಮವಾಗಿ ಆಗಸದಲ್ಲಿ ಬೆಳಕು ಪಸರಿಸುವುದರಿಂದ ಇದನ್ನು ಉಲ್ಕಾಪಾತ ಎಂದು ಕರೆಯಲಾಗುತ್ತದೆ.

ಪರ್ಸೀಡ್ ಉಲ್ಕಾಪಾತವು ಸ್ವಿಫ್ಟ್ ಟಟಲ್‌ ಎಂಬ ಧೂಮಕೇತುವಿನ ಅವಶೇಷಗಳಿಂದ ಸಂಭವಿಸಲಿದ್ದು, ಇದರ ಅವಶೇಷಗಳು ಭೂಮಿಯ ವಾತಾವರಣಕ್ಕೆ ಪ್ರವೇಶಿಸುವಾಗ ಸುಮಾರು 130,000 ಮೈಲುಗಳಷ್ಟು ವೇಗದಲ್ಲಿ ಚಲಿಸಬಹುದು ಎಂದು ಅಂದಾಜಿಸಲಾಗಿದೆ.