ವಿಶ್ವ ಯೋಗ ದಿನಕ್ಕೆ ಸಿದ್ಧತೆ: ರಾಮ್‌ದೇವ್‌ ಜತೆ ಸಿಎಂ ಯೋಗಿ ಯೋಗ ಪ್ರದರ್ಶನ

ಲಖನೌ: ಈ ತಿಂಗಳ 21ರಂದು ಅಂತಾರಾಷ್ಟ್ರೀಯ ಯೋಗ ದಿನ ಆಚರಿಸಲಾಗುತ್ತಿದ್ದು, ಉತ್ತರಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್‌, ರಾಜ್ಯಪಾಲ ರಾಮ್‌ ನಾಯ್ಕ್‌ ಅವರು ಯೋಗಗುರು ಬಾಬಾ ರಾಮ್‌ದೇವ್‌ ಜತೆ ಯೋಗಾಭ್ಯಾಸ ಪ್ರದರ್ಶಿಸಿದರು.

ಯೋಗಿ ಮತ್ತು ನಾಯ್ಕ್‌ ಅವರು ನಾನಾ ಯೋಗ ಭಂಗಿಗಳನ್ನು ಮತ್ತು ಆಸನಗಳನ್ನು ಮಾಡಿ ತೋರಿಸಿದರು. ಸಿಎಂ ಯೋಗಿ ಮತ್ತು ಪ್ರಧಾನಿ ಮೋದಿ ಅವರು, ಜೂನ್‌ 21ರಂದು ಲಖನೌದಲ್ಲಿ ನಡೆಯಲಿರುವ ಯೋಗ ದಿನಾಚರಣೆಯಲ್ಲಿ 50,000 ಮಂದಿ ಯೋಗಾಸನ ಪ್ರದರ್ಶಿಸಲಿದ್ದಾರೆ ಎಂಬ ನಿರೀಕ್ಷೆ ಹೊಂದಿದ್ದಾರೆ.

ಹಿರಿಯ ನಾಗರಿಕರು, ಅಂಗನವಾಡಿ ಕಾರ್ಯಕರ್ತೆಯರು, 500 ಮಂದಿ ದಿವ್ಯಾಂಗರು ಯೋಗ ದಿಣಾಚರಣೆಯಲ್ಲಿ ಭಾಗವಹಿಸುವ ನಿರೀಕ್ಷೆ ಇದೆ. ಭಾಗವಹಿಸುವವರಿಗೆ ಮಿನರಲ್‌ ವಾಟರ್‌ ಬಾಟಲಿ, ಟಿ ಶರ್ಟ್‌ ನೀಡಲಾಗುವುದು.

ದೇಶ ಮತ್ತು ರಾಜ್ಯಗಳಲ್ಲಿ ಯೋಗ ದಿನಾಚರಣೆಗೆ ಸಿದ್ಧತೆ ನಡೆಸುವ ಸಭೆಯಲ್ಲಿ ರಾಜ್ಯ ಮುಖ್ಯ ಕಾರ್ಯದರ್ಶಿ ರಾಹುಲ್‌ ಭಟ್ನಾಗರ್‌, ಆಯುಷ್‌ ಸಚಿವಾಲಯದ ಜಂಟಿ ಕಾರ್ಯದರ್ಶಿ ಮತ್ತು ಅಧಿಕಾರಿಗಳು ಭಾಗವಹಿಸಿದ್ದರು. 2015ರಿಂದ ಜೂನ್‌ 21ನ್ನುಅಂತಾರಾಷ್ಟ್ರೀಯ ಯೋಗ ದಿನವನ್ನಾಗಿ ಆಚರಿಸಲಾಗುತ್ತಿದೆ.