ಇಂದಿರಾ ಇಂದಿಗೂ ಮೆಚ್ಚುಗೆಯ ಪ್ರಧಾನಿ: ಪ್ರಣಬ್‌

ಹೊಸದಿಲ್ಲಿ: ಇಂದಿರಾ ಗಾಂಧಿ ಮರಣದ 33 ವರ್ಷಗಳ ಬಳಿಕವೂ ದೇಶದ ಅತ್ಯಂತ ಪ್ರಭಾವಿ ಹಾಗೂ ಒಪ್ಪುವಂಥ ಪ್ರಧಾನಿ ಎಂದು ರಾಷ್ಟ್ರಪತಿ ಪ್ರಣಬ್‌ ಮುಖರ್ಜಿ ಶ್ಲಾಘಿಸಿದ್ದಾರೆ.
ಇಂದಿರಾ ಗಾಂಧಿ ಆತ್ಮಕಥೆ ಇಂಡಿಯಾಸ್‌ ಇಂದಿರಾ ಪುಸ್ತಕ ಬಿಡುಗಡೆ ಸಮಾರಂಭದಲ್ಲಿ ಪಾಲ್ಗೊಂಡು ಮಾತನಾಡಿರುವ ರಾಷ್ಟ್ರಪತಿ, 20ನೇ ಶತಮಾನದಿಂದಲೂ ಇಂದಿರಾ ಒಬ್ಬ ಪ್ರಭಾವಿ ಹಾಗೂ ಅತ್ಯಂತ ಜನಪ್ರಿಯ ಮಹಿಳೆಯರಲ್ಲಿ ಒಬ್ಬರಾಗಿ ಉಳಿದಿದ್ದಾರೆ. ಇಂದಿರಾ ಹತ್ಯೆಯಾದ 33 ವರ್ಷದ ಬಳಿಕವೂ ಇಂದಿರಾ ಕುರಿತು ಜನರು ಮಾತನಾಡಿಕೊಂಡು, ಅವರ ಆಡಳಿತ ವೈಖರಿ ಕುರಿತು ಉತ್ತಮ ಅಭಿಪ್ರಾಯ ಹೊಂದಿದ್ದು, ಇವರನ್ನು ಸ್ವೀಕಾರಾರ್ಹ ಪ್ರಧಾನಿ ಎಂದು ಕರೆಯತ್ತಿರುವುದಾಗಿ ಪ್ರಣಬ್‌ ಹೇಳಿದ್ದಾರೆ.

ಇಂದಿರಾ ಧೈರ್ಯಕ್ಕೆ ಸಾಕ್ಷಿಯಾಗಿದ್ದ ಪಂಜಾಬ್‌ನ ಸ್ವರ್ಣ ಮಂದಿರ ಗಲಭೆ ಹಾಗೂ ಆಪರೇಷನ್‌ ಬ್ಲೂ ಸ್ಟಾರ್‌ ಕುರಿತು ಮಾತನಾಡಿದ ಪ್ರಣಬ್‌, 'ಗಲಭೆ ಹಾಗೂ ಅಲ್ಲಿನ ಬೆಳವಣಿಗೆ ಕುರಿತು ಇಂದಿರಾಗೆ ಮೊದಲೇ ತಿಳಿದಿತ್ತು, ಈ ಎಲ್ಲಾ ಬೆಳವಣಿಗೆ ಕುರಿತು ನನ್ನ ಬಳಿ ಮಾತನಾಡಿದ್ದರು. ಆ ಕ್ಷಣಕ್ಕೆ ಅನಿವಾರ್ಯವಾಗಿ ಕ್ರಮಗಳನ್ನು ತೆಗೆದುಕೊಳ್ಳಬೇಕಾಗುತ್ತದೆ. ಆದರೆ, ನಮ್ಮ ನಿರ್ಧಾರ ಮುಂದೊಂದು ದಿನ ಹಿಂತಿರುಗಿ ನೋಡಿದಾಗ ತಪ್ಪೆನಿಸಬಹುದು' ಎಂದೂ ಹೇಳಿದ್ದರು ಎಂದು ಪ್ರಣಬ್‌ ಹೇಳಿದ್ದರು.

ಕಾಂಗ್ರೆಸ್‌ ನಾಯಕ ಆನಂದ್‌ ಶರ್ಮಾ ಈ ಪುಸ್ತಕವನ್ನು ಬರೆದಿದ್ದು, ಸಭೆಯಲ್ಲಿ ಮಾಜಿ ಪ್ರಧಾನಿ ಮನಮೋಹನ್‌ ಸಿಂಗ್‌, ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಹಾಗೂ ಹಲವಾರು ನಾಯಕರು ಉಪಸ್ಥಿತರಿದ್ದರು.