ಇಂಡೋನೇಷ್ಯಾ ವಿಮಾನದ ಎಂಜಿನ್‌ನಲ್ಲಿ ದೋಷ

ಜಕಾರ್ತ: ಕಳೆದ ಸೋಮವಾರ ಸಮುದ್ರದಲ್ಲಿ ಪತನಗೊಂಡ ಇಂಡೋನೇಷ್ಯಾದ ಲಯನ್ಸ್‌ ಏರ್ಸ್‌ ವಿಮಾನಯಾನ ಸಂಸ್ಥೆಯ ವಿಮಾನದ ಎಂಜಿನ್‌ನಲ್ಲಿ ದೋಷವಿದ್ದರೂ ಹಾರಾಟಕ್ಕೆ ಅನುಮತಿ ನೀಡಲಾಗಿತ್ತು ಎಂಬ ಸಂಗತಿ ಈಗ ಬಯಲಾಗಿದೆ.

ಇಂಡೋನೇಷ್ಯಾದ ರಾಜಧಾನಿ ಜಕಾರ್ತ ಏರ್‌ಪೋರ್ಟ್‌ನಿಂದ ಬೋಯಿಂಗ್‌ 737 ಮ್ಯಾಕ್ಸ್‌ 8 ವಿಮಾನ ಹಾರಾಟ ಆರಂಭಿಸಿದ 13 ನಿಮಿಷದಲ್ಲಿ ರೇಡಾರ್‌ ಸಂಪರ್ಕ ಕಳೆದುಕೊಂಡು ಜಾವಾ ಸಮುದ್ರದಲ್ಲಿ ಪತನಗೊಂಡಿತ್ತು. ಪ್ರಯಾಣಿಕರು ಹಾಗೂ ಸಿಬ್ಬಂದಿ ಸೇರಿ ವಿಮಾನದಲ್ಲಿ 189 ಜನ ಮೃತಪಟ್ಟಿದ್ದರು. ಸತತ ಐದನೇ ದಿನವಾದ ಶುಕ್ರವಾರವೂ ವಿಮಾನದ ಅವಶೇಷ ಹಾಗೂ ಮೃತದೇಹಗಳಿಗೆ ಶೋಧ ಮುಂದುವರಿದಿದೆ.

ದುರಂತದ ಹಿಂದಿನ ದಿನವಾದ ಭಾನುವಾರ ಪೈಲಟ್‌, ಬಾಲಿ ವಿಮಾನದಿಂದ ಹಾರಾಟ ಆರಂಭಿಸಿದ ಕೆಲವೇ ಹೊತ್ತಿನಲ್ಲಿ ಎಂಜಿನ್‌ನಲ್ಲಿ ಸಣ್ಣ ದೋಷ ಕಾಣಿಸಿಕೊಂಡಿದ್ದು ಹಿಂದಿರುಗಲು ಅನುಮತಿ ಕೇಳಿದ್ದರು. ಅದಾಗಿ ಕೆಲವೇ ಹೊತ್ತಿನಲ್ಲಿ ದೋಷ ಸರಿಹೋಗಿದ್ದು, ಜಕಾರ್ತಗೆ ಪ್ರಯಾಣ ಮುಂದುವರಿಸುವುದಾಗಿ ಹೇಳಿದ್ದರು. ಅದರಂತೆ ಎಲ್ಲವೂ ಸುಸೂತ್ರವಾಗಿ ನಡೆಯಿತು.

ಆದರೆ ಸೋಮವಾರ ವಿಮಾನ ಜಕಾರ್ತದಿಂದ ಪ್ಯಾಂಕಲ್‌ ಪಿನಾಂಗ್‌ಗೆ ಪ್ರಯಾಣ ಆರಂಭಿಸಿದ 13 ನಿಮಿಷಗಳಲ್ಲಿ ದುರಂತಕ್ಕೀಡಾಯಿತು. ಎಂಜಿನ್‌ ದೋಷವಿದ್ದರೂ ಅದರ ಸೂಕ್ತ ಪರಿಶೀಲನೆ ನಡೆಸದೇ ಹಾರಾಟಕ್ಕೆ ಅನುಮತಿ ನೀಡಿದ್ದು ಘಟನೆಗೆ ಕಾರಣ ಎಂದು ತನಿಖಾಕಾರಿಗಳ ಹೇಳಿಕೆ ಉಲ್ಲೇಖಿಸಿ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.