ಭಾರತದ ಮೊದಲ 'ಕಲ್ಲು ಹೂ'ವಿನ ಗಾರ್ಡನ್‌ ಉತ್ತರಕಾಂಡದಲ್ಲಿ ನಿರ್ಮಾಣ, ಹೂವಿನ ವಿಶೇಷತೆ ಇಲ್ಲಿದೆ!

ಡೆಹ್ರಾಡೂನ್‌: ಉತ್ತರಾಖಂಡದ ಕುಮೌನ್‌ ಪ್ರಾಂತ್ಯದ ಮುನ್ಷಿಯಾರಿ ಬೆಟ್ಟದಲ್ಲಿ ನಿರ್ಮಿಸಿರುವ ದೇಶದ ಮೊಟ್ಟ ಮೊದಲ ಲೈಕೆನ್‌ (ಕಲ್ಲು ಹೂ) ಉದ್ಯಾನ ಸಾರ್ವಜನಿಕರ ಪ್ರವೇಶಕ್ಕೆ ಮುಕ್ತವಾಗಿದೆ. ಸ್ಥಳೀಯವಾಗಿ 'ಝುಲಾನ್‌' ಅಥವಾ 'ಪತ್ತರ್‌ ಕೀ ಫೂಲ್‌' ಎಂದು ಕರೆಸಿಕೊಳ್ಳುವ ಈ ಕಲ್ಲು ಹೂವುಗಳ ಉದ್ಯಾನವನ್ನು ಉತ್ತರಾಖಂಡದ ಅರಣ್ಯ ಇಲಾಖೆಯ ನೇತೃತ್ವದಲ್ಲಿ ನಿರ್ಮಿಸಲಾಗಿದೆ.

ಹಿಮಚ್ಛಾದಿತ ಮುನ್ಷಿಯಾರಿ ಬೆಟ್ಟದ ಸುಮಾರು ಎರಡು ಎಕರೆ ಪ್ರದೇಶದಲ್ಲಿ ಲೈಕನ್‌ ಗಾರ್ಡನ್‌ ನಿರ್ಮಿಸಲಾಗಿದ್ದು, 80 ತಳಿ ಲೈಕೆನ್‌ಗಳೂ ವೀಕ್ಷಣೆಗೆ ಲಭ್ಯವಿದೆ ಎಂದು ಮುಖ್ಯ ಅರಣ್ಯ ಸಂರಕ್ಷಕ ಸಂಜೀವ್‌ ಚತುರ್ವೇದಿ ತಿಳಿಸಿದ್ದಾರೆ. ಈ ಉದ್ಯಾನವನ ಉದ್ಘಾಟನೆಯಾಗಿದ್ದರು, ಕೋವಿಡ್‌ -19 ಹಿನ್ನೆಲೆಯಲ್ಲಿ ಸಾಮಾಜಿಕ ಅಂತರದೊಂದಿಗೆ ಸಾರ್ವಜನಿಕರ ವೀಕ್ಷಣೆಗೆ ಅವಕಾಶ ಕಲ್ಪಿಸಲಾಗಿದೆ.. ಮುಂದೆ ಹೆಚ್ಚಿನ ಸಂಖ್ಯೆಯ ವೀಕ್ಷಕರಿಗೆ ಅವಕಾಶ ಮಾಡಿಕೊಡಲಾಗುವುದು ಎಂದು ಅವರು ಹೇಳಿದರು.

ಏನಿದೂ ಲೈಕೆನ್!
ಲೈಕೆನ್‌ ಪಾಚಿ ಜಾತಿಯ ಕಲ್ಲು ಹೂವಾಗಿದ್ದು, ಸಾಂಬಾರ ಪದಾರ್ಥವಾಗಿಯೂ ಬಳಕೆಯಾಗುತ್ತಿದೆ. ಪ್ರಮುಖವಾಗಿ ಹೈದರಾಬಾದ್‌ ಬಿರಿಯಾನಿ ತಯಾರಿಯಲ್ಲಿಇದು ಕಡ್ಡಾಯ ಇರಲೇಬೇಕಾದ ಪದಾರ್ಥವಾಗಿದೆ. ಸುಗಂಧ ದ್ರವ್ಯಗಳ ತಯಾರಿಕೆ, ಸನ್‌ಸ್ಕ್ರೀನ್‌ ಕ್ರೀಮ್‌ಗಳು ಉತ್ಪಾದನೆಯಲ್ಲೂಇದನ್ನು ಬಳಸಲಾಗುತ್ತದೆ.

ಹುರಿಯತ್ ಕಾನ್ಫರೆನ್ಸ್ ತ್ಯಜಿಸಿದ ಪ್ರತ್ಯೇಕತಾವಾದಿ ಸೈಯದ್ ಗಿಲಾನಿ: ಪ್ರತ್ಯೇಕತಾವಾದವನ್ನೂ ತ್ಯಜಿಸಿದರೆ..?

ಕಲ್ಲಿನಲ್ಲಿರುವ ಲವಣಗಳನ್ನು ಹೀರಿ ಪ್ರತ್ಯೇಕಿಸುವ ಸಾಮರ್ಥ್ಯ ಲೈಕೆನ್‌ಗಳಿಗಿದ್ದು, ವಾತಾವರಣ ಕಲುಷಿತವಾದರೆ ಇದು ಬೇಗ ಪ್ರತಿಕ್ರಿಯೆ ನೀಡುವ ಮೂಲಕ ಬಣ್ಣ ಬದಲಾಯಿಸುತ್ತದೆ. ಹೀಗಾಗಿ ಶುದ್ಧ ವಾತಾವರಣ ಇರುವ ಕಡೆ ಮಾತ್ರ ಲೈಕೆನ್‌ಗಳು ಬೆಳೆಯುತ್ತವೆ. ಜಗತ್ತಿನಾದ್ಯಂತ 20 ಸಾವಿರ ಲೈಕೆನ್‌ ತಳಿಗಳಿದ್ದು, ಭಾರತದಲ್ಲಿ 2, 174 ತಳಿಗಳು ಲಭ್ಯವಿದೆ. ಅದರಲ್ಲೂಉತ್ತರಾಖಂಡದ ಪರ್ವತ ಶ್ರೇಣಿಗಳ ನಡುವೆ 600 ತಳಿಗಳು ಕಾಣಸಿಗುತ್ತವೆ. ಕಲ್ಲಿನ ಮೇಲೆ, ಮರದ ಮೇಲೆಯೂ ಲೈಕೆನ್‌ಗಳು ಬೆಳೆಯುತ್ತದೆ.