ಎಸ್‌ಪಿಯನ್ನೇ ಕೂಡಿ ಹಾಕಿ ಲೂಟಿ

ಇಂದೋರ್: ಪೊಲೀಸ್ ಅಧೀಕ್ಷಕರನ್ನೇ ಕೂಡಿ ಹಾಕಿ ಅವರ ಮನೆಯಲ್ಲಿ ದರೋಡೆ ಮಾಡಿದ ಬೆಚ್ಚಿ ಬೀಳಿಸುವ ಘಟನೆ ಇಂದೋರ್‌ನಲ್ಲಿ ಶನಿವಾರ ನಡೆದಿದೆ.

ಎಸ್‌ಪಿ ಸುನೀಲ್ ರಾಜೋರ್ ಅವರ ಸರ್ಕಾರಿ ನಿವಾಸದಲ್ಲಿ ಶನಿವಾರ ರಾತ್ರಿ 2 ಗಂಟೆ ಸುಮಾರಿಗೆ ಈ ಘಟನೆ ನಡೆದಿದೆ. ಸರಿಯಾದ ಸಮಯಕ್ಕೆ ಮಾಹಿತಿ ಪಡೆದ ಪೊಲೀಸ್ ಅಧಿಕಾರಿಗಳು ಸ್ಥಳಕ್ಕಾಗಮಿಸಿ ಒಬ್ಬನನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಕಿಟಕಿ ಜಾಲರಿಯನ್ನು ಕತ್ತರಿಸಿ ಮನೆಯ ಹಿಂಭಾಗದ ಗೇಟ್ ಲಾಕ್ ಓಪನ್ ಮಾಡಿದ ದರೋಡೆಕೋರರು ರಾಜೋರ್ ಅವರನ್ನು ಕೋಣೆಯಲ್ಲಿ ಕೂಡಿ ಹಾಕಿ ಮನೆಯನ್ನು ಒಂದು ಗಂಟೆ ಕಾಲ ದೋಚಿದ್ದಾರೆ. ಆ ಸಮಯದಲ್ಲಿ ರಾಜೋರ್ ಅವರ 70 ವರ್ಷದ ತಾಯಿ ಬೇಬಿ ರಾಜೋರ್, 37 ವರ್ಷದ ಸಹೋದರಿ ಸಂಗೀತಾ , ಆಕೆಯ ಮಗಳು ಮತ್ತು ಮಗ ಸಹ ಇದ್ದರು.

ಎಸ್‌ಪಿ ಡೆಬಿಟ್ ಕಾರ್ಡ್ಸ್ ಇದ್ದ ವಾಲೆಟ್‌ ಮತ್ತು ಸ್ವಲ್ಪ ಹಣವನ್ನು ದೋಚಿದ ಕಳ್ಳರು ಅವರು ಮಲಗಿದ್ದ ಕೋಣೆ ಬಾಗಿಲನ್ನು ಹೊರಗಿನಿಂದ ಲಾಕ್ ಮಾಡಿ ಮನೆಯೊಳಗಿನ ಬೆಲೆಬಾಳುವ ವಸ್ತುಗಳಿಗಾಗಿ ಶೋಧ ನಡೆಸಿದ್ದಾರೆ. ಹಾಲ್‌ನಲ್ಲಿ ಮಲಗಿದ್ದ ಅವರ ತಾಯಿ ಮತ್ತು ತಂಗಿಗೆ ಕಳ್ಳರ ನೆರಳು ಕಂಡಿದೆ. ತಕ್ಷಣ ತಾಯಿ ಎಮರ್ಜೆನ್ಸಿ ಬೆಲ್ ಬಾರಿಸಿ ಮಗನನ್ನು ಎಚ್ಚರಿಸಲು ಪ್ರಯತ್ನಿಸಿದ್ದಾರೆ. ತಾಯಿ ಮತ್ತು ತಂಗಿಯ ಸಹಾಯಕ್ಕೆ ಧಾವಿಸಬೇಕೆನ್ನುವಷ್ಟರಲ್ಲಿ ತಮ್ಮ ಕೋಣೆಯ ಬಾಗಿಲನ್ನು ಹೊರಗಿನಿಂದ ಹಾಕಿರುವುದು ಎಸ್‌ಪಿ ಅವರ ಗಮನಕ್ಕೆ ಬಂದಿದೆ. ತಕ್ಷಣ ಅವರು ಪೊಲೀಸ್ ಠಾಣೆಗೆ ಕರೆ ಮಾಡಿದ್ದಾರೆ.

ಅಧಿಕಾರಿಗಳು ಸ್ಥಳಕ್ಕಾಗಮಿಸಿದಾಗ ಮನೆ ಹೊರಗೆ ಕಾವಲಿಗೆ ನಿಂತಿದ್ದ ಕಳ್ಳರು ಮತ್ತು ಒಳಗಡೆ ಇದ್ದ ಇಬ್ಬರ ಪೈಕಿ ಒಬ್ಬ ಪರಾರಿಯಾಗಲು ಸಫಲರಾಗಿದ್ದಾರೆ. ಇನ್ನೊಬ್ಬನನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.

ದರೋಡೆಕೋರರು ಮನೆಯಲ್ಲಿ ಅಳವಡಿಸಲಾಗಿದ್ದ ಸಿಸಿ ಟಿವಿ ಕ್ಯಾಮರಾ ಕೇಬಲ್‌ನ್ನು ಸಹ ತುಂಡರಿಸಿದ್ದಾರೆ ಎಂದು ತಿಳಿದು ಬಂದಿದೆ.

ಬಂಧಿತನನ್ನು ವಿಚಾರಣೆಗೊಳಪಡಿಸಲಾಗಿದ್ದು, ಆತ ನೀಡಿರುವ ಮಾಹಿತಿಯ ಆಧಾರದ ಮೇಲೆ ಉಳಿದವರ ಪತ್ತೆಗೆ ಬಲೆ ಬೀಸಲಾಗಿದೆ.