ಖಾಸಗಿ ರೈಲುಗಳ ವೇಗಕ್ಕೆ ಸರಕಾರದಿಂದ 'ಬ್ರೇಕ್‌'

ಹೊಸದಿಲ್ಲಿ: ಖಾಸಗಿ ನಿರ್ವಾಹಕರಿಂದ 100 ಮಾರ್ಗಗಳಲ್ಲಿ 150 ರೈಲುಗಳ ಓಡಾಟಕ್ಕೆ ಅವಕಾಶ ಕಲ್ಪಿಸಿ ಆ ಮೂಲಕ ಸುಮಾರು 22,500 ಕೋಟಿ ರೂಪಾಯಿ ಬಂಡವಾಳ ಹೂಡಿಕೆ ಆಕರ್ಷಿಸುವ ನಿಟ್ಟಿನಲ್ಲಿ ಕೇಂದ್ರ ಸರಕಾರ ಸಕಲ ಸಿದ್ಧತೆಗಳನ್ನು ನಡೆಸಿದೆ.

ರೈಲ್ವೆ ಮಂಡಳಿ ಜತೆಗೆ ಹಲವು ಸುತ್ತಿನ ಸಭೆ ನಂತರ ನೀತಿ ಆಯೋಗವು ಖಾಸಗಿ ರೈಲುಗಳ ಸಂಚಾರ ಕುರಿತು ಕರಡು ಸಿದ್ಧಪಡಿಸಿದೆ. ಹಾಲಿ ಮಾರ್ಗಗಳಲ್ಲಿಯೇ ಖಾಸಗಿ ನಿರ್ವಹಣೆಯಲ್ಲಿ ಸಂಚರಿಸಲಿರುವ ರೈಲುಗಳ ಗರಿಷ್ಠ ವೇಗದ ಮಿತಿಯನ್ನು ಗಂಟೆಗೆ 160 ಕಿ.ಮೀಗೆ ಸೀಮಿತಗೊಳಿಸಲಾಗಿದೆ. ಈ ಮೂಲಕ ನಿಗದಿತ ದೂರವನ್ನು ಹಾಲಿ ಸಮಯಕ್ಕಿಂತಲೂ 15 ನಿಮಿಷ ಬೇಗ ತಲುಪುವ ಗುರಿ ಹೊಂದಲಾಗಿದೆ.

'ರಿಕ್ವೆಸ್ಟ್‌ ಫಾರ್‌ ಕ್ವಾಲಿಫಿಕೇಷನ್‌', 'ಪ್ರಾಜೆಕ್ಟ್ ಇನ್‌ಫಾರ್‌ಮೇಷನ್‌ ಮೆಮೊರೆಂಡಮ್‌'(ಪಿಐಎಂ), 'ಕನ್ಸೇಷನ್‌ ಅಗ್ರಿಮೆಂಟ್‌ ಗೈಡಿಂಗ್‌ ಪ್ರಿನ್ಸಿಪಲ್‌' ಸೇರಿ ಹಲವು ದಾಖಲೆ ಪತ್ರಗಳ ಸಮೇತ ಯೋಜನಾ ವಿವರದ ಕರಡನ್ನು ನೀತಿ ಆಯೋಗವು ತನ್ನ ವೆಬ್‌ಸೈಟ್‌ನಲ್ಲಿಅಪ್‌ಲೋಡ್‌ ಮಾಡಿದೆ.

ಖಾಸಗಿ ನಿರ್ವಾಹಕರಿಗೆ ರೈಲು ಪ್ರಮಾಣ ದರ ನಿಗದಿ, ಆಸನ ಶ್ರೇಣಿ ವ್ಯವಸ್ಥೆ ಹಾಗೂ ನಿಲ್ದಾಣಗಳಲ್ಲಿನ ನಿಲುಗಡೆ ವಿಚಾರದಲ್ಲಿ ಅವರಿಗೆ ಹಲವು ಬಗೆಯಲ್ಲಿ ಮುಕ್ತ ಆಯ್ಕೆಗಳನ್ನು ನೀಡುವ ಉದ್ದೇಶ ಹೊಂದಲಾಗಿದೆ. ಆದರೆ ಕನಿಷ್ಠ 16 ಬೋಗಿಗಳನ್ನು ಹೊಂದಿರಬೇಕೆಂಬ ಷರತ್ತು ವಿಧಿಸಲಾಗಿದೆ.

ಅದೇ ರೀತಿ ರೈಲುಗಳ ಸಂಗ್ರಹ, ನಿರ್ವಹಣೆ, ಹಣಕಾಸು ಸಂಪನ್ಮೂಲ ವಿಚಾರದಲ್ಲಿ ಎಲ್ಲ ಜವಾಬ್ದಾರಿ ನಿರ್ವಾಹಕರದ್ದೇ ಆಗಿರಲಿದೆ. ಖಾಸಗಿ ನಿರ್ವಾಹಕರ ರೈಲುಗಳಿಗಂದೇ ಪ್ರತ್ಯೇಕ ಮಾರ್ಗಗಳು ಇರುವುದಿಲ್ಲ. ಹಾಲಿ ಮಾರ್ಗಗಳಲ್ಲಿಯೇ ಸಂಚರಿಸಲಿದ್ದು, ಇವುಗಳ ವೇಗವು ಈಗಾಗಲೇ ರೈಲ್ವೆ ಇಲಾಖೆಯಲ್ಲಿ ಚಾಲ್ತಿಯಲ್ಲಿರುವ ಹೈಸ್ಪೀಡ್‌ ರೈಲುಗಳೊಂದಿಗೆ ಹೊಂದಾಣಿಕೆ ಮಾಡಬಹುದಾಗಿದ್ದು, ವೇಗದ ಮಿತಿಯಲ್ಲಿಅಲ್ಪ ಸ್ವಲ್ಪ ವ್ಯತ್ಯಾಸಗಳಾಗಬಹುದು ಎಂದು ನೀತಿ ಆಯೋಗ ಹೇಳಿದೆ.