ಹೊಸದಿಲ್ಲಿ: ದೇಶದಲ್ಲಿ 2018ರಲ್ಲಿ ನಡೆಸಿದ ಹುಲಿ ಗಣತಿ ಕಾರ್ಯವು ಕ್ಯಾಮೆರಾ ಟ್ಯಾಪಿಂಗ್‌ ಮೂಲಕ ವನ್ಯಜೀವಿ ಸರ್ವೇಕ್ಷಣೆ ನಡೆಸಿದ ಅತಿದೊಡ್ಡ ಕಾರ್ಯಾಚರಣೆ ಎಂಬ ಗಿನ್ನೆಸ್‌ ದಾಖಲೆಗೆ ಪಾತ್ರವಾಗಿದೆ.

ಕಳೆದ ವರ್ಷ ವಿಶ್ವ ಹುಲಿ ದಿನದಂದು ಪ್ರಧಾನಿ ಮೋದಿ ಅವರು 'ಅಖಿಲ ಭಾರತ ಹುಲಿ ಗಣತಿ-2018' ವರದಿಯ ಅಂಕಿ-ಅಂಶಗಳನ್ನು ಪ್ರಕಟಿಸಿದ್ದರು. ಭಾರತದಲ್ಲಿ2,967 ಹುಲಿಗಳು ಇರುವುದು ತಿಳಿದುಬಂದಿದ್ದು, ಇದು ಜಗತ್ತಿನಲ್ಲಿರುವ ಹುಲಿಗಳ ಸಂತತಿಯ ಶೇಕಡಾ 75ರಷ್ಟು ಪಾಲು ಎಂಬುದು ಗಮನಾರ್ಹವಾಗಿದೆ. ಸಮೀಕ್ಷೆಯ ಭಾಗವಾಗಿ ದೇಶದ ಅರಣ್ಯ ಪ್ರದೇಶಗಳ 139 ಅಧ್ಯಯನ ತಾಣಗಳನ್ನು ಆಯ್ಕೆ ಮಾಡಿಕೊಂಡು ಅಲ್ಲಿ ಹುಲಿಗಳ ಚಲನವಲನದ ಮೇಲೆ ನಿಗಾ ಇಡಲು ಒಟ್ಟು 26,760 ಕ್ಯಾಮೆರಾ ಟ್ರ್ಯಾಪ್ಸ್‌ಗಳನ್ನು ಅಳವಡಿಸಲಾಗಿತ್ತು. ಹುಲಿಗಳ ಚಲನವಲನದ ಕುರಿತು 76,523 ಹಾಗೂ ಚಿರತೆಗಳ 51,337 ಚಿತ್ರ ಸೇರಿ ಒಟ್ಟು 35 ದಶಲಕ್ಷ ಚಿತ್ರಗಳನ್ನು ಸೆರೆ ಹಿಡಿಯಲಾಗಿತ್ತು. ಗಣತಿ ಕಾರ್ಯದಲ್ಲಿ ಕರ್ನಾಟಕ ಮತ್ತು ಮಧ್ಯಪ್ರದೇಶದಲ್ಲಿ ಅತಿ ಹೆಚ್ಚು ಹುಲಿಗಳು ಇರುವುದು ಕಂಡುಬಂದಿದ್ದವು.
ದೇಶದಲ್ಲಿ ಹುಲಿ ಸಂತತಿ 3000ಕ್ಕೆ ಏರಿಕೆ

2014ರಲ್ಲಿ ಮಾಡಿದ ಹುಲಿಗಳ ಗಣತಿಯಲ್ಲಿ 2,226 ವ್ಯಾಘ್ರಗಳು ಇದ್ದವು. ಈ ಪ್ರಮಾಣಕ್ಕೆ ಹೋಲಿಸಿದರೆ 2018ರಲ್ಲಿ ಹುಲಿಗಳ ಸಂತತಿಯಲ್ಲಿ ಶೇಕಡ 33ರಷ್ಟು ಹೆಚ್ಚಳ ಕಂಡುಬಂದಿತ್ತು. ಕಾಡು ಬೆಕ್ಕುಗಳಿಗೂ ಭಾರತ ಅತ್ಯುತ್ತಮ ತಾಣವಾಗಿದೆ ಎಂದು ಸಮೀಕ್ಷೆಯಲ್ಲಿ ತಿಳಿದುಬಂದಿತ್ತು.

"ಹುಲಿಗಳ ಗಣತಿ ಕಾರ್ಯವು ಗಿನ್ನೆಸ್‌ ದಾಖಲೆಗೆ ಸೇರ್ಪಡೆಯಾಗಿರುವುದು ಅದ್ಬುತ ಸಾಧನೆಯಾಗಿದೆ. ನಿಗದಿತ ಗುರಿಗಿಂತ ನಾಲ್ಕು ವರ್ಷಗಳ ಮೊದಲೇ ನಾವು ಹುಲಿಗಳ ಸಂಖ್ಯೆಯನ್ನು ದ್ವಿಗುಣಗೊಳಿಸುವ ಸಂಕಲ್ಪವನ್ನು ಪೂರೈಸಿದ್ದೇವೆ. ಇದು ಆತ್ಮನಿರ್ಭರ ಭಾರತದ ಪರಿಕಲ್ಪನೆಗೆ ನಿಜವಾದ ನಿದರ್ಶನ," ಎಂದು ಕೇಂದ್ರ ಪರಿಸರ ಸಚಿವ ಪ್ರಕಾಶ್‌ ಜಾವಡೇಕರ್‌ ಹೇಳಿದ್ದಾರೆ.