ಅಯ್ಯಪ್ಪ ಭಕ್ತರ ಮೇಲೆ ಉಗ್ರ ದಾಳಿ: ತ್ರಿಶೂರ್‌ ರೈಲ್ವೆ ನಿಲ್ದಾಣಕ್ಕೆ ಪೊಲೀಸರ ಎಚ್ಚರಿಕೆ

ತ್ರಿಶೂರ್: ಶಬರಿಮಲೆಗೆ ತೆರಳುವ ಅಯ್ಯಪ್ಪ ಭಕ್ತರ ಮೇಲೆ ಐಸಿಸ್ ಉಗ್ರರು ದಾಳಿ ನಡೆಸುವ ಸಾಧ್ಯತೆಯಿದೆ, ಎಂದು ಸಾಮಾಜಿಕ ಜಾಲತಾಣದಲ್ಲಿ ಸುದ್ದಿಗಳು ಹರಿದಾಡುತ್ತಿದ್ದು, ಈ ಬಗ್ಗೆ ಗುಪ್ತಚರ ಮಾಹಿತಿಯನ್ನಾಧರಿಸಿ ರೈಲ್ವೆ ಪೊಲೀಸರಿಗೆ ಜಾಗೃತರಾಗಿರುವಂತೆ ರಾಜ್ಯ ಪೊಲೀಸರು ಸೂಚಿಸಿದ್ದಾರೆ.

ಇರಾಕ್ ಹಾಗೂ ಸಿರಿಯಾ ಮೂಲದ ಐಸಿಸ್ ಉಗ್ರರು ನೀರಿಗೆ ವಿಷ ಬೆರೆಸಿ, ಅಯ್ಯಪ್ಪ ಭಕ್ತರನ್ನು ಬೆದರಿಸುವ ಸಾಧ್ಯತೆ ಇರುವುದಾಗಿ ತ್ರಿಶೂರ್ ರೈಲ್ವೆ ನಿಲ್ದಾಣದ ಮ್ಯಾನೇಜರ್‌ಗೆ ಬರೆದ ಪತ್ರದಲ್ಲಿ ರಾಜ್ಯ ಪೊಲೀಸರು ಮುನ್ನೆಚ್ಚರಿಕೆ ನೀಡಿದ್ದಾರೆ.

ಪ್ರಯಾಣಿಕರಿಗೆ ಆಹಾರ ಹಾಗೂ ನೀರನ್ನು ಪೂರೈಸುವಾಗ ರೈಲ್ವೆ ಇಲಾಖೆ ಅಗತ್ಯ ಮುಂಜಾಗೃತಾ ಕ್ರಮಗಳನ್ನು ತೆಗೆದುಕೊಳ್ಳಬೇಕೆಂದು, ಕೋರಿಕೊಳ್ಳಲಾಗಿದೆ.

ಉಗ್ರರ ಬೆದರಿಕೆ ಬಗ್ಗೆ ಸಾಕಷ್ಟು ಸಂದೇಶಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಇದಕ್ಕೆ ಸಂಬಂಧಿಸಿದಂತೆ ತನಿಖೆ ನಡೆಸಲಾಗುವುದು. ಇಂಥ ಸಂದೇಶಗಳಿಗೆ ಸುಖಾಸುಮ್ಮನೆ ಭಯಗೊಳ್ಳುವ ಅಗತ್ಯವೂ ಇಲ್ಲವೆಂದು ಪೊಲೀಸರು ಭಕ್ತರಿಗೆ ತಿಳಿಸಿದ್ದಾರೆ.